ନୂଆଦିଲ୍ଲୀ,୧୬ା୨: ଅଜ୍ମାତୁଲ୍ଲାଙ୍କ ଅଲ୍ରାଉଣ୍ଡ ପ୍ରଦର୍ଶନ ସହାୟତାରେ ଆଫଗାନିସ୍ତାନ ସୋମବାର ଖେଳାଯାଇଥିବା ୟୁଏଇ ବିପକ୍ଷ ଟି୨୦ ବିଶ୍ୱକପ ମ୍ୟାଚ୍ରେ ୫ ଉଇକେଟରେ ବିଜୟ ହୋଇଛି।
ଓମାରଜାଇ ୪ ଉଇକେଟ ଅକ୍ତିଆର କରିବା ସହ ୪୦ ରନ କରି ଅପରାଜିତ ରହିଥିଲେ। ଏହି ବିଜୟ ସହ ଆଫାଗାନିସ୍ତାନ ଟୁର୍ନାମେଣ୍ଟରେ ଖାତା ଖୋଲିଛି। ଗ୍ରୁପ୍ ‘ଡି’ରୁ ସୁପର-୮କୁ ଉନ୍ନୀତ ହେବା ଲାଗି ଦଳର ସାମାନ୍ୟ ଆଶା ସଞ୍ଚାର କରିଛି।
ଦକ୍ଷିଣ ଆଫ୍ରିକା ୬ ପଏଣ୍ଟ ସହ ଗ୍ରୁପ୍ରେ ଶୀର୍ଷ ସ୍ଥାନ ଅଧିକାର କରିଥିବା ବେଳେ ଏହାପଛକୁ ନ୍ୟୁଜିଲାଣ୍ଡ ଦ୍ୱିତୀୟ ଏବଂ ଆଫଗାନିସ୍ତାନ ତୃତୀୟ ସ୍ଥାନରେ ରହିଛି। ପରାଜିତ ହେବା ଦ୍ୱାରା ୟୁଏଇ ଚତୁର୍ଥ ସ୍ଥାନକୁ ଖସିଆସିଛି।
ଓମାରଜାଇ ୪ ଓଭର ବୋଲିଂରେ ୧୫ରନ ବିନିମୟରେ ୪ଉଇକେଟ ନେଇଥିବା ବେଳେ ୟୁଏଇ ନିର୍ଦ୍ଧାରିତ ଓଭରରେ ୯ଉଇକେଟ ହରାଇ ୧୬୦ ରନ୍ କରିଥିଲା। ଦଳର ଟପ୍ ସ୍କୋରର ସୋହେବ ଖାନ୍ ୪୮ ବଲ୍ରୁ ୬୮ ରନ କରିଥିଲେ।
ଜବାବରେ ଆଫଗାନିସ୍ତାନ ଆରମ୍ଭରୁ ଶୀଘ୍ର ଉଇକେଟମାନ ହରାଇ ବସିଥିଲା। ଫର୍ମରେ ଥିବା ରହମତୁଲ୍ଲା ଗୁର୍ବାଜ ବିନା କୌଣସି ରନ୍ରେ ଏବଂ ଗୁର୍ବାଜ ନାଇବ୍ ୧୩ ରନ କରି ପ୍ୟାଭିଲିନକୁ ଫେରିଥିଲେ। ପାଓ୍ୱାର ପ୍ଲେ ଶେଷ ବେଳକୁ ଦଳ ୨ଉଇକେଟରେ ୪୧ ରନ କରିଥିଲା। ଇବ୍ରାହିମ୍ ଜାଦ୍ରାନ ୪୧ ବଲ୍ରୁ ୫୩ ରନ କରିଥିଲେ। ସେ ୬ଚୌକା ଓ ଗୋଟିଏ ଛକା ମାରିଥିଲେ। ସେ ଆଉଟ ହୋଇଯିବା ପରେ ଡାରଓ୍ୱିସ ରସୁଲି (୩୩) ଓ ଓମାରଜାଇ ମିଳିତ ଭାବେ ଦଳର ଇନିଂସକୁ ଆଗେଇ ନେଇଥିଲେ। ଆଫଗାନିସ୍ତାନ ୧୯.୨ ଓଭରରେ ୫ଉଇକେଟ ବିନିମୟରେ ୧୬୨ ରନ୍ କରି ମ୍ୟାଚ୍ ବିଜୟୀ ହୋଇଥିଲ।
