ଆଜି ହେଉଛି ଆଲୋକର ପର୍ବ ଦୀପାବଳି । ସଭିଙ୍କ ମନରେ ଭରି ରହିଛି ଆନନ୍ଦ। କିଏ ଦୀପ ଓ ଭଳିକି ଭଳି ରଙ୍ଗିନ୍ ଆଲୋକରେ ଘର ସଜାଉଛନ୍ତି ତ ଆଉ କିଏ ବାଣ ଫୁଟାଇବାକୁ ନେଇ ବେଶ୍ ଉତ୍କଣ୍ଠିତ। ତେବେ ଏମିତି ବି କିଛି ଯୁବତୀଯୁବକ ଅଛନ୍ତି, ଯେଉଁମାନେ ଏସବୁ ପରିବର୍ତ୍ତେ ଏକାଠି ହୋଇ ନିରାପଦ ଦୀପାବଳି ଲାଗି ଜନସଚେତନତା ସୃଷ୍ଟି କରିବା ହେଉ ଅବା ଏହି ଖୁସି ମୁହୂର୍ତ୍ତରୁ ବଞ୍ଚତ୍ତ ହେଉଥିବା ଲୋକଙ୍କ ମୁହଁରେ ହସ ଫୁଟାଇବାରେ ସାଉଁଟୁଛନ୍ତି ଆନନ୍ଦ। ସେମାନେ ହେଉଛନ୍ତି ରାଜ୍ୟର ଅଗ୍ରଣୀ ସ୍ବେଚ୍ଛାସେବୀ ସଂଗଠନ ଜୟ ଜଗନ୍ନାଥ ଗ୍ରୁପ୍, ଓଡ଼ିଶାର ସଦସ୍ୟାସଦସ୍ୟମାନେ। ବ୍ରହ୍ମପୁରରୁ ଆରମ୍ଭ ହୋଇ ଦୀର୍ଘ ୯ବର୍ଷ ଧରି ରାଜ୍ୟର ୧୩ଟି ଜିଲାରେ ସେବା ଯୋଗାଇ ଦେଇ ଆସୁଛି ଏହି ସଂଗଠନ, ଯେଉଁଥିରେ ବର୍ତ୍ତମାନ ସଦସ୍ୟ ସଂଖ୍ୟା ୭ଶହରୁ ଊର୍ଦ୍ଧ୍ୱ। ଓଡ଼ିଆଙ୍କ ପରମ୍ପରା ଓ ପର୍ବପର୍ବାଣିମାନଙ୍କରେ ଲୋକଙ୍କୁ ସଚେତନ କରାଇବା ସହ ଅନେକ ଅସହାୟ ପରିବାରଙ୍କୁ ସାହାଯ୍ୟ ସହଯୋଗ ଯୋଗାଇ ଦେଇ କୁନି କୁନି ଶିଶୁ ବୃଦ୍ଧ ବୃଦ୍ଧାମାନଙ୍କ ମୁହଁରେ ହସ ଫୁଟାଇ ଥାଆନ୍ତି ସଦସ୍ୟମାନେ। କଟକ ଜିଲା ଫୁଲନଖରାସ୍ଥିତ ବ୍ରାହ୍ମଣଝରିଲୋରେ ରହିଛି ସଂଗଠନର ଶ୍ରୀମନ୍ଦିର ସେବାଶ୍ରମ ନାମରେ ଏକ ବୃଦ୍ଧାଶ୍ରମ। ରାସ୍ତାକଡ଼ରୁ ଅତି ଦୟନୀୟ ଅବସ୍ଥାରୁ ବୃଦ୍ଧାବୃଦ୍ଧମାନଙ୍କୁ ଉଦ୍ଧାର କରି ଆଶ୍ରମରେ ରହିବାର ବ୍ୟବସ୍ଥା କରାଯାଇଛି। ପ୍ରତ୍ୟେକ ବର୍ଷ ଭଳି ଚଳିତବର୍ଷ ବି ଆଲୋକର ପର୍ବ ଦୀପାବଳିକୁ ଖୁବ୍ ହସଖୁସିରେ ଆଶ୍ରମର ବୃଦ୍ଧ ମାଆବାପାମାନଙ୍କ ସହ ପାଳନ କରିବେ ସଂଗଠନର ସଦସ୍ୟାସଦସ୍ୟମାନେ। ସେମାନଙ୍କ ପାଇଁ ନୂତନ ବସ୍ତ୍ର, ପିଠାପଣା ସହ ପୂଜା କରିବାର ସମସ୍ତ ବ୍ୟବସ୍ଥା ମଧ୍ୟ ଆୟୋଜନ କରାଯାଇଛି। ସେଠାରେ ସଭିଏଁ ଏକାଠି ଦେଶ ଓ ରାଜ୍ୟର ମଙ୍ଗଳ ପାଇଁ ଦୀପ ଲଗାଇ ଭଗବାନଙ୍କୁ ପ୍ରାର୍ଥନା କରିବେ। ଏହାବ୍ୟତୀତ ବସ୍ତିଅଞ୍ଚଳରେ ରହୁଥିବା ଅଭାବୀ କୁନି କୁନି ପିଲାମାନଙ୍କୁ ଦୀପାବଳିରେ ଖୁସି ଦେବା ପାଇଁ ନୂତନ ବସ୍ତ୍ର, ଶୀତବସ୍ତ୍ର, ଚପଲ ଓ ସ୍କୁଲ୍ ବ୍ୟାଗ୍, ବହି ଖାତା ଓ ମିଠା ଏହିପରି ଅନେକ ଆବଶ୍ୟକ ସାମଗ୍ରୀ ଯୋଗାଇ ଦେବାକୁ ଯୋଜନା ରଖିଛନ୍ତି।
