କେନ୍ଦୁଝର,୪ା୫(ସ୍ବ.ପ୍ର.): ପ୍ରାଣୀ ଚିକିତ୍ସକଙ୍କ ୧୦ ଦଫା ଦାବିକୁ ନେଇ ଚାଲିଥିବା ଆନ୍ଦୋଳନ ଗୁରୁବାର ଚରମ ସୀମାରେ ପହଞ୍ଚିଛି। ସେମାନେ ଆଜି ଜିଲାପାଳଙ୍କ ଜରିଆରେ ମୁଖ୍ୟମନ୍ତ୍ରୀ ଏବଂ ଜିଲା ମୁଖ୍ୟ ପ୍ରାଣୀ ଚିକିତ୍ସାଧିକାରୀଙ୍କ ଦ୍ୱାରା ମତ୍ସ୍ୟ ଓ ପଶୁପାଳନ ବିଭାଗର ପ୍ରମୁଖ ଶାସନ ସଚିବଙ୍କୁ ଦାବିପତ୍ର ଦେଇ ସମୂହ ଇସ୍ତଫା ପ୍ରଦାନ କରିଛନ୍ତି। ଦାବି ପୂରଣ ନ ହେବାରୁ ସେମାନେ ବାଧ୍ୟ ହୋଇ ଏଭଳି ଚରମ ନିଷ୍ପତ୍ତି ନେଇଥିବା କହିଛନ୍ତି। ଆଜି ଡାକ୍ତର ବିଜୟ କୁମାର ସେଠୀ ଓ ଡାକ୍ତର ସୁଶାନ୍ତ କୁମାର ସିଂଙ୍କ ନେତୃତ୍ୱରେ ଦସ୍ତଖତ ସମ୍ବଳିତ ଇସ୍ତଫାପତ୍ର ପ୍ରଦାନ କରାଯାଇଛି। ଦୀର୍ଘଦିନର ଦାବିଗୁଡ଼ିକ ପ୍ରତି ସରକାରଙ୍କ ଚରମ ଅବହେଳା ପ୍ରତିବାଦରେ ଜିଲାର ପ୍ରାଣୀ ଚିକିତ୍ସକମାନେ ଫେବୃୟାରୀ ୧ରୁ କମ୍ପ୍ୟୁଟରୀକରଣ କାର୍ଯ୍ୟକଳାପ ବନ୍ଦ ଥିଲା। ସରକାର ସଂଘକୁ ଆଲୋଚନାକୁ ନ ଡାକି ଆକ୍ରୋଶମୂଳକ ଭାବେ ପଦକ୍ଷେପ ଗ୍ରହଣ କରିବାରୁ ଓଡ଼ିଶା ପ୍ରାଣୀ ଚିକିତ୍ସା ସେବା ସଂଘ ଏଭଳି ନିଷ୍ପତ୍ତି ନେଇଛନ୍ତି। କେନ୍ଦୁଝର ଜିଲାରେ ଥିବା ୪୦ ଜଣ ପ୍ରାଣୀସମ୍ପଦ ଡାକ୍ତର ସମୂହ ଇସ୍ତଫା ଦେଇଥିବାରୁ ଆଗାମୀ ଦିନରେ ପ୍ରାଣୀ ଚିକିତ୍ସା ଏକପ୍ରକାର ଠପ୍ ହେବା ପରିସ୍ଥିତି ସୃଷ୍ଟି କରିଛି। ଦାବିଗୁଡିକ ମଧ୍ୟରେ ବେତନ ଏବଂ କ୍ୟାରିୟର ଅଗ୍ରଗତି କ୍ଷେତ୍ରରେ ସ୍ବାସ୍ଥ୍ୟ ବିଭାଗରେ କାର୍ଯ୍ୟରତ ଏଲୋପାଥିକ ଡାକ୍ତରମାନଙ୍କ ସହିତ ସମ୍ପୂର୍ଣ୍ଣ ଭାବରେ ସମକକ୍ଷ କରିବା, କ୍ୟାଡର ପୁନର୍ଗଠନ, ପ୍ରାଣୀ ଚିକିତ୍ସା ବିଭାଗରେ ସେବା ଯୋଗାଣ କ୍ଷେତ୍ରରେ ବ୍ୟାପକ ରୂପାନ୍ତରଣ ଆଣିବାକୁ ପ୍ରାଣୀ ଚିକିତ୍ସକମାନେ ଦୀର୍ଘଦିନ ଧରି ଦାବି କରି ଆସୁଛନ୍ତି। ସାଂପ୍ରତିକ ଭେଟେନାରୀ କ୍ୟାଡରରେ ଗୁରୁତର ଅସଙ୍ଗତି ରହିଛି, ଯେଉଁଠାରେ ନୂଆ କରି ଯୋଗ ଦେଉଥିବା ପ୍ରାଣୀ ଚିକିତ୍ସକମାନେ ୨୫ବର୍ଷରୁ ଅଧିକ ସମୟ ପରେ ସେମାନଙ୍କ ପରବର୍ତ୍ତୀ ପଦୋନ୍ନତି ପାଇବେ ବୋଲି ପ୍ରାଣୀ ସମ୍ପଦ ଡାକ୍ତରମାନେ ଅଭିଯୋଗ କରିଛନ୍ତି।
