ଢାକା,୧୫।୨: ବାଂଲାଦେଶରେ ମଧ୍ୟବର୍ତ୍ତୀକାଳୀନ ସରକାରଙ୍କ କାର୍ଯ୍ୟକାଳ ଶେଷ ହେବାକୁ ଯାଉଥିବା ବେଳେ, ମୁଖ୍ୟ ପରାମର୍ଶଦାତା ମହମ୍ମଦ ୟୁନୁସଙ୍କୁ ନେଇ ଅନେକ କଳ୍ପନାଜଳ୍ପନା ପ୍ରକାଶ ପାଇଛି। ଫେବୃଆରୀ ୧୨ରେ ଅନୁଷ୍ଠିତ ନିର୍ବାଚନରେ ବାଂଲାଦେଶ ନ୍ୟାସନାଲିଷ୍ଟ ପାର୍ଟି (BNP)ର ବିପୁଳ ବିଜୟ ପରେ ୟୁନୁସଙ୍କୁ କୌଣସି ସାମ୍ବିଧାନିକ ପଦବୀ ନଚେତ ରାଷ୍ଟ୍ରପତି କରାଯାଇପାରେ ବୋଲି ଚର୍ଚ୍ଚା ହେଉଛି।
BNP ନେତା ତାରିକ ରହମାନଙ୍କ ଅନ୍ତର୍ଜାତୀୟ ବ୍ୟାପାର ପରାମର୍ଶଦାତା ହୁମାୟୁନ କବୀର କହିଛନ୍ତି ଯେ, ୟୁନୁସଙ୍କ ପାଇଁ କୌଣସି ନିର୍ଦ୍ଧିଷ୍ଟ ପଦବୀ ଉପରେ ଏପର୍ଯ୍ୟନ୍ତ ଆନୁଷ୍ଠାନିକ ଆଲୋଚନା ହୋଇନାହିଁ। ତେବେ ତାରିକ ରହମାନ ଏକ ‘ଅନ୍ତର୍ଭୁକ୍ତିକାରୀ ଶାସନ’ (Inclusive Governance) ଚାହୁଁଛନ୍ତି, ଯେଉଁଠି ଦେଶର ଅଭିଜ୍ଞ ଓ ଦକ୍ଷ ବ୍ୟକ୍ତିମାନଙ୍କ ସାହାଯ୍ୟ ନିଆଯିବ। ୟୁନୁସଙ୍କ ଆନ୍ତର୍ଜାତୀୟ ପରିଚିତି ଓ ଅଭିଜ୍ଞତାକୁ ଦେଶହିତରେ ବ୍ୟବହାର କରାଯାଇପାରେ ବୋଲି ସେ ସୂଚନା ଦେଇଛନ୍ତି।
ୟୁନୁସଙ୍କ ପ୍ରେସ ସେକ୍ରେଟେରୀ ଶଫିକକୁଲ ଆଲାମ ସ୍ପଷ୍ଟ କରିଛନ୍ତି ଯେ, ୟୁନୁସ ରାଜନୀତିରେ ରହିବାକୁ ଆଦୌ ଆଗ୍ରହୀ ନୁହଁନ୍ତି। ସେ ନିଜର ପୁରୁଣା ସାମାଜିକ କାର୍ଯ୍ୟକୁ ଫେରିବାକୁ ଚାହୁଁଛନ୍ତି। ତାଙ୍କର ମୁଖ୍ୟ ଲକ୍ଷ୍ୟ ହେଉଛି ଥ୍ରୀ ଜିରୋ’ (Three Zero)ଭିଜନ:ଶୂନ୍ୟ ଦାରିଦ୍ର୍ୟ(Zero Poverty),ଶୂନ୍ୟ ବେକାରୀ(Zero Unemployment), ଶୂନ୍ୟ କାର୍ବନ ର୍ନିଗମନ (Zero Net Carbon Emission)
ସୂଚନାଯୋଗ୍ୟ, ବର୍ତ୍ତମାନ ବାଂଲାଦେଶର ରାଷ୍ଟ୍ରପତି ଭାବେ ମହମ୍ମଦ ଶାହାବୁଦ୍ଦିନ କାର୍ଯ୍ୟ କରୁଛନ୍ତି। ସେ ୨୪ ଏପ୍ରିଲ ୨୦୨୩ରେ ଶପଥ ନେଇଥିଲେ ଏବଂ ତାଙ୍କର କାର୍ଯ୍ୟକାଳ ୫ ବର୍ଷ। ଯଦି ୟୁନୁସଙ୍କୁ ରାଷ୍ଟ୍ରପତି କରାଯାଏ, ତେବେ ଏହା ଏକ ବଡ଼ ସାମ୍ବିଧାନିକ ପରିବର୍ତ୍ତନ ହେବ।
