ପୁଣେ,୧୩।୮: ମହାରାଷ୍ଟ୍ରର ସାଙ୍ଗୋଲାରେ ଜାତୀୟତାବାଦୀ କଂଗ୍ରେସ ଦଳର ପ୍ରତିଷ୍ଠାତା ଶରଦ ପାୱାର ରାଜ୍ୟ ଉପମୁଖ୍ୟମନ୍ତ୍ରୀ ଅଜିତ ପାୱାରଙ୍କ ସହ ଆୟୋଜିତ ଗୁପ୍ତ ବୈଠକ ସମ୍ପର୍କରେ ଏକ ବଡ଼ ବିବୃତ୍ତି ଦେଇଛନ୍ତି। ସେ କହିଛନ୍ତି ଯେ, କିଛି ଶୁଭଚିନ୍ତକ ମୋତେ ବୁଝାଇବା ପାଇଁ ଚେଷ୍ଟା କରୁଛନ୍ତି, କିନ୍ତୁ ମୁଁ କେବେବି ଭାଜପା ସହିତ ଯିବି ନାହିଁ। ଅଜିତ ପାୱାରଙ୍କ ସହ ମୋର ସାକ୍ଷାତ ଲୁଚାଛପା ନୁହେଁ। ସେ ମୋର ପୁତୁରା ଏବଂ ମୁଁ ପରିବାରର ବରିଷ୍ଠ ସଦସ୍ୟ।
ଏହାପୂର୍ବରୁ ପୁଣେରେ ଶରଦ ପାୱାର ଏବଂ ଏନସିପିର ବିଦ୍ରୋହୀ ଦଳର ନେତା ଅଜିତ ପାୱାରଙ୍କ ମଧ୍ୟରେ ହୋଇଥିବା ସାକ୍ଷାତ ମହାରାଷ୍ଟ୍ରରେ ରାଜନୀତି ସରଗରମ ହୋଇଥିଲା। ଏନେଇ ଏନସିପି ରାଜ୍ୟ ୟୁନିଟ ସଭାପତି ଜୟନ୍ତ ପାଟିଲ କହିଛନ୍ତି,ଦଳର ପ୍ରତିଷ୍ଠାତା ଏବଂ ପୁତୁରାଙ୍କ ମଧ୍ୟରେ କ’ଣ ଘଟିଛି ସେ ଜାଣି ନାହାଁନ୍ତି ଏବଂ ଏହା ଗୁପ୍ତ ବୈଠକ ନୁହେଁ। ଶରଦ ପାୱାରଙ୍କ ନାତି ତଥା ଏନସିପି ବିଧାୟକ ରୋହିତ ପାୱାର ମଧ୍ୟ କହିଛନ୍ତି,ସେ ମଧ୍ୟ ଏଭଳି କୌଣସି ବୈଠକ ବିଷୟରେ ଅବଗତ ନୁହଁନ୍ତି, କିନ୍ତୁ ବୈଠକ ହୋଇଥିଲେ ମଧ୍ୟ ପରିବାର ମଧ୍ୟରେ ଯୋଗାଯୋଗ ବଜାୟ ରଖିବାରେ କିଛି ଭୁଲ ନାହିଁ।
ସୂଚନାନୁସାରେ, ଶନିବାର ପୁଣେରେ ଜଣେ ବ୍ୟବସାୟୀଙ୍କ ବାସଭବନରେ ଶରଦ ପାୱାର ଏବଂ ଅଜିତ ପାୱାରଙ୍କୁ ଭେଟିଥିଲେ। ଏହାପୂର୍ବରୁ ଗତ ମାସରେ ମହାରାଷ୍ଟ୍ରରେ ଅଜିତ ପାୱାର ଶରଦ ପାୱାରଙ୍କ ବିରୋଧରେ ବିଦ୍ରୋହ କରିଥିଲେ। ସେ ଶିବସେନା-ଭାଜପା ସରକାରରେ ଯୋଗଦେବାକୁ ନିଷ୍ପତ୍ତି ନେଇଥିଲେ ଏବଂ ଉପମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିଥିଲେ। ଅଜିତ ପାୱାରଙ୍କ ସହ ତାଙ୍କୁ ସମର୍ଥନ କରୁଥିବା ଆଠ ଜଣ ଏନସିପି ବିଧାୟକ ମଧ୍ୟ ମନ୍ତ୍ରୀ ଭାବରେ ଶପଥ ଗ୍ରହଣ କରିଥିଲେ।
