ଭୁବନେଶ୍ୱର,୧୬।୨(ରବିନାରାୟଣ ଜେନା): ମୋତେ ନିୟମକାନୁନ ଦେଖାନା, ମୁଁ ପରା କହୁଛି। ସକାଳେ କଲମ୍ରେ କଂକ୍ରିଟ ଢଳାହେଲା ମାନେ ସନ୍ଧ୍ୟା ସୁଦ୍ଧା ବିଲ୍ ହେବା ଦରକାର। ଠିକାଦାରଙ୍କ ଉଦ୍ଦେଶ୍ୟରେ ଏଭଳି ନିର୍ଦ୍ଦେଶନାମା ଜଣେ ଯନ୍ତ୍ରୀଙ୍କ ସମ୍ମୁଖରେ ଜାରି କରୁଛନ୍ତି ଇଡ୍କୋର କାର୍ଯ୍ୟନିର୍ବାହୀ ନିର୍ଦ୍ଦେଶକ(ଇଡି)। କେବଳ ଯେ ସେ ଚାପ ପକାଉଛନ୍ତି ତାହା ନୁହେଁ, କଳାମଣ୍ଡଳ ନିର୍ମାଣ କାର୍ଯ୍ୟରେ ଆଗତୁରା ବିଲ୍ କରାଇବା ପାଇଁ ଇଡି ଏବଂ ସିଜିଏମ୍ ସମ୍ପୂର୍ଣ୍ଣ ଭାବେ ଚାପ ପକାଉଛନ୍ତି। ବାରମ୍ବାର ବେଆଇନ କାର୍ଯ୍ୟ ଓ ମାନସିକ ଚାପ ଯୋଗୁ ମୋର ସ୍ବାସ୍ଥ୍ୟାବସ୍ଥା ଭଲ ରହୁନାହିଁ; ଯେଉଁଥିପାଇଁ ପୂର୍ବରୁ ଏହି ନିର୍ମାଣ କାର୍ଯ୍ୟରୁ ୨ ଜଣ ଯନ୍ତ୍ରୀ ଅପସରି ଗଲେଣି, ମୁଁ ଆଉ ସହିପାରୁନି। ମୋତେ ମଧ୍ୟ ଏହି କାର୍ଯ୍ୟରୁ ଅନ୍ତର କରାଯାଉ ବୋଲି ଜଣେ ଦିବ୍ୟାଙ୍ଗ ଯନ୍ତ୍ରୀ ମୁଖ୍ୟଶାସନ ସଚିବ ଏବଂ ପରିଚାଳନା ନିର୍ଦ୍ଦେଶକଙ୍କ ହସ୍ତକ୍ଷେପ ଲୋଡ଼ିଛନ୍ତି। କଳାମଣ୍ଡଳ ପ୍ରକଳ୍ପକୁ ୮ବର୍ଷ ବିତିଥିଲେ ହେଁ ସେହି କାର୍ଯ୍ୟ ଏବେ ବି ଅଧପନ୍ତରିଆ ହୋଇ ପଡ଼ିରହିଛି। ଘଟଣାର ଅନୁସନ୍ଧାନ କରାଗଲେ କଳାମଣ୍ଡଳର ପ୍ରକୃତ କଳାକାହାଣୀ ଲୋକଲୋଚନକୁ ଆସିପାରନ୍ତା ବୋଲି ଇଡ୍କୋରେ ଚର୍ଚ୍ଚା ଜୋର୍ ଧରିଛି।
ସନ୍ତୋଷ କୁମାର ପଣ୍ଡା ଏ ସଂକ୍ରାନ୍ତରେ କରିଥିବା ଅଭିଯୋଗ ଅନୁଯାୟୀ, ଇଡ୍କୋ ଇଡିଙ୍କ ଦ୍ୱାରା ତାଙ୍କୁ ବାରମ୍ବାର ଅନୁଚିତ ଚାପର ସମ୍ମୁଖୀନ ହେବାକୁ ପଡୁଛି। ଏଥିଯୋଗୁ ତାଙ୍କ ସ୍ବାସ୍ଥ୍ୟ ଗୁରୁତର ଭାବରେ ପ୍ରଭାବିତ ହୋଇଛି। ଭୁବନେଶ୍ୱର ସୈନିକ ସ୍କୁଲ୍ ନିକଟସ୍ଥ କଳାମଣ୍ଡଳ ପ୍ରକଳ୍ପର ନିର୍ମାଣ କାର୍ଯ୍ୟ ୨୦୧୭ରେ ମେସର୍ସ ଡିକେ ଇଞ୍ଜିନିୟରିଂ ଆଣ୍ଡ୍ କନ୍ଷ୍ଟ୍ରକଶନ ପ୍ରାଇଭେଟ ଲିମିଟେଡ୍କୁ ଦିଆଯାଇଥିଲା। ଠିକାଦାର ପ୍ରକଳ୍ପ କାର୍ଯ୍ୟରେ ଅହେତୁକ ବିଳମ୍ବ କରୁଛନ୍ତି। ନିର୍ମାଣରେ ବିଳମ୍ବ ସତ୍ତ୍ୱେ ଇଡି ଏବଂ ସିଜିଏମ୍-୨ ଏଜେନ୍ସିକୁ ସମର୍ଥନ କରି ଚାଲିଛନ୍ତିି। ଏଥିଯୋଗୁ ଇଡ୍କୋର ୨ଜଣ ଇଞ୍ଜିନିୟର