ଭଦ୍ରକ,୧୮।୧୦ (ସନାତନ ରାଉତ): ଚଳିତବର୍ଷ ଭଦ୍ରକ ଗାନ୍ଧୀପଡ଼ିଆ ସାର୍ବଜନୀନ ଦୁର୍ଗାପୂଜା ୭୬ବର୍ଷରେ ପଦାର୍ପଣ କରୁଛି। ଆଉ ଦୁଇଦିିନ ପରେ ସପ୍ତମୀ ପୂଜା ଆରମ୍ଭ ହେବାକୁ ଥିବାବେଳେ ମା’ଙ୍କ ମୃଣ୍ମୟୀ ମୂର୍ତ୍ତି ଓ ପାର୍ଶ୍ୱମୂର୍ତ୍ତି ନିର୍ମାଣ ଶେଷ ପର୍ଯ୍ୟାୟରେ ପହଞ୍ଚତ୍ଛି। ବାଲେଶ୍ୱର ଜିଲା ବାହାନଗାରେ ଘଟିଥିବା ଭୟଙ୍କର ରେଳ ଦୁର୍ଘଟଣାର ଦୃଶ୍ୟ ଏଥର ପୂଜା ମଣ୍ଡପରେ ଦେଖିବାକୁ ମିଳିବ ବୋଲି କମିଟି ପକ୍ଷରୁ କୁହାଯାଇଛି। ରେଳ ଦୁର୍ଘଟଣାର ଛାତିଥରା ଦୃଶ୍ୟ ଓ ଆହତମାନଙ୍କୁ ଉଦ୍ଧାର କାର୍ଯ୍ୟକୁ ପାର୍ଶ୍ୱମୂର୍ତ୍ତି ଭାବେ ଶିଳ୍ପୀ ଉତ୍ତରବାହିନୀର ଦାମୋଦର ନାୟକ ନିଖୁଣ ଭାବେ ଗଢ଼ିଛନ୍ତି।
ଖୁବ୍ ଆଡ଼ମ୍ବରରେ ଅନୁଷ୍ଠିତ ହେବାକୁ ଥିବା ଏହି ପୂଜାର ବଜେଟ ସାଢ଼େ ୪ଲକ୍ଷ ଟଙ୍କା ରହିଛି। ମା’ ଦୁର୍ଗାଙ୍କ ମୂର୍ତ୍ତିର ଉଚ୍ଚତା ୮ ଫୁଟ୍ ରଖାଯାଇଥିବା ବେଳେ ତୋରଣ ଓ ଆଲୋକ ସଜ୍ଜା ଉପରେ ଗୁରୁତ୍ୱ ଦିଆଯାଇଛି। ଚଳିତବର୍ଷ ଏହି ପୂଜାକୁ ସହଯୋଗ କରି ଆସୁଥିବା ମୂର୍ତ୍ତି କାରିଗରଠାରୁ ଆରମ୍ଭ କରି ବିଭିନ୍ନ ସଦସ୍ୟଙ୍କୁ ସମ୍ମାନିତ କରାଯିବ ବୋଲି କମିଟି ପକ୍ଷରୁ ସୂଚନା ଦିଆଯାଇଛି। ସପ୍ତମୀଠାରୁ ଦଶହରା ପର୍ଯ୍ୟନ୍ତ ପ୍ରତି ସନ୍ଧ୍ୟାରେ ଭଜନ, ସୁଗମ ସଙ୍ଗୀତ, ମୋଗଲ ତାମସା ଆଦି ପରିବେଷଣ କରାଯିବାର କାର୍ଯ୍ୟକ୍ରମ ରହିଛି।
