ଦାରିଙ୍ଗବାଡି, ୧୬।୨(ଅରୁଣ ସାହୁ ): କନ୍ଧମାଳ ଜିଲା ଦାରିଙ୍ଗବାଡି ବ୍ଲକର ନାରୀ ମହାସଙ୍ଘର ତ୍ରୟ ମାସିକ ବୈଠକ ଅନୁଷ୍ଠିତ ହୋଇଯାଇଛି । ବୈଠକରେ ମହାସଙ୍ଘର ସଭାନେତ୍ରୀ ଲୁସିମା ପ୍ରଧାନ ଅଧ୍ୟକ୍ଷତା କରିଥିଲେ । ଏଥିରେ ଦାରିଙ୍ଗବାଡି ବ୍ଲକର ୧୬ଟି ପଞ୍ଚାୟତର ୧୭୫ଜଣ କର୍ମକର୍ତ୍ତାଙ୍କ ସହ ସଦସ୍ୟା ଯୋଗଦେଇଥିଲେ । କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଜାଗୃତି ସମ୍ପାଦକ କୈଳାଶ ଚନ୍ଦ୍ର ଦଣ୍ଡପାଟ ଯୋଗଦେଇ ମହିଳାଙ୍କ ସମସ୍ୟା ଓ ତାର ସମାଧାନ ପାଇଁ ଆଲୋଚନାରେ ବିଭିନ୍ନ ପରାମର୍ଶ ଦେଇ ମହାସଙ୍ଘକୁ ମାର୍ଗଦର୍ଶନ କରିଥିଲେ ।
ଏବେ ଦାରିଙ୍ଗବାଡି ଥାନା ଅଞ୍ଚଳର ସମସ୍ତ ପଞ୍ଚାୟତ ଅଞ୍ଚଳରେ ବିଶେଷ କରି ସୋନପୁର, ଗ୍ରୀନବାଡି, ଦାରିଙ୍ଗବାଡି, ଶ୍ରାନିକେତା, ସିମନବାଡି, କିରିକୁଟି, ପ୍ଳିହେରୀ ଆଦି ପଞ୍ଚାୟତ ଗୁଡିକରେ ଚୋରାମଦ କାରବାର ବୃଦ୍ଧି ପାଇଛି । ଦିନକୁ ଦିନ ଅଞ୍ଚଳରେ ଏଥିପାଇଁ ମହିଳା ହିଂସା ବୃଦ୍ଧି ପାଇବା ସହ ଅନେକ ପରିବାର ସର୍ବସ୍ୱ ହରାଉଛନ୍ତି । ଏନେଇ ସୋନପୁର ପଞ୍ଚାୟତବାସୀ ସୋମବାର ଜିଲାପାଳଙ୍କ ଅଭିଯୋଗ ଶୁଣାଣୀ ବେଳେ ଲିଖିତ ଅଭିଯୋଗ କରିଥିବା ଘଟଣା ମଧ୍ୟ ବୈଠକରେ ଆଲୋଚନା ହୋଇଥିଲା ।
ଅଞ୍ଚଳକୁ ନିଶାମୁକ୍ତ ବିଶେଷ କରି ଚୋରାମଦ କାରବାର ଓ ଗଞ୍ଜେଇ ଚୋରାଚାଲାଣ ଓ ଚାଷକୁ ତୀବ୍ର ବିରୋଧ କରାଯିବାକୁ ମହିଳା ସଙ୍ଘ ଅଣ୍ଟା ଭିଡ଼ିବ ଆସନ୍ତା ମାର୍ଚ୍ଚ ୮ ବିଶ୍ୱ ମହିଳା ଦିବସରେ ନାରୀ ମହାସଙ୍ଘ ପକ୍ଷରୁ ସଭା, ଶୋଭାଯାତ୍ରା ଓ ବିକ୍ଷୋଭ କରାଯିବାକୁ ନିଷ୍ପତି ଗ୍ରହଣ କରିଥିବା ନାରୀ ମହାସଙ୍ଘର ସଭାନେତ୍ରୀ ଲୁସିମା ପ୍ରଧାନ କହିଛନ୍ତି । ତାଙ୍କୁ ନିଶା ନୁହଁ ଲୋକଙ୍କ ମୌଳିକ ସୁବିଧା ଯୋଗାଇଦେବାକୁ ସେହିଦିନ ରାଜରାସ୍ତାରେ ବିକ୍ଷୋଭ ପ୍ରଦର୍ଶନ କରାଯିବ ବୋଲି ସେ କହିଛନ୍ତି ।