ସାଇଟ୍ ଛାଡ଼ି ଯାଇଛନ୍ତି। ସନ୍ତୋଷ ତୃତୀୟ ଇଞ୍ଜିନିୟର ଭାବେ ଅଢ଼େଇ ବର୍ଷରୁ ଊର୍ଦ୍ଧ୍ୱ ସମୟ ଧରି କାମ କରୁଛନ୍ତି। ଇଡି ନିରନ୍ତର ଭାବେ ତାଙ୍କୁ ଏଜେନ୍ସି ପାଇଁ ବିଲ୍ ପ୍ରସ୍ତୁତ ଓ ପାସ୍ କରିବାକୁ ଚାପ ଦେଉଛନ୍ତି। ଓପିଡବ୍ଲ୍ୟୁଡି କୋଡ୍ ଅନୁସାରେ ଠିକାଦାର ମାସ ଶେଷରେ ବିଲ୍ ଦେବେ। କିନ୍ତୁ ଏଜେନ୍ସି ନିୟମିତ କାମ ନ କରିବାରୁ ଠିକ୍ ବିଲ୍ ଦେଇପାରୁନାହାନ୍ତି। ତଥାପି ତାଙ୍କୁ ୨୪ ଘଣ୍ଟାରେ ବିଲ୍ ପ୍ରସ୍ତୁତ କରିବାକୁ ବାଧ୍ୟ କରାଯାଉଛି। ତେବେ କଳାମଣ୍ଡଳର ପ୍ରକଳ୍ପ କାର୍ଯ୍ୟ ୨୦୧୭ରେ ୪୦ କୋଟି ଟଙ୍କା ଥିଲା, କିନ୍ତୁ ଏବେ ସେହି ରାଶି ପ୍ରାୟ ୮୬ କୋଟି ଟଙ୍କାକୁ ବୃଦ୍ଧି ପାଇଛି। ସିଜିଏମ୍-୨ ଓ ଇଡିଙ୍କ ନିର୍ଦ୍ଦେଶରେ ଅନେକ ଅତିରିକ୍ତ କାମ କରାଯାଉଛି। ଏହି ଅତିରିକ୍ତ କାମ ପଛରେ ବ୍ୟକ୍ତିଗତ ଲାଭ ଥିବା ସନ୍ତୋଷ ନିଜ ଅଭିଯୋଗରେ ସନ୍ଦେହ ବ୍ୟକ୍ତ କରିଛନ୍ତି।
ଅଭିଯୋଗରେ ଦର୍ଶାଇଛନ୍ତି, ଗତ ୪ ମାସରେ ଏଜେନ୍ସି କେବଳ ପ୍ରକଳ୍ପର ନିର୍ମାଣ (ପ୍ରାୟ ୪୦ ମିଟର ଡ୍ରେନ୍ ଓ ୨.୪ ମିଟର ଉଚ୍ଚତା ପର୍ଯ୍ୟନ୍ତ ଦୁଇଟି କଲମ୍) କରିଛନ୍ତି। ଏହି ସୀମିତ କାମର ବିଲ୍ ପ୍ରସ୍ତୁତ ହୋଇଛି ଏବଂ ସୋମବାର ଦାଖଲ ହେବ। ମାତ୍ର ଇଡି ଏହାକୁ ଜୋରଜବରଦସ୍ତ ତୁରନ୍ତ ବିଲ୍ କରିବାକୁ ନିର୍ଦ୍ଦେଶ ଦେଉଛନ୍ତି। ଯଦି ପ୍ରକଳ୍ପ କାର୍ଯ୍ୟର ଠିକଣା ଭାବେ ତଦନ୍ତ କରାଯାଆନ୍ତା ତେବେ ଅନିୟମିତତା ଧରାପଡ଼ନ୍ତା ବୋଲି ଯନ୍ତ୍ରୀ ତାଙ୍କ ଗୁହାରିରେ ଦର୍ଶାଇଛନ୍ତି।
ସିଜିଏମ୍ ଅଶ୍ୱିନୀ ବିଶ୍ୱାଳଙ୍କୁ ଯୋଗାଯୋଗ କରାଯିବାରେ ସେ କହିଛନ୍ତି, ପ୍ରକଳ୍ପ ନିର୍ମାଣରେ କୌଣସି ଅନିୟମିତତା କରାଯାଉନାହିଁ। ଯଦି ଯନ୍ତ୍ରୀ କାର୍ଯ୍ୟ କରିପାରୁ ନାହାନ୍ତି ତେବେ ଛାଡ଼ିଦିଅନ୍ତୁ। ସେହିପରି ଇଡ୍କୋ ପରିଚାଳନା ନିର୍ଦ୍ଦେଶକ ଡି. ପ୍ରଶାନ୍ଥ କୁମାର ରେଡ୍ଡୀ କହିଛନ୍ତି, ଏହା ଆଭ୍ୟନ୍ତରୀଣ ବ୍ୟାପାର। ଏହାକୁ ଚିଫ୍ ଭିଜିଲାନ୍ସଙ୍କୁ ହସ୍ତାନ୍ତର କରାଯାଇଛି। ତାଙ୍କ ରିପୋର୍ଟ ଆଧାରରେ ପରବର୍ତ୍ତୀ ପଦକ୍ଷେପ ଗ୍ରହଣ କରାଯିବ।
