ଚଣ୍ଡିଖୋଲ,୭ା୬(ଡି.ଏନ.ଏ.): ଦର୍ପଣ ତହସିଲ ଅଧୀନରେ ବେଆଇନ ବାଲିଘାଟ ଚାଲିବା ନେଇ ଧରିତ୍ରୀରେ ଖବର ପ୍ରକାଶ ପରେ ମଙ୍ଗଳବାର ଭାରପ୍ରାପ୍ତ ତହସିଲଦାର ନିରଞ୍ଜନ ଗୁରୁ କେଲୁଅ ନଦୀର ବଡ଼ ବାଲିକୁଦା ଘାଟରେ ୧୪୪ ଧାରା ଜାରି କରିଛନ୍ତି। ଏଥିସହିତ ଆଦେଶନାମା ମିସ୍ କେସ୍ ନଂ.୧୦୨/୨୩ ଅନୁସାରେ ଖାତା ନଂ.୭୭୫, ପ୍ଲଟ ନଂ.୨୮୧୬ରେ ନାଲି ପତାକା ପୋତିଛନ୍ତି। ମୂଷାଟିକିରି ରାଜସ୍ବ ନିରୀକ୍ଷକଙ୍କୁ ଏହା ଉପରେ ନଜର ରଖିବାକୁ ନିର୍ଦ୍ଦେଶ ଦେଇଛନ୍ତି। ସେହିପରି ଏହି ତହସିଲ ଅଧୀନ ସୋଲରଠାରେ ୨ ବାଲି ବୋଝେଇ ହାଇୱା ଓ ଗୋଟିଏ ମାଙ୍କଡ଼ା ପଥର ବୋଝେଇ ଟ୍ରକ୍କୁ ଜବତ କରିଛନ୍ତି। ବେଆଇନ ଭାବେ ବାଲି ବୋଝେଇ କରି ଆସୁଥିବା ସମୟରେ ଛତିଆ-କଳକଳା ପୂର୍ତ୍ତ ବିଭାଗ ରାସ୍ତାରେ (ଓଡି-୦୫-ଡି-୭୭୩୩) ଓ (ଓଡି-୦୫-ଏଫ-୦୧୩୩) ବାଲି ବୋଝେଇ ହାଇୱାକୁ ଅଟକାଇ ସେ କାଗଜପତ୍ର ମାଗିଥିଲେ। ହେଲେ ଚାଳକମାନେ କୌଣସି କାଗଜ ପତ୍ର ଦେଖାଇ ନ ପାରିବାରୁ ଗାଡ଼ି ଦୁଇଟିକୁ ଜବତ କରି ବୈରୀ ଥାନା ପୋଲିସ ଜିମା ଦେଇଥିଲେ। ସେହିଭଳି ଏହି ରାସ୍ତାରେ ମାଙ୍କଡ଼ା ପଥର ବୋଝେଇ କରି ଆସୁଥିବା (ଓଆର୍-୦୯-ଏଫ୍-୦୫୧୬) ଟ୍ରକ୍କୁ ଅଟକାଇ କାଗଜ ପତ୍ର ମାଗିଥିଲେ। ମାତ୍ର ଚାଳକ କୌଣସି କାଗଜ ପତ୍ର ଦେଖାଇ ନ ପାରିବାରୁ ଭାରପ୍ରାପ୍ତ ତହସିଲଦାର ଟ୍ରକ୍ ଜବତ କରି ବୈରୀ ଥାନା ଜିମା ଦେଇଛନ୍ତି।
ସୂଚନା ଅନୁଯାୟୀ, ଏହି ତହସିଲ ଅନ୍ତର୍ଗତ ପଶ୍ଚିମ ବଡ଼ଚଣା କୁହାଯାଉଥିବା ବୈରୀ, ପାରିଆ, ସମିଆ ଓ ଶାଳପଡ଼ା ପଞ୍ଚାୟତର ବିଭିନ୍ନ ସ୍ଥାନରେ ବେଆଇନ ମାଙ୍କଡ଼ା ଓ ମୋରମ ପଥର ଖାଦାନ ଚାଲୁଛି। ଏଥିସହିତ ବିରୂପା, ଗେଙ୍ଗୁଟି ଓ କେଲୁଅ ନଦୀର ବିଭିନ୍ନ ସ୍ଥାନରେ ବେଆଇନ ବାଲିଘାଟ ଚାଲୁଛି। ଏ ସମ୍ପର୍କରେ ରାଜସ୍ବ ବିଭାଗ, ବନ ବିଭାଗ ଓ ପୋଲିସ ଜାଣିଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରା ଯାଉ ନ ଥିଲା। ଏନେଇ ମଙ୍ଗଳବାର ‘ବେଆଇନ ବାଲିଘାଟକୁ ନେଇ ବଢୁଛି ବିବାଦ’ ଶୀର୍ଷକ ଖବର ପ୍ରକାଶ ପାଇଥିଲା।
