ବଞ୍ଚୋ,୧୦ା୪(ପ୍ରଦୋଷ କୁମାର ବିଶ୍ୱାଳ): ଦୀର୍ଘଦିନର ପ୍ରତୀକ୍ଷା ପରେ ଶେଷରେ ଶାଳପଡ଼ା ଓଭରବ୍ରିଜ ଶୁକ୍ରବାର ସାଧାରଣ ଲୋକଙ୍କ ପାଇଁ ଖୋଲାଯାଇଛି। ମୁଖ୍ୟମନ୍ତ୍ରୀଙ୍କ ଆସନ୍ତା ୧୨ ତାରିଖର ଗସ୍ତକୁ ଦୃଷ୍ଟିରେ ରଖି ତ୍ୱରାନ୍ବିତ ଭାବେ କାମ ସମ୍ପୂର୍ଣ୍ଣ କରାଯାଇଥିବା ବେଳେ, ବ୍ରିଜ୍ ଖୋଲାଯିବା ଫଳରେ ସ୍ଥାନୀୟ ଅଞ୍ଚଳର ଯାତାୟାତରେ ବଡ଼ ସୁବିଧା ମିଳିବ।
ଏହି ଓଭରବ୍ରିଜ୍ ଚାଲୁ ହେବା ସହିତ ଆନନ୍ଦପୁର ଓ ପାଖପାଖି ଅଞ୍ଚଳର ଯାତାୟାତ ବ୍ୟବସ୍ଥାରେ ନୂତନ ଗତି ଆସିବାକୁ ନେଇ ଆଶା ବ୍ୟକ୍ତ ହୋଇଛି। ବିଶେଷକରି ରାଜପଥ ୧୬ଉପରେ ଦୀର୍ଘଦିନ ଧରି ଘଟୁଥିବା ଯାତାୟାତ ଜାମ ଓ ଦୁର୍ଘଟଣାର ସମସ୍ୟା ହ୍ରାସ ପାଇବ ବୋଲି ସ୍ଥାନୀୟ ଲୋକମାନେ କହିଛନ୍ତି।
ଉଲ୍ଲେଖନୀୟ ଯେ, ଏହି ଓଭରବ୍ରିଜ୍ ନିର୍ମାଣରେ ବିଳମ୍ବ ହେବାରୁ ପୂର୍ବରୁ ଅନେକ ଦୁର୍ଘଟଣା ଘଟିଥିଲା ଏବଂ ଅନେକ ଲୋକଙ୍କ ମୃତ୍ୟୁ ଘଟିଥିବା ଘଟଣା ମଧ୍ୟ ରହିଛି। ତେଣୁ ବ୍ରିଜ୍ ଶୀଘ୍ର ଶେଷ କରି ଚାଲୁ କରାଯିବାକୁ ନେଇ ସାଧାରଣ ଲୋକଙ୍କ ଦାବି ଜୋରଦାର ହୋଇଥିଲା। ସ୍ଥାନୀୟ ଲୋକମାନେ ଏହି ପଦକ୍ଷେପକୁ ସ୍ବାଗତ କରିଥିବା ବେଳେ, ଦୀର୍ଘଦିନର ଦାବି ପୂରଣ ହୋଇଥିବାରେ ଖୁସି ପ୍ରକାଶ କରିଛନ୍ତି। ମୁଖ୍ୟମନ୍ତ୍ରୀଙ୍କ ଗସ୍ତ ସମୟରେ ଏହାର ଔପଚାରିକ ଉଦ୍ଘାଟନ ହେବାର ସମ୍ଭାବନା ରହିଛି।
