ହାଇଦ୍ରାବାଦ, ୬ା୬: ଭାରତ ସଫଳତାର ସହ ଆପଣାଇଥିବା ଡିଜିଟାଲ ସ୍ବାସ୍ଥ୍ୟସେବା ପ୍ରଯୁକ୍ତି ସାରା ବିଶ୍ୱରେ ସ୍ବାସ୍ଥ୍ୟସେବା ବଢ଼ାଇବା ଦିଗରେ ଶିକ୍ଷା ଦେଇପାରିବ ବୋଲି ବିଶ୍ୱ ସ୍ବାସ୍ଥ୍ୟ ସଂଗଠନ (ଡବ୍ଲ୍ୟୁଏଚ୍ଓ) ପକ୍ଷରୁ ସୋମବାର କୁହାଯାଇଛି। ସବୁ ଦେଶ ଏହି ଟେକ୍ନୋଲୋଜି ଆପଣାଇବା ପାଇଁ ଆବଶ୍ୟକ ଭିତ୍ତିଭୂମି ପ୍ରସ୍ତୁତ କରିବାକୁ ହେବ ବୋଲି ଡବ୍ଲ୍ୟୁଏଚ୍ଓର ଡିଜିଟାଲ ହେଲ୍ଥ ଆଣ୍ଡ ଇନୋଭେଶନ ବିଭାଗର ନିର୍ଦ୍ଦେଶକ ଡ. ଆଲେନ୍ ଲାବ୍ରିକ୍ କହିଛନ୍ତି। ତୃତୀୟ ଜି୨୦ ହେଲ୍ଥ ଓ୍ବାର୍କିଂ ଗ୍ରୁପ୍ ବୈଠକର ଦ୍ୱିତୀୟ ଦିନରେ ‘ଡିଜିଟାଲ ହେଲ୍ଥ ଇନୋଭେଶନ ଆଣ୍ଡ ସଲ୍ୟୁଶନ ଟୁ ଏଡ୍ ୟୁନିଭର୍ସାଲ ହେଲ୍ଥ କଭରେଜ୍ ଆଣ୍ଡ ଇମ୍ପ୍ରୁଭ୍ ହେଲ୍ଥ କେୟାର ସର୍ଭିସ ଡେଲିଭରି’ ଉପରେ ଉଦ୍ବୋଧନ ଦେବା ଅବସରରେ ସେ ଏହା କହିଛନ୍ତି।
ଯେତେବେଳେ ଆମେ ଡିଜିଟାଲ ସ୍ବାସ୍ଥ୍ୟସେବା କଥା କହୁଛୁ, ସେତେବେଳେ ଆମେ ପ୍ରାଥମିକ ସ୍ବାସ୍ଥ୍ୟସେବା ବ୍ୟବସ୍ଥାର ସୁଦୃଢ଼ୀକରଣ, ଠିକ୍ ସମୟରେ ନିଷ୍ପତ୍ତି ନେବା ପାଇଁ ଆନୁଷଙ୍ଗିକ ଡେଟା ଏବଂ ସମ୍ବଳ ଉପରେ ହିଁ କହୁଛୁ। କେହି ଯେପରି ସ୍ବାସ୍ଥ୍ୟସେବାରୁ ବଞ୍ଚତ୍ତ ନ ହେବେ ତାହା ଉପରେ ମଧ୍ୟ ଗୁରୁତ୍ୱ ଦିଆଯାଉଛି। ଡିଜିଟାଲ ହେଲ୍ଥ ହିଁ ସାର୍ବଜନୀନ ସ୍ବାସ୍ଥ୍ୟସେବା ଲକ୍ଷ୍ୟ ହାସଲ କରିପାରିବ, ଏହା ପ୍ରମାଣିତ ହୋଇଥିବା ଡ. ଲାବ୍ରିକ୍ କହିଛନ୍ତି। ଡିଜିଟାଲ ହେଲ୍ଥ କ୍ଷେତ୍ରରେ ଭାରତ ନେତୃତ୍ୱ ନେଇଛି। ସବୁ ଦେଶ ଯେପରି ଏହାର ସଫଳତା ପାଇପାରିବେ, ସେଥିପାଇଁ ଉଦ୍ୟମ କରିବାକୁ ହେବ। କୋଭିଡ୍ ମହାମାରୀ ପରେ ସାରା ବିଶ୍ୱ ଡିଜିଟାଲ ସ୍ବାସ୍ଥ୍ୟସେବାକୁ ଗୁରୁତ୍ୱ ଦେଉଛି। ତେଣୁ ଭାରତ ଭଳି ଦେଶଠାରୁ ଏହାର ସଫଳତା ସମ୍ପର୍କରେ ଶିକ୍ଷାଲାଭ କରି ଏହାକୁ ଅନ୍ୟ ଦେଶଗୁଡ଼ିକ କାର୍ଯ୍ୟରେ ଲଗାଇବା ଆବଶ୍ୟକ ବୋଲି ଲାବ୍ରିକ୍ କହିଛନ୍ତି।