୧୯୨୮ରେ କାମାକ୍ଷା ଚରଣ ଘୋଷ ନିଜ ଘରେ ଦୁର୍ଗାପୂଜା ଆରମ୍ଭ କରିଥିଲେ। ପରେ ଏହି ଘରୋଇ ପୂଜା ସାର୍ବଜନୀନ ପୂଜାର ରୂପ ନେଇଥିଲା। ୧୯୪୮ରେ ଗାନ୍ଧୀପଡ଼ିଆ, ନରିପୁର, ନୂଆବଜାର, ବଙ୍କସାହି ଓ ଚନ୍ଦନବଜାର ଅଞ୍ଚଳର ଅଧିବାସୀମାନଙ୍କ ସହଯୋଗରେ ଭଦ୍ରକରେ ସାଳନ୍ଦୀ ନଦୀବନ୍ଧ ଶିମିଳିଗଛ ମୂଳରେ ସାର୍ବଜନୀନ ପୂଜା ଆରମ୍ଭ ହୋଇଥିଲା। ୧୯୫୭ରେ ନଦୀବନ୍ଧ କଡ଼ରୁ ଗାନ୍ଧୀପଡ଼ିଆ ମଣ୍ଡପକୁ ପୂଜା ସ୍ଥାନାନ୍ତର ହୋଇଥିଲା। ୧୯୬୦ରେ ସିମେଣ୍ଟର ପୂଜା ମଣ୍ଡପ ନିର୍ମାଣ ଆରମ୍ଭ ହୋଇ ୧୯୭୧ରେ ଛାତ ପଡ଼ିଥିଲା। ଏହି ପୂଜାକୁ ଆରମ୍ଭ କରିଥିବା ଦୀନବନ୍ଧୁ ମିତ୍ର, ଡା. ନିହାର ଚନ୍ଦ୍ର ଘୋଷ, ସତୀଶ ଦେ, ବଳରାମ ସାହୁ, ରାମଚନ୍ଦ୍ର ସାହୁ, ପ୍ରାଣକୃଷ୍ଣ ବିଶ୍ୱାଳ, ମଦନଲାଲ ଶର୍ମା, ରଘୁନାଥ କର, ରାମଟାଲ ସିଂ, ମୁଳଚାନ୍ଦ ହୀରାଲାଲ, ଶେଖ୍ ସାଦତ ଅଲ୍ଲୀ, ମୁରଲୀ ମନୋହର ପ୍ରଭୁ ଦୟାଲ, ସୁବାସ ଦେ, ସାନନ୍ଦ ପ୍ରସାଦ ସାହୁ, ରାମେଶ୍ୱର ଲାଲ ଗୁପ୍ତା ସମସ୍ତେ ପରଲୋକ ଗମନ କରିସାରିଛନ୍ତି। ଗତବର୍ଷ ୭୫ବର୍ଷ ପୂର୍ତ୍ତିକୁ ସ୍ମରଣୀୟ କରିବାକୁ କମିଟି ପକ୍ଷରୁ ସହରର ଅନ୍ୟ ୧୬ଟି ସାର୍ବଜନୀନ ପୂଜା ମଣ୍ଡପରୁ ମାଟି ସଂଗ୍ରହ କରାଯାଇ ମା’ଙ୍କର ମୃଣ୍ମୟୀ ମୂର୍ତ୍ତି ଗଢ଼ାଯାଥିଲା। ତେବେ ପ୍ରତିବର୍ଷ ପୂଜାରେ ଆୟବ୍ୟୟର ହିସାବ ସାର୍ବଜନୀନ କରାଯାଉଛି। ନୂଆବଜାର ବ୍ୟବସାୟୀ, ସ୍ଥାନୀୟ ଅଧିବାସୀଙ୍କ ସମର୍ଥନ ଓ ସହଯୋଗରେ ଏହି ପୂଜା ୭୬ ବର୍ଷରେ ପହଞ୍ଚତ୍ପାରିଛିି ବୋଲି କମିଟି ସଭାପତି ସୌମାଭ କୁମାର ଦେ ଓ ସାଧାରଣ ସମ୍ପାଦକ ସଞ୍ଜୟ କୁମାର ଗୁପ୍ତା କହିଛନ୍ତି।
