କୋଟଗଡ଼/ବାଲିଗୁଡ଼ା,୧ା୪(ଡି.ଏନ୍.ଏ.): କନ୍ଧମାଳ ଜିଲା ସୁବର୍ଣ୍ଣଗିରି ଅଞ୍ଚଳରେ ଏକ ଅଭାବନୀୟ ଘଟଣା ଦେଖିବାକୁ ମିଳିଛି। ଶନିବାର ଏକ ସ୍କୁଲ ମରାମତି ବେଳେ ଜଣେ ଯୁବକଙ୍କ ମଳଦ୍ୱାରରେ ଶାବଳ ପଶିଯିବାରୁ ଗୁରୁତର ଅବସ୍ଥାରେ ତାଙ୍କୁ ବ୍ରହ୍ମପୁର ସ୍ଥାନାନ୍ତର କରାଯାଇଛି।
ଗୁରୁତର ଯୁବକ ଜଣକ ହେଲେ ସୁବର୍ଣ୍ଣଗିରି ଗ୍ରାମର ଶକ୍ତି ପାଟଗୁରୁ। ତାଙ୍କୁ ପ୍ରଥମେ କୋଟଗଡ଼ ଏବଂ ପରେ ବାଲିଗୁଡ଼ା ଉପଖଣ୍ଡ ଡାକ୍ତରଖାନାକୁ ନିଆଯାଇଥିଲା। ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ ବ୍ରହ୍ମପୁର ଏମ୍କେସିଜି ଡାକ୍ତରଖାନା ସ୍ଥାନାନ୍ତର କରାଯାଇଛି।
ଶକ୍ତି ଦିନ ମଜୁରିଆ ଭାବେ କାମ କରନ୍ତି। ତେବେ ସେ ଆଜି ସକାଳେ ତଲବସୁବର୍ଣ୍ଣଗିରି ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟର ଶ୍ରେଣୀ ଗୃହ ମରାମତି କରୁଥିବା ବେଳେ ଏକ ଆଜବେଷ୍ଟ ତାଙ୍କ ଉପରେ ପଡ଼ିଥିଲା। ଫଳରେ ସେ ତଳେ ପଡ଼ିଯାଇଥିଲେ। ଏହି ସମୟରେ ତଳେ ଥିବା ଶାବଳଟି ତାଙ୍କ ମଳଦ୍ୱାରରେ ପଶିଯାଇଥିଲା।
