ନୂଆଦିଲ୍ଲୀ,୧୩।୨: ଦେଶରେ ବୃଦ୍ଧି ପାଉଥିବା ବ୍ୟକ୍ତିଗତ ଆୟକର ସଂଗ୍ରହର ଉପରେ ପ୍ରତିକ୍ରିୟା ରଖିଛନ୍ତି ଅର୍ଥମନ୍ତ୍ରୀ। ”ଆୟକର ସଂଗ୍ରହ ଅର୍ଥ ଏହା ନୁହେଁ ଯେ ମଧ୍ୟବିତ୍ତ ଶ୍ରେଣୀ ଚାପରେ ଅଛନ୍ତି।” ଗୁରୁବାର ରାଜ୍ୟସଭାରେ ବଜେଟ୍ ଉପରେ ହୋଇଥିବା ଆଲୋଚନାର ଉତ୍ତର ଦେଇ ଅର୍ଥମନ୍ତ୍ରୀ ନିର୍ମଳା ସୀତାରମଣ ଏହା କହିଛନ୍ତି।
ଅର୍ଥମନ୍ତ୍ରୀ କହିଥିଲେ, ‘ମଧ୍ୟବିତ୍ତ ଶ୍ରେଣୀ ଶୋଷିତ ହେବାର କୌଣସି ପ୍ରମାଣ ନାହିଁ, ବରଂ ଏହି ଶ୍ରେଣୀର ପରିସର ବଢ଼ୁଥିବାର ସ୍ପଷ୍ଟ ପ୍ରମାଣ ରହିଛି। ଚଳିତ ବଜେଟର ପଦକ୍ଷେପଗୁଡ଼ିକ ଏକ ସ୍ଥିର ଓ ଆତ୍ମନିର୍ଭର ଭାରତ ଗଠନର ସଙ୍କଳ୍ପକୁ ଦର୍ଶାଉଛି। ବଜେଟ୍ ଯୋଜନାଗୁଡ଼ିକରେ ସହଯୋଗ କରିବାକୁ ସେ ସମସ୍ତ ରାଜ୍ୟ ସରକାରଙ୍କୁ ଆହ୍ୱାନ କରିଛନ୍ତି।’
ବିରୋଧୀଙ୍କ ଅଭିଯୋଗକୁ ଖଣ୍ଡନ କରି ସେ କହିଛନ୍ତି ଯେ କୌଣସି କଲ୍ୟାଣକାରୀ ଯୋଜନାରେ ଅର୍ଥ କାଟ୍ କରାଯାଇ ନାହିଁ। ଗତ ୧୦ ବର୍ଷ ମଧ୍ୟରେ ୧୪ଟି ସାମାଜିକ ଯୋଜନାରେ ମାତ୍ର ୩୭,୦୦୦ କୋଟି ଟଙ୍କା ଅବ୍ୟବହୃତ ରହିଛି, ଯାହା ୟୁପିଏ ଶାସନ କାଳରେ ୯୪,୦୦୦ କୋଟି ଟଙ୍କା ଥିଲା।
ସରକାର ପ୍ରତ୍ୟକ୍ଷ ସୁବିଧା ହସ୍ତାନ୍ତର (DBT) ମାଧ୍ୟମରେ ହିତାଧିକାରୀଙ୍କ ଆକାଉଣ୍ଟକୁ ୪୮ ଲକ୍ଷ କୋଟିରୁ ଅଧିକ ଟଙ୍କା ପଠାଇଛନ୍ତି। ଏହାଦ୍ୱାରା ଦୁର୍ନୀତି ରୋକାଯାଇ ପ୍ରାୟ ୪.୩୧ ଲକ୍ଷ କୋଟି ଟଙ୍କା ସଞ୍ଚୟ କରାଯାଇପାରିଛି।
