ନୂଆଦିଲ୍ଲୀ,୧୪-୯: ପ୍ରାୟ ସାଢ଼େ ୧୩ ହଜାର କୋଟି ଟଙ୍କାର ପଞ୍ଜାବ ନ୍ୟାଶନାଲ ବ୍ୟାଙ୍କ(ପିଏନ୍ବି) ମହାଦୁର୍ନୀତି ମାମଲାରେ ଜଡ଼ିତ ଥିବା ଅଭିଯୋଗରେ ମୁଖ୍ୟ ଅଭିଯୁକ୍ତ ନୀରବ ମୋଦି ଏବେ ଲଣ୍ଡନ ଜେଲ୍ରେ ବନ୍ଦୀ ରହିଛନ୍ତି। ବର୍ତ୍ତମାନ ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି)ର ଅନୁରୋଧ କ୍ରମେ ଇଣ୍ଟରପୋଲ ନୀରବଙ୍କ ଭାଇ ନେହାଲ ମୋଦିଙ୍କ ବିରୋଧରେ ରେଡ୍କର୍ନର ନୋଟିସ ଜାରି କରିଛି। ୪୦ ବର୍ଷୀୟ ନେହାଲ ବର୍ତ୍ତମାନ ବେଲ୍ଜିୟମର ନାଗରିକତା ହାସଲ କରିଛନ୍ତି ଏବଂ ସେ ଆମେରିକାରେ ରହୁଛନ୍ତି। ତାଙ୍କ ବିରୋଧରେ ମନି ଲଣ୍ଡରିଂ ଅଭିଯୋଗ ରହିଛି। ପିଏନ୍ବି ମହାଦୁର୍ନୀତିରେ ଲିପ୍ତ ନୀରବଙ୍କୁ ନେହାଲ ଟଙ୍କା ନେଣଦେଣରେ ସହାୟତା କରିଥିଲେ ବୋଲି ଇଡି ଅଭିଯୋଗ ଆଣିଛି। ଏପରିକି ସେ ସମସ୍ତ ପ୍ରମାଣକୁ ନଷ୍ଟ କରିଦେଇଛନ୍ତି ବୋଲି ଅଭିଯୋଗରେ ଦର୍ଶାଯାଇଛି। ଇଡି ପକ୍ଷରୁ କୁହାଯାଇଛି ଯେ, ମହାଦୁର୍ନୀତି ସମ୍ପର୍କରେ ଜଣାପଡିବା ପରେ ନେହାଲ ଦୁବାଇ ଓ ହଂକଂରେ ଥିବା ସେମାନଙ୍କର ସମସ୍ତ ଛଦ୍ମ କମ୍ପାନୀର ନିର୍ଦ୍ଦେଶକଙ୍କର ଫୋନ ନମ୍ବରକୁ ବନ୍ଦ କରିଦେଇଥିଲେ ଏବଂ ସେମାନଙ୍କୁ କାହିରା ପଠାଇ ଦେଇଥିଲେ। ଇତିମଧ୍ୟରେ ନୀରବଙ୍କ ୬୩୭ କୋଟି ଟଙ୍କାର ସମ୍ପତ୍ତି ଇଡି ଜବତ କରିସାରିଛି। ଭାରତ, ବ୍ରିଟେନ, ନ୍ୟୁୟର୍କ ସମେତ ଅନ୍ୟ ସ୍ଥାନରେ ଥିବା ତାଙ୍କର ସମସ୍ତ ଘର, ଗହଣା, ଅନ୍ୟାନ୍ୟ ସମ୍ପତ୍ତି ଏବଂ ବ୍ୟାଙ୍କରେ ଥିବା ଜମାକୁ ଜବତ କରାଯାଇଛି।
