ଲକ୍ଷ୍ନୌ, ୧ା୪: ଆଇପିଏଲ ୨୦୨୬ରେ ଦିଲ୍ଲୀ କ୍ୟାପିଟାଲ୍ସ ବିଜୟ ଅଭିଯାନ ଆରମ୍ଭ କରିଛି। ଲକ୍ଷ୍ନୌ ସୁପର ଜାଏଣ୍ଟସ (LSG) ବିପକ୍ଷ ମ୍ୟାଚରେ ଦିଲ୍ଲୀ ୧୪୨ ରନର ଲକ୍ଷ୍ୟକୁ ସହଜରେ ହାସଲ କରି ନେଇଛି। ତେବେ ୨୦୨୩ ପରଠାରୁ ଦିଲ୍ଲୀ ଏପର୍ଯ୍ୟନ୍ତ ଲକ୍ଷ୍ନୌ ବିପକ୍ଷରେ ଗୋଟିଏ ବି ମ୍ୟାଚ ହାରି ନ ଥିବା ବେଳେ ଏହା ଦିଲ୍ଲୀର ଲଗାତାର ୫ମ ବିଜୟ।
ମ୍ୟାଚ୍ରେ ଟସ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲା ଦିଲ୍ଲୀ। ଲକ୍ଷ୍ନୌ ଦଳ ୧୮.୪ ଓଭରରେ ମାତ୍ର ୧୪୧ ରନ୍ କରି ଅଲଆଉଟ୍ ହୋଇଯାଇଥିଲା। ଲୁଙ୍ଗି ଏନଗିଡି ଓ ଟି. ନଟରାଜନ ଉଭୟ ୩ଟି ଲେଖାଏ ଉଇକେଟ ନେଇ ଲକ୍ଷ୍ନୌ ବ୍ୟାଟିଂ ମେରୁଦଣ୍ଡ ଭାଙ୍ଗି ଦେଇଥିଲେ। ସେହିଭଳି କୁଲଦୀପ ଯାଦବ ୨ଟି ଗୁରୁତ୍ୱପୂର୍ଣ୍ଣ ଉଇକେଟ ହାସଲ କରିଥିଲେ। ଲକ୍ଷ୍ନୌ ପକ୍ଷରୁ ଅବଦୁଲ ସମଦ (୩୬) ଏବଂ ମିଚେଲ ମାର୍ଶ (୩୫) କିଛି ସମୟ ଲଢ଼େଇ କରିଥିଲେ ମଧ୍ୟ ବଡ଼ ସ୍କୋର କରିବାରେ ବିଫଳ ହୋଇଥିଲେ।
୧୪୨ ରନର ପିଛା କରୁଥିବା ଦିଲ୍ଲୀର ଆରମ୍ଭ ଅତ୍ୟନ୍ତ ଖରାପ ଥିଲା। ମାତ୍ର ୨୬ ରନରେ ୪ ଉଇକେଟ ହରାଇ ଦଳ ସଙ୍କଟରେ ପଡ଼ିଥିଲା। ଏହି ସମୟରେ ’ଇମ୍ପାକ୍ଟ ପ୍ଲେୟାର’ ଭାବେ ମଇଦାନକୁ ଓହ୍ଲାଇଥିଲେ ଯୁବ ତାରକା ସମୀର ରିଜଭୀ ସେ ମାତ୍ର ୪୭ଟି ବଲ୍ରୁ ୭୦ ରନ ଖେଳିଥିଲେ (୫ ଚୌକା, ୪ ଛକା)। ଟ୍ରିଷ୍ଟାନ ଷ୍ଟବ୍ସ (୩୯)ଙ୍କ ସହ ମିଶି ସେ ପଞ୍ଚମ ଉଇକେଟ ପାଇଁ ୧୧୯ ରନର ବିଜୟୀ ଭାଗିଦାରୀ କରିଥିଲେ।
ଦିଲ୍ଲୀ କ୍ୟାପିଟାଲ୍ସ ୧୭.୧ ଓଭରରେ ମାତ୍ର ୪ ଉଇକେଟ ହରାଇ ଲକ୍ଷ୍ୟ ହାସଲ କରିନେଇଥିଲା। ଏହି ବିଜୟ ସହ ଦିଲ୍ଲୀ ଚଳିତ ସିଜନରେ ନିଜର ଖାତା ଖୋଲିଛି।
