ଭବାନୀପାଟଣା,୧୦।୧୨(ଉତ୍ତମ କୁମାର ଦାଶ)ଧାନଚାଷ ପରି ବର୍ଷାରେ ଭିଜିଯାଇଛି ମାଣ୍ଡିଆ ଫସଲ। ନଷ୍ଟ ହେବାର ଆଶଙ୍କା ଥିବାରୁ କଳାହାଣ୍ଡି ଜିଲାରେ ମାଣ୍ଡିଆ ଚାଷ କରିଥିବା ଚାଷୀ ଚିନ୍ତିତ ହୋଇପଡ଼ିଛନ୍ତି। ବଙ୍ଗୋପସାଗରରେ ସୃଷ୍ଟି ହୋଇଥିବା ଲଘୁଚାପ ଯୋଗୁ ପାହାଡିଆ ଅଞ୍ଚଳରେ ହୋଇଥିବା ଚାଷ ବେଶ ପ୍ରଭାବିତ ହେଇଛି। ବିଶେଷକରି ପାହାଡିଆ ଅଞ୍ଚଳରେ ହେଉଥିବା ମାଣ୍ଡିଆ, କୋଶଲା, ସୋରିଷ, ଅଳସୀ, କାଙ୍ଗୁ, କାନ୍ଦୁଲ ଭଳି ବିଭିନ୍ନ ଖାଦ୍ୟ ଏବଂ ଡାଲି ଜାତୀୟ ଶସ୍ୟ ଉପରେ ପ୍ରତିକୂଳ ପ୍ରଭାବ ପକାଇଛି। ସରକାର ଏବେ ମାଣ୍ଡିଆ ଚାଷ ଉପରେ ବେଶି ଗୁରୁତ୍ୱ ଦେଉଥିବାରୁ କଳାହାଣ୍ଡି ଜିଲା ଥୁଆମୂଳ ରାମପୁର ଅଞ୍ଚଳର ଚାଷୀମାନେ ଭଲ ବିକ୍ରି ହେବା ଆଶାରେ ପ୍ରାୟ ୮୨୪୫ ହେକ୍ଟର ଜାଗାରେ ମାଣ୍ଡିଆ ଚାଷ କରିଥିଲେ। କିନ୍ତୁ ଅଦିନିଆ ବର୍ଷାରେ ଭିଜି ଏହି ଚାଷ ସବୁ ନଷ୍ଟ ହେବାରେ ଲାଗିଲାଣି। ଥୁଆମୂଳ ରାମପୁର ବ୍ଲକର କୋଷାବରା ଅଞ୍ଚଳରେ ଏହାର ପ୍ରଭାବ ବେଶୀ ଦେଖିବାକୁ ମିଳିଛି। ଜଙ୍ଗଲୀ ଜନ୍ତୁ ଓ ଗୋରୁଙ୍କଠାରୁ ଚାଷକୁ ବଞ୍ଚାଇବାକୁ ଯାଇ ଚାଷୀ ମାସ ମାସ ଧରି ଜଙ୍ଗଲ ପାହାଡ଼ ଉପରେ ଜଗି ବସୁଥିଲେ। ଯେଉଁ ଚାଷକୁ ଏତେ କଷ୍ଟରେ ବଞ୍ଚାଇ ରଖିଥିଲେ ଆଜି ସେହି ଫସଲ ଉଜୁଡି ଯାଇଛି। ପୂର୍ବରୁ ସୂଚନା ପାଇ ଫସଲ କାଟି ଅମଳ କରିବାକୁ ଉଦ୍ୟମ କରୁଥିବାବେଳେ ଖଳାରେ ଭିଜି ନଷ୍ଟ ହେବାକୁ ବସିଲାଣି। ଅନେକ ଚାଷୀଙ୍କ ବର୍ଷକର ଅମଳ ଉଜୁଡ଼ି ଯାଇଥିବାରୁ ସେମାନେ ଭାଙ୍ଗିପଡ଼ିଛନ୍ତି। ଏସବୁ ଫସଲରୁ ଉତ୍ପନ୍ନ ଖାଦ୍ୟ ଏହି ଅଞ୍ଚଳର ଲୋକଙ୍କ ପେଟକୁ ଆହାର ଯୋଗାଉଥିବାବେଳେ କଣ ଖାଇବେ ଭାବି ହେଉଛନ୍ତି। ଏହି ଫସଲ ମଧ୍ୟ ରୋଜଗାରର ମାଧ୍ୟମ ହୋଇଥିବାବେଳେ ଏହା ନଷ୍ଟ ହେବା ପରେ ଚଳିବେ କେମିତି ବୋଲି କେତେଜଣ ଚାଷୀ କହିଛନ୍ତି। ପ୍ରଶାସନ କେବଳ ଧାନ ଚାଷ କରୁଥିବା ଚାଷୀଙ୍କୁ ଗୁରୁତ୍ୱ ନ ଦେଇ ବରଂ ଏହି ପାହାଡ ଅଞ୍ଚଳରେ ହେଉଥିବା ମାଣ୍ଡିଆ, ଡାଲି ଜାତୀୟ ଶସ୍ୟ ଚାଷ କରୁଥିବା ଚାଷୀମାନଙ୍କ ଉପରେ ନଜର ଦେବା ପାଇଁ ଦାବି କରିଛନ୍ତି ଅନେକ ଚାଷୀ।
