ଭୁବନେଶ୍ୱର,୧୦ା୮(ଅସମାପିକା ସାହୁ): ଜଳବାୟୁ ପରିବର୍ତ୍ତନରୁ ପରିବେଶ ପ୍ରତି ସୃଷ୍ଟି ହୋଇଥିବା ବିପଦକୁ ମୁକାବିଲା କରିବା ପାଇଁ ପ୍ରତିଟି ସ୍ତରରେ ପ୍ରତିବଦ୍ଧତାର ସହ ପ୍ରୟାସ ଆରମ୍ଭ ସ୍ବରୂପ ସରକାରୀ ବିଭାଗରେ ଏକ ବୃକ୍ଷ ଚାରାରେ ଜଳଦାନ ସହ ସଭା ଓ ଉତ୍ସବର ଶୁଭାରମ୍ଭ ଭଳି ଅଭିନବ ପଦକ୍ଷେପ ନିଆଯାଇଛି।
କୃଷି ଓ କୃଷକ ସଶକ୍ତିକରଣ ବିଭାଗ ଏବଂ ହସ୍ତତନ୍ତ, ବୟନ ଓ ହସ୍ତଶିଳ୍ପ ବିଭାଗରେ ଏହା କାର୍ଯ୍ୟକାରୀ ହେବ। ପରେ ସମବାୟ ବିଭାଗରେ କାର୍ଯ୍ୟକାରୀ କରିବାକୁ ପ୍ରମୁଖ ଶାସନ ସଚିବ ଡକ୍ଟର ଅରବିନ୍ଦ କୁମାର ପାଢ଼ୀ ବିଭାଗର ସମସ୍ତ ଅଧିକାରୀଙ୍କୁ ପତ୍ର ଲେଖିଛନ୍ତି।
ପରିବେଶ ସୁରକ୍ଷା ପ୍ରତି ଆମର ଦାୟିତ୍ୱ ଓ କର୍ତ୍ତବ୍ୟ ସମ୍ପର୍କରେ ଉଲ୍ଲେଖ କରି ଅନ୍ୟମାନଙ୍କୁ ପ୍ରୋତ୍ସାହିତ କରିବାକୁ ଏଭଳି ଏକ ପ୍ରୟାସ ନିମନ୍ତେ ସେ ଅନୁରୋଧ କରିଛନ୍ତି। ସେ ଲେଖିଛନ୍ତି, ବିଭାଗ ତରଫରୁ ହେଉଥିବା ସଭା ସମିତି, ମେଳା ଓ ମହୋତ୍ସବ ଆଦି କ୍ଷେତ୍ରରେ ପ୍ରାରମ୍ଭରେ କୁଣ୍ଡରେ ରଖାଯାଇଥିବା ଏକ ବୃକ୍ଷ ଚାରାରେ ଜଳଦାନ କରି ଏହାର ଶୁଭାରମ୍ଭ କରାଯିବ। ଚାରାରେ ଜଳଦାନ ସହ ସଭା ବା ଉତ୍ସବ ଶୁଭାରମ୍ଭ ହେଲା ପରେ ଯେତେବେଳେ କାର୍ଯ୍ୟକ୍ରମ ଶେଷ ହେଉଛି ସେତେବେଳେ ସେହି ବୃକ୍ଷ ଚାରାଟିକୁ ବିଭାଗର ଯେକୌଣସି ସ୍ଥାନରେ ଲଗାଇ ଦେବାକୁ ମଧ୍ୟ ସେ ଅନୁରୋଧ କରିଛନ୍ତି। ଏପରିକି ବିଭାଗରୁ ଅବସର ନେଉଥିବା ଜଣେ କର୍ମଚାରୀଙ୍କ ଦ୍ବାରା ଏହାକୁ ଲଗାଇବାକୁ ସେ କହିଛନ୍ତି।
