କେପ୍ଟାଉନ,୩ା୧(ପି.ଟି): ୨୦୧୯ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ବେଟିଂ ମାମଲାକୁ ପ୍ରମାଣ ଅଭାବରୁ ବନ୍ଦ କରିଛି ସିବିଆଇ। ପାକିସ୍ତାନରୁ ମିଳିଥିବା ତଥ୍ୟ ଆଧାରରେ ମେ’ ୨୦୨୨ରେ ସିବିଆଇ ପକ୍ଷରୁ ଦୁଇଟି ମାମଲା ରୁଜୁ କରାଯାଇଥିଲା। ସିବିଆଇ ପକ୍ଷରୁ ଦିଲ୍ଲୀର ରୋହିଣୀରେ ରହୁଥିବା ଦିଲୀପ କୁମାର ଓ ହାଇଦ୍ରାବାଦର ଗୁରମ ବାସୁ ଓ ଗୁରମ୍ ସତୀଶଙ୍କ ନାମରେ ପ୍ରଥମ ମାମଲା ରୁଜୁ କରାଯାଇଥିଲା। ଦ୍ୱିତୀୟ ଏଫ୍ଆଇଆର୍ରେ ରାଜସ୍ଥାନର ସଜ୍ଜନ ସିଂ, ପ୍ରଭୁଲାଲ ମୀନା, ରାମ ଅବତାର ଓ ଅମିତ କୁମାର ଶର୍ମାଙ୍କ ନାମ ରୁଜୁ କରାଯାଇଥିଲା। ଦୁଇ ବର୍ଷ ଧରି ମାମଲାର ତଦନ୍ତ କରିବା ପରେ ପ୍ରମାଣ ନ ମିଳିବା କାରଣରୁ ମଙ୍ଗଳବାର ମାମଲାକୁ ବନ୍ଦ କରିବାକୁ ନିଷ୍ପତ୍ତି ନେଇଛି। ଗତ ଡିସେମ୍ବର ୨୩ରେ ସିବିଆଇ ପକ୍ଷରୁ ଦାଖଲ କରାଯାଇଥିବା ଅନ୍ତିମ ରିପୋର୍ଟରେ ପ୍ରମାଣ ମିଳି ନ ଥିବା ଉଲ୍ଲେଖ କରାଯାଇଛି। ବର୍ତ୍ତମାନ ମାମଲା ବନ୍ଦ କରାଯିବ କି ନାହିଁ ତାହା କୋର୍ଟଙ୍କ ନିଷ୍ପତ୍ତି ଉପରେ ନିର୍ଭର କରିବ। ପୂର୍ବରୁ ସିବିଆଇ ପକ୍ଷରୁ ଦାଖଲ କରାଯାଇଥିବା ଏଫ୍ଆଇଆରରେ ଅଭିଯୁକ୍ତମାନେ ପାକିସ୍ତାନୀ ନମ୍ବର ବ୍ୟବହାର କରୁଥିବା କହିଥିଲେ। ଏପରି କି ଅନେକ ବେନାମୀ ଆକାଉଣ୍ଟ ଜରିଆରେ ଲକ୍ଷ ଲକ୍ଷ ଟଙ୍କାର ଦେଣନେଣ ହୋଇଥିବା ଏଫ୍ଆଇଆରରେ ଉଲ୍ଲେଖ କରାଯାଇଥିଲା। ଦିଲୀପ କୁମାର ଏକାଧିକ ଆକାଉଣ୍ଟ ଜରିଆରେ ୪୩ ଲକ୍ଷ ଟଙ୍କାର ଦେଣନେଣ କରିଥିବା ବେଳେ ଗୁରମ ସତୀଶ ୬ଟି ଆକାଉଣ୍ଟରୁ ୪.୫୫ କୋଟି ଓ ଗୁରମ ବାସୁ ୫.୩୭ କୋଟି ଟଙ୍କାର ହେରଫେର କରିଥିଲେ।
