ବେଙ୍ଗାଲୁରୁ,୧।୧୦: ଗାଡ଼ି ଦୁର୍ଘଟଣା ମାମଲାରେ କନ୍ନଡ ଅଭିନେତା ନାଗଭୂଷଣଙ୍କୁ ପୋଲିସ ଗିରଫ କରିଛି। ମିଳିଥିବା ସୂଚନା ମୁତାବକ, ବେଙ୍ଗାଲୁରୁର ଏକ ରାସ୍ତା ଫୁଟପାଥରେ ଚାଲୁଥିବା ଦମ୍ପତିଙ୍କ ଉପରେ ନାଗଭୂଷଣଙ୍କ କାର୍ ମାଡ଼ି ଯାଇଥିଲା। କାର ଦୁର୍ଘଟଣାରେ ମହିଳାଜଣଙ୍କର ମୃତ୍ୟୁ ଘଟିଥିବା ବେଳେ ତାଙ୍କ ସ୍ବାମୀ ଗୁରୁତର ଅବସ୍ଥାରେ ହସ୍ପିଟାଲରେ ଏବେବି ଚିକିତ୍ସିତ ହେଉଛନ୍ତି। ଏନେଇ ସ୍ଥାନୀୟ ଟ୍ରାଫିକ ପୋଲିସ ଥାନାରେ ଏକ ଅଭିଯୋଗ ହୋଇଥିଲା। ଏନେଇ ପୋଲିସ ଏକ ଦୁର୍ଘଟଣା ମାମଲା ରୁଜୁ କରି ତଦନ୍ତ କରିଥିଲା। ପୋଲିସ ତଦନ୍ତ ପରେ ଅଭିନେତା ନାଗଭୂଷଣଙ୍କୁ ଗିରଫ କରିଛି।
ସୂଚନା ଯୋଗ୍ୟ, ନାଗଭୂଷଣ ଶନିବାର ରାତିରେ ବସନ୍ତପୁରା ରାସ୍ତାରେ କାର୍ ଚଳାଉଥିଲେ। ସେତିକିବେଳେ ଫୁଟ୍ପାଥରେ ଚାଲୁଥିବା ଉକ୍ତ ଦମ୍ପତିଙ୍କ ଉପରକୁ କାର୍ ଚଢିଯାଇଥିଲା। ଦୁର୍ଘଟଣାରେ ପ୍ରେମା(୪୮)ଙ୍କ ମୃତ୍ୟୁ ଘଟିଥିବା ବେଳେ କୃଷ୍ଣା(୫୮)ଙ୍କ ମୁଣ୍ଡ ଏବଂ ପାଦରେ ଗଭୀର ଆଘାତ ଲାଗିଛି। ଅନ୍ୟପକ୍ଷେ ଅଭିନେତା ନିଜେ ଗାଡ଼ିରେ ଦୁହିଁଙ୍କୁ ଡାକ୍ତରଖାନା ନେଇଥିବା କୁହାଯାଉଛି।
