ନ୍ୟୁୟର୍କ/ମୁମ୍ବାଇ,୧୦।୪(ଏ.ପି./ପି.ଟି.): ଲେବାନନ୍ରେ ଇସ୍ରାଏଲ୍ର ଧ୍ୱଂସଲୀଳା ଦେଖି ଇରାନ୍ ପ୍ରତିକ୍ରିୟାଶୀଳ ହୋଇଉଠିଛି । ଫେବୃଆରୀ ୨୮ରେ ଆମେରିକା-ଇସ୍ରାଏଲ୍ର ଜଏଣ୍ଟ ଷ୍ଟ୍ରାଇକ୍ ପରେ ଯେଉଁ ଷ୍ଟ୍ରେଟ୍ ଅଫ୍ ହର୍ମୁଜ୍ରେ ଅଶୋଧିତ ତୈଳ ଓ ପ୍ରାକୃତିକ ବାଷ୍ପ ପରିବହନଜନିତ ଅଚଳାବସ୍ଥା ଯୋଗୁ କ୍ରୁଡ୍ ମୂଲ୍ୟ ବଢ଼ିଥିଲା, ସେହି ଜଳପଥ ଏବେ ପୁଣି ଭୂରାଜନୈତିକ ଉତ୍ତେଜନାରେ ଛନ୍ଦିହୋଇଯାଇଛି। ଇରାନ୍ ହର୍ମୁଜ୍ ପ୍ରଣାଳୀକୁ ଖୋଲିବ ନାହିଁ ବୋଲି ପଣ କରିଛି। ଷ୍ଟ୍ରେଟ୍ ଅଫ୍ ହର୍ମୁଜ୍ ହେଉଛି ପ୍ରଣାଳୀକୁ ଖୋଲିବ ନାହିଁ ବୋଲି ପଣ କରିଛି। ଷ୍ଟ୍ରେଟ୍ ଅଫ୍ ହର୍ମୁଜ୍ ହେଉଛି ବିଶ୍ୱର ଏକ ପ୍ରମୁଖ ତୈଳ ପରିବହନ ଚୋକ୍ପଏଣ୍ଟ। ଏହି ଜଳପଥ ଦେଇ ଭାରତ, ଚାଇନା ଓ ଜାପାନ ସମେତ ବିଶ୍ୱର ବିଭିନ୍ନ ଭାଗକୁ ୩୦% କ୍ରୁଡ୍ ଅଏଲ୍ ଯାଇଥାଏ। କେପ୍ଲର ସୂତ୍ରରୁ ମିଳିଥିବା ତଥ୍ୟ ଅନୁସାରେ ଅସ୍ତ୍ରବିରତି ଘୋଷଣା କରାଯିବା ପରେ ମଧ୍ୟ ଏହି ଜଳପଥ ଦେଇ ଜାହାଜଗୁଡ଼ିକ ଯିବାକୁ ଚାହୁଁ ନାହାନ୍ତି।
ହର୍ମୁଜ୍ରେ ଅଚଳାବସ୍ଥା ଯୋଗୁ ତୈଳ ଦର ପୁଣି ବଢ଼ିଛି। ଗୁରୁବାର ୟୁଏସ୍ କ୍ରୁଡ୍ ଅଏଲ୍ ମୂଲ୍ୟରେ ୬.୮% ବୃଦ୍ଧି ଘଟିଛି। ଏହା ବ୍ୟାରେଲ ପିଛା ୧୦୦.୭୯ ଆମେରିକୀୟ ଡଲାର ଅତିକ୍ରମ କରିଛି। ସେହିପରି ବ୍ରେଣ୍ଟ କ୍ରୁଡ୍ରେ ମଧ୍ୟ ୩.୭% ବୃଦ୍ଧି ଘଟିବାରୁ ଏହା ବ୍ୟାରେଲ ପିଛା ୯୮.୨୪ ଡଲାରରେ ବିକ୍ରି ହେଉଛି। ଯୁଦ୍ଧ ପୂର୍ବରୁ ବ୍ରେଣ୍ଟ ମୂଲ୍ୟ ୭୦ ଡଲାର ଥିବାବେଳେ ସଂଘର୍ଷ ବେଳେ ସର୍ବାଧିକ ୧୧୯ ଡଲାରକୁ ବଢ଼ିଥିଲା। ବର୍ତ୍ତମାନର ସ୍ଥିତି ଲାଗି ରହିଲେ ତୈଳ ମୂଲ୍ୟ ପୁଣି ଆକାଶଛୁଅଁା ହୋଇପାରେ ବୋଲି ବଜାର ବିଶେଷଜ୍ଞ ମତ ଦେଉଛନ୍ତି।
ଭାରତ ଡଲାରରେ ତୈଳ ମୂଲ୍ୟ ପଇଠ କରୁଥିବାରୁ ଟଙ୍କା ଉପରେ ଏହାର ପ୍ରଭାବ ପଡ଼ିଛି। ଗୁରୁବାର ସେସନ୍ରେ ଡଲାର ତୁଳନାରେ ଭାରତୀୟ ମୁଦ୍ରା ୯ ପଇସା ଦୁର୍ବଳ ହୋଇଛି। ଆମେରିକୀୟ ଡଲାର ସହ ଟଙ୍କାର ବିନିମୟ ମୂଲ୍ୟ ୯୨.୬୩ ରହିଛି। ଇଣ୍ଟରବ୍ୟାଙ୍କ ଫରେନ୍ ଏକ୍ସଚେଞ୍ଜ ଖୋଲିବା ପରେ ଟଙ୍କା ୯୨.୯୨ ସ୍ତରକୁ ଖସିଥିଲା। ପରେ ଏହା ୯୨.୬୩ରେ ସ୍ଥିର ରହିଥିଲା। ଭୂରାଜନୈତିକ ଅସ୍ଥିରତା ଏବେ ମଧ୍ୟ ଜାରି ରହିଥିବାରୁ କିଛି ସ୍ଥାୟୀ ସମାଧାନ ନ ହେବା ପର୍ଯ୍ୟନ୍ତ ଟଙ୍କାର ଦୁର୍ବଳତା ଲାଗି ରହିବ ବୋଲି ଫରେକ୍ସ ଟ୍ରେଡର୍ସ କହିଛନ୍ତି।
ସେହିପରି ଭାରତୀୟ ଶେୟାର ବଜାର ଉପରେ ମଧ୍ୟ ଏହାର ପ୍ରଭାବ ଦେଖିବାକୁ ମିଳିଛି। ନିଫ୍ଟି ୨୨୫ ପଏଣ୍ଟ (୦.୯୩%) ହ୍ରାସ ପାଇ ୨୩,୭୭୫କୁ ଖସିଥିବାବେଳେ ସେନ୍ସେକ୍ସ ୯୫୦ (୧.୨%) ପଏଣ୍ଟ ହ୍ରାସ ପାଇ ୭୬,୬୩୧କୁ ଖସିଛି। ବିଗତ ୫ ସେସନ୍ର ଲାଭ ଦିନକରେ ଉଭାନ୍ ହୋଇଯାଇଛି। ବିଦେଶୀ ସଂସ୍ଥାଗତ ନିବେଶକ ୧,୭୧୧ କୋଟି ଟଙ୍କାର ଷ୍ଟକ୍ସ ବିକ୍ରି କରିଥିବାବେଳେ ଭାରତୀୟ ନିବେଶକମାନେ ପ୍ରାୟ ୧୪ ଲକ୍ଷ କୋଟି ଟଙ୍କାର କ୍ଷତି ସହିଛନ୍ତି।
