ନୂଆଦିଲ୍ଲୀ,୨୪।୪: ଆଫ୍ରିକୀୟ ଦେଶ ସୁଦାନରେ ସେନା ଏବଂ ସାମରିକ ବାହିନୀ ମଧ୍ୟରେ ଚାଲିଥିବା ବିବାଦରେ ଏ ପର୍ଯ୍ୟନ୍ତ ୪୦୦ରୁ ଅଧିକ ଲୋକ ପ୍ରାଣ ହରାଇଛନ୍ତି। ଭାରତ ସମେତ ଅନେକ ଦେଶର ନାଗରିକ ସେଠାରେ ଫସି ରହିଛନ୍ତି। ଏହି ସମୟରେ, ସୁଦାନରୁ ଭାରତୀୟମାନଙ୍କୁ ବାହାର କରି ଦେଶକୁ ଫେରାଇ ଆଣିବା ପାଇଁ ଭାରତ ‘ଅପରେଶନ କାବେରୀ’ ଆରମ୍ଭ କରିଛି। ବୈଦେଶିକ ମନ୍ତ୍ରୀ ଏସ ଜୟଶଙ୍କର ଟୁଇଟ୍ କରି ଏହି ସୂଚନା ଦେଇଛନ୍ତି।
ବାୟୁସେନାର ଦୁଇଟି ସି-୧୩୦ ବିମାନ ଏବଂ ନୌସେନାର ଆଇଏନ୍ଏସ ସୁମେଧା ସୁଦାନରେ ଗୃହଯୁଦ୍ଧରେ ଫସି ରହିଥିବା ଭାରତୀୟଙ୍କୁ ଫେରାଇ ଆଣିବା ପାଇଁ ସାଉଦି ଆରବ ଏବଂ ସୁଦାନରେ ପହଞ୍ଚିଛନ୍ତି। ବାୟୁସେନା ଜାହାଜ ସାଉଦି ଆରବର ଜେଡ୍ଡାଠାରେ ଥିବାବେଳେ ଆଇଏନ୍ଏସ ସୁମେଧା ସୁଦାନ ବନ୍ଦରରେ ପହଞ୍ଚିଛି।
