ଭୋପାଳ,୨୭।୮: ମଧ୍ୟ ପ୍ରଦେଶ ମୁଖ୍ୟମନ୍ତ୍ରୀ ଶିବରାଜ ସିଂ ଚୌହାନ ନିର୍ବାଚନ ବର୍ଷରେ ପ୍ରିୟ ଭଉଣୀମାନଙ୍କ ପାଇଁ ଉପହାରର ବାକ୍ସ ଖୋଲିଛନ୍ତି। ମୁଖ୍ୟମନ୍ତ୍ରୀ ରବିବାର ତାଙ୍କ ସରକାରଙ୍କ ‘ଲାଡଲି ବେହନା’ ଯୋଜନା ଅଧୀନରେ ଆୟୋଜିତ ଏକ ସମ୍ମିଳନୀରେ ଘୋଷଣା କରିଛନ୍ତି ଯେ ଶ୍ରାବଣ ମାସରେ ରନ୍ଧନ ଗ୍ୟାସ ସିଲିଣ୍ଡର ମାତ୍ର ୪୫୦ ଟଙ୍କାରେ ଉପଲବ୍ଧ ହେବ। ଏହା ସହିତ ରାକ୍ଷୀ ପୂର୍ଣ୍ଣିମା ପାଇଁ ୨୫୦ଟଙ୍କା ଦେବାକୁ ଘୋଷଣା କରାଯାଇଛି। ରାଜ୍ୟର ମହିଳାମାନେ ପ୍ରତି ମାସରେ ଗ୍ରହଣ କରୁଥିବା ରାଶିର ପରିମାଣକୁ ୧୨୫୦ଟଙ୍କାକୁ ବୃଦ୍ଧି କରାଯାଇଛି। ଏହାପୂର୍ବରୁ ଲାଡଲି ବେହନା ଯୋଜନାର ସୁଯୋଗ ନେଇଥିବା ମହିଳାମାନଙ୍କୁ ପ୍ରତି ମାସରେ ଏକ ହଜାର ଟଙ୍କା ଦିଆଯାଉଥିଲା। ଲାଡଲି ବେହନା ସମ୍ମିଳନୀରେ ଶିବରାଜ କହିଛନ୍ତି ଯେ ରାଜ୍ୟରେ ନିଶା ସେବନକୁ ରୋକିବା ପାଇଁ ସେ ଆସନ୍ତା ବର୍ଷ ଠାରୁ ଏକ ନୂତନ ମଦ ନୀତି ପ୍ରସ୍ତୁତ କରିବାକୁ ଘୋଷଣା କରିଛନ୍ତି। ଯେଉଁଠାରେ ଭଉଣୀମାନେ ଚାହାଁନ୍ତି ନାହିଁ, ମଦ ଦୋକାନ ଖୋଲିବ ନାହିଁ ।
ସଂରକ୍ଷଣ ସମ୍ପର୍କରେ ଏକ ବଡ ଘୋଷଣା କରି ମୁଖ୍ୟମନ୍ତ୍ରୀ କହିଛନ୍ତି ଯେ ବର୍ତ୍ତମାନ ପର୍ଯ୍ୟନ୍ତ ପୋଲିସ ବିଭାଗର ମହିଳାମାନେ ୩୦ ପ୍ରତିଶତ ସଂରକ୍ଷଣ ପାଉଥିଲେ, କିନ୍ତୁ ଆସନ୍ତା ବର୍ଷ ଠାରୁ ଏହା ୩୫ ପ୍ରତିଶତକୁ ବୃଦ୍ଧି ପାଇବ। ସେ ଆହୁରି ମଧ୍ୟ କହିଛନ୍ତି ଯେ ଶିକ୍ଷକ ନିଯୁକ୍ତିରେ ମହିଳାଙ୍କ ପାଇଁ ୫୦ପ୍ରତିଶତ ସଂରକ୍ଷଣ କରାଯିବ। ଏହା ବ୍ୟତୀତ ସରକାରୀ ନିଯୁକ୍ତିରେ ମହିଳାଙ୍କ ପାଇଁ ୩୫ ପ୍ରତିଶତ ସଂରକ୍ଷଣ ବ୍ୟବସ୍ଥା କରାଯିବ।
