ଅନୁଗୋଳ/ତାଳଚେର, ୨୬।୬(ଅମିତ ସାମଲ/ମନୋଜ ନନ୍ଦ): ଉଛୁଳିଲା ଡ୍ରେନ୍। ରାସ୍ତାରେ ଚାଲିଲା ଆଣ୍ଠୁଏ ଉଚ୍ଚତାର ପାଣି। କେବଳ ସହରତଳି ଅଞ୍ଚଳ ନୁହେଁ, କେଇ ଘଣ୍ଟାରେ ଜଳାର୍ଣ୍ଣବ ହୋଇଗଲା ବ୍ୟସ୍ତବହୁଳ ସଡ଼କ। ଲଘୁଚାପଜନିତ ଲଗାଣବର୍ଷାରେ ରବିବାର ଅନୁଗୋଳ ସହରରେ ଦେଖିବାକୁ ମିଳିଥିଲା ଏଭଳି ଦୃଶ୍ୟ। ଡ୍ରେନେଜ୍ ଅବ୍ୟବସ୍ଥା, ନର୍ଦ୍ଦମାରେ ଜମି ରହିଥିବା କୁଢ଼ କୁଢ଼ ଆବର୍ଜନା ପାଇଁ ଏଭଳି ସ୍ଥିତି ସୃଷ୍ଟି ହୋଇଥିବା ବୁଦ୍ଧିଜୀବୀ ଅଭିଯୋଗ କରିଛନ୍ତି।
ଅନୁଗୋଳରେ ଶନିବାର ରାତିରୁ ଆରମ୍ଭ ହୋଇଯାଇଥିଲା ମୁଷଳଧାରାରେ ବର୍ଷା। ଦିନ ବଢ଼ିବା ସହିତ ଏହାର ପରିମାଣ ମଧ୍ୟ ବୃଦ୍ଧି ପାଇଥିଲା। ଫଳରେ ବ୍ରାହ୍ମଣଦେଈପଡ଼ା, ହେମସୁରପଡ଼ା, ଅମଲାପଡ଼ା, ରାଧାରମଣପଡ଼ା ସମେତ ତଳି ଅଞ୍ଚଳରେ ପାଣି ପଶିଯାଇଥିଲା। ସହରର ବ୍ୟସ୍ତବହୁଳ ସଡ଼କ କୁହାଯାଉଥିବା ବଜାର ଛକଠାରୁ-ଗାନ୍ଧୀ ମାର୍ଗ ଯାଏ ୩ ଫୁଟର ପାଣି ଚାଲିଥିଲା। ଫଳରେ ଯାନବାହନ ଚଳାଚଳ ବାଧାପ୍ରାପ୍ତ ହୋଇଥିଲା। ଶଙ୍କର ସିନେମା ରୋଡ୍ରେ ଅନୁରୂପ ସ୍ଥିତି ଦେଖିବାକୁ ମିଳିଥିଲା। ହେମସୁରପଡ଼ାରେ ସ୍ଥିତି ଏମିତି ହୋଇଥିଲା ଯେ, ବର୍ଷା ପାଣି ନିଷ୍କାସନ ହେବାକୁ ବାଟ ପାଇ ନ ଥିଲା। ପୌର କର୍ତ୍ତୃପକ୍ଷ ଜେସିବି ସହାୟତାରେ ରାସ୍ତା ଖୋଳିବା ପରେ ପାଣି ନିଷ୍କାସନ ହୋଇଥିଲା। ମୌସୁମୀ ଋତୁର ପ୍ରଥମ ବଡ଼ ବର୍ଷାରେ ସହରର ଏଭଳି ସ୍ଥିତି ପୌର ପ୍ରଶାସନର ଅପାରଗତାକୁ ପଦାରେ ପକାଇଛି। ତେଣୁ ତୁରନ୍ତ ପାଣି ଜମୁଥିବା ସ୍ଥାନଗୁଡ଼ିକୁ ଚିହ୍ନଟ କରି ବିକଳ୍ପ ବ୍ୟବସ୍ଥା ଗ୍ରହଣ କରିବାକୁ ସାଧାରଣରେ ଦାବି ହେଉଛି।
ଅନୁରୂପ ଭାବେ ତାଳଚେର ବ୍ଲକ ୨୦ନଂ. ଜିଲା ପରିଷଦ ଜୋନ୍ ମୁଣ୍ଡାବଜାର ଅନ୍ତର୍ଗତ ଦଳିତ ସାହିରେ ବର୍ଷା ପାଣି ଲୋକଙ୍କ ଘରେ ପଶିଛି। ଫଳରେ ସାହିବାସୀ ନାହିଁ ନ ଥିବା ସମସ୍ୟାର ସମ୍ମୁଖୀନ ହେଉଛନ୍ତି। ବନିୟା ସାହୁ, ବଳରାମ ନାଏକ, ଲକ୍ଷ୍ମୀ ମୁଖୀ, ଡଲି ଦାସ, ବାବୁଲି ନାଏକ, ମଙ୍ଗୁଳୁ ନାଏକ, ଲକ୍ଷ୍ମୀଧର ଜେନା, କମଳକାନ୍ତ ଜେନା, ଦୀପ୍ତିପ୍ରଭା ଜେନା, ରଞ୍ଜୁଲତା ନାଏକ, ସୀତା ନାଏକ, ଜଗବନ୍ଧୁ ଦାସ, ପବିତ୍ର ନାଏକ, ଲକି ନାଏକ, ଚିନ୍ମୟ ଜେନା, ଦାଶରଥୀ ନାଏକ, ବାରିଆ ନାଏକ, ଲିଙ୍ଗା ନାଏକଙ୍କ ଘରର ଆସବାବପତ୍ର ନଷ୍ଟ ହୋଇଯାଇଛି। ତଳିଆ ଅଞ୍ଚଳ ହୋଇଥିବାରୁ ଏଭଳି ସମସ୍ୟା ସୃଷ୍ଟି ହୋଇଥିବା ଜିଲା ପରିଷଦ ସଦସ୍ୟା ରୀତାରାଣୀ ଦାସ କହିଛନ୍ତି। କ୍ଷୟକ୍ଷତି ଆକଳନ କରି କ୍ଷତିଗ୍ରସ୍ତ ପରିବାରଙ୍କୁ ସରକାରୀ ସହାୟତା ଯୋଗାଇ ଦେବାକୁ ସେ ଦାବି କରିଛନ୍ତି।
