ବାଙ୍ଗାଲୋର,୧୫-୯: ସାମଗ୍ରୀ ଏବଂ ସେବା ଟିକସ (ଜିଏସ୍ଟି) ବ୍ୟବସ୍ଥାରେ ହେଉଥିବା ଟିକସ ଠକେଇ ରୋକିବା ଦିଗରେ ସରକାର ନୂଆ ପଦକ୍ଷେପ ଗ୍ରହଣ କରିଛନ୍ତି। ଏହି ଧାରାରେ ୨୦୨୦ ଜାନୁୟାରୀଠାରୁ ନୂଆ ଡିଲରଙ୍କ ଲାଗି ଆଧାର ଯାଞ୍ଚ ବାଧ୍ୟତାମୂଳକ କରାଯିବ। ପୂର୍ବରୁ ଏହା ଇଛାଧିନ ରହିଥିବା ବେଳେ ଆଧାର ପ୍ରମାଣନ(ଅଥେଣ୍ଟିକେଶନ)କୁ ବର୍ତ୍ତମାନ ଅନିବାର୍ଯ୍ୟ କରାଯାଇଥିବା ଜିଏସ୍ଟି ନେଟଓ୍ବର୍କ ମନ୍ତ୍ରୀ ଗୋଷ୍ଠୀର ମୁଖ୍ୟ ତଥା ବିହାର ଉପମୁଖ୍ୟମନ୍ତ୍ରୀ ସୁଶୀଲ ମୋଦି କହିଛନ୍ତି। ମିଥ୍ୟା ଇନ୍ଭଏସ ଦ୍ୱାରା ଲୋକମାନେ ଜିଏସ୍ଟିରେ ଠକେଇ କରୁଥିବା ଗତ ଦୁଇବର୍ଷ ହେବ ଦେଖିବାକୁ ମିଳୁଛି। ଏଭଳି ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଆଧାରରେ ନୂଆ ପଦକ୍ଷେପ ନିଆଯାଇଛି ବୋଲି ମୋଦି ଏଠାରେ ଖବରଦାତାଙ୍କୁ ସୂଚନା ଦେଇଛନ୍ତି।
ସେ କହିଛନ୍ତି, ଯେଉଁମାନେ ଆଧାର ପ୍ରମାଣନ କରିବାକୁ ଅନିଛୁକ ସେମାନେ ଦସ୍ତାବିଜ ଭାବେ ଏହାକୁ ଦର୍ଶାଇ ପାରିବେ। ଏହି ପ୍ରକ୍ରିୟା ଲାଗି ୩ ଦିନ ସମୟ ଲାଗିବ। ରିଫଣ୍ଡିଂ ବର୍ତ୍ତମାନ ଏକ ପ୍ରମୁଖ ସମସ୍ୟା ଭାବେ ଉଭା ହୋଇଛି। ଚଳିତ ବର୍ଷ ସେପ୍ଟେମ୍ବର ୨୪ଠାରୁ ଏକକ ସୋର୍ସରୁ ଅନ୍ଲାଇନ ରିଫଣ୍ଡ ଧାରାକୁ ଶେଷ କରିବାକୁ ଜିଏସ୍ଟିଏନ୍ ନିଷ୍ପତ୍ତି ନେଇଛି। କେନ୍ଦ୍ରୀୟ ଜିଏସ୍ଟି ବା ରାଜ୍ୟ ଜିଏସ୍ଟିକୁ ବିଚାରକୁ ନେଇ ଏହା କରିବାକୁ ଯୋଜନା କରାଯାଇଛି। ୨୦୨୦ ଜାନୁୟାରୀ ପହିଲାଠାରୁ ନୂଆ ସରଳୀକୃତ ଜିଏସ୍ଟି ରିଟର୍ନ ସିଷ୍ଟମ ଶୁଭାରମ୍ଭ କରିବାକୁ ଜିଏସ୍ଟିଏନ୍ ପକ୍ଷରୁ ଯୋଜନା ଚୂଡାନ୍ତ କରାଯାଇଛି। ଚଳିତ ମାସ ୨୦ରେ ଗୋଆରେ ଅନୁଷ୍ଠିତ ହେବାକୁ ଥିବା ଜିଏସ୍ଟି ପରିଷଦ ବୈଠକରେ ଆଗାମୀ କାର୍ଯ୍ୟପନ୍ଥା ଗ୍ରହଣ କରାଯିବ ବୋଲି ସେ ମୋଦି ପ୍ରକାଶ କରିଛନ୍ତି।
