ଢାକା,୧୯।୩ : ରବିବାର ବାଂଲାଦେଶର ଏକ ଦ୍ରୁତଗାମୀ ବସ ଏକ ଖାଇକୁ ଖସିପଡିଛି। ଫଳରେ ୧୭ ଜଣଙ୍କର ମୃତ୍ୟୁ ଘଟିଛି। ଏହି ଦୁର୍ଘଟଣାରେ ୩୦ ଜଣ ଆହତ ହୋଇଥିବା ମଧ୍ୟ କୁହାଯାଉଛି। ପୋଲିସର ସୂଚନାନୁସାରେ, ଏମାଦ ପରିବହନ ଦ୍ୱାରା ପରିଚାଳିତ ଏହି ବସ ଢାକା ଅଭିମୁଖେ ଯାତ୍ରା କରୁଥିଲା। ସକାଳ ପ୍ରାୟ ସାଢ଼େ ୭ଟା ସମୟରେ ମଦାରିପୁରର ଏକ ଏକ୍ସପ୍ରେସୱେରେ ନିୟନ୍ତ୍ରଣ ହରାଇ ଏକ ଖାଇକୁ ଖସି ପଡ଼ିଥିଲା।
କେତେକ ଆହତଙ୍କ ଅବସ୍ଥା ଗୁରୁତର ଥିବାରୁ ମୃତ୍ୟୁ ସଂଖ୍ୟା ବୃଦ୍ଧି ପାଇବାର ଆଶଙ୍କା ରହିଛି ବୋଲି ପୋଲିସ କହିଛି। ମଦାରିପୁର ପୋଲିସ ଅଧୀକ୍ଷକ ମହମ୍ମଦ ମାସୁଦ ଆଲାମ କହିଛନ୍ତି ଯେ ଆହତମାନଙ୍କୁ ଚିକିତ୍ସା ଲାଗି ବିଭିନ୍ନ ଡାକ୍ତରଖାନାରେ ଭର୍ତ୍ତି କରାଯାଇଛି। ସ୍ଥାନୀୟ ନ୍ୟୁଜ ପୋର୍ଟାଲ କହିଛି ଯେ ବସରେ ଥିବା ଯାନ୍ତ୍ରିକ ତ୍ରୁଟି ଏହି ଦୁର୍ଘଟଣାର କାରଣ ହୋଇଛି।
ଏହି ଦୁର୍ଘଟଣା ବିଷୟରେ ବର୍ଣ୍ଣନା କରି ଫରିଦପୁର ଅଗ୍ନିଶମ ସେବାର ଡେପୁଟି ଆସିଷ୍ଟାଣ୍ଟ ଡାଇରେକ୍ଟର ସିପ୍ଲୁ ଅହମ୍ମଦ କହିଛନ୍ତି ଯେ ଏହା ବିଶ୍ୱାସ କରାଯାଏ ଯେ ଦ୍ରୁତ ଗତିରେ ଆସୁଥିବା ବସର ଟାୟାର ଫାଟି ଯାଇଥିଲା ଏବଂ ଏହା ନିୟନ୍ତ୍ରଣ ହରାଇ ଖାଇ ଭିତରକୁ ଖସି ପଡ଼ିଥିଲା । ସେ କହିଛନ୍ତି ଯେ ମୃତ ଓ ଆହତଙ୍କ ପରିଚୟ ଏପର୍ଯ୍ୟନ୍ତ ଜଣାପଡିନାହିଁ।
ବସରେ ୪୩ ରୁ ଅଧିକ ଯାତ୍ରୀ ଢାକା ଅଭିମୁଖେ ଯାତ୍ରା କରୁଥିଲେ। ବାଂଲାଦେଶରେ ପୁରୁଣା ଏବଂ ଖରାପ ରକ୍ଷଣାବେକ୍ଷଣ ଯାନବାହାନ, ଖରାପ ସଡ଼କ ଏବଂ ତାଲିମପ୍ରାପ୍ତ ନ ଥିବା ଡ୍ରାଇଭର ଯୋଗୁଁ ସଡ଼କ ଦୁର୍ଘଟଣା ଅଧିକ ହେଉଥିବା ସ୍ଥାନୀୟ ପ୍ରଶାସନ ପକ୍ଷରୁ କୁହାଯାଇଛି।
