ମାଥିଲି,୧୪ା୩ (ଡି.ଏନ.ଏ.):ଗ୍ରାମକୁ ରାସ୍ତା ହେଲେ ଗ୍ରାମର ବିକାଶ ହେବ। ଏହାକୁ ଦୃଷ୍ଟିରେ ରଖି କେନ୍ଦ୍ର ସରକାର ପ୍ରଧାନମନ୍ତ୍ରୀ ସଡ଼କ ଯୋଜନାରେ ବହୁ କୋଟି ଅର୍ଥ ଖର୍ଚ୍ଚ କରୁଛନ୍ତି। ଜିଲା ପ୍ରଶାସନ ମଧ୍ୟ ଗ୍ରାମାଞ୍ଚଳର ବିକାଶ ଦିଗରେ ଗୁରୁତ୍ୱ ଦେଉଛନ୍ତି । ମାତ୍ର କେତେକ ଅଧିକାରୀଙ୍କ ମନମୁଖି କାର୍ଯ୍ୟ ଯୋଗୁ ଲୋକେ ଏଥିରୁ ସୁଫଳ ପାଉନାହାନ୍ତି। ଏପରି ଦେଖିବାକୁ ମିଳିଛି ମାଲକାନଗିରି ଜିଲା ମାଥିଲି ବ୍ଲକ ପୂଜାରୀଗୁଡା ଗ୍ରାମରେ। ପ୍ରଧାନମନ୍ତ୍ରୀ ସଡ଼କ ଯୋଜନାରେ ଗ୍ରାମରେ ହୋଇଥିବା ରାସ୍ତାକାମ ଅତି ନିମ୍ନମାନର ହୋଇଥିବା ଗ୍ରାମବାସୀ ଅଭିଯୋଗ ଆଣିଛନ୍ତି। ଯନ୍ତ୍ରୀ, ଠିକାଦାରଙ୍କ ସଲାସୁତରାରେ ଯେନତେନ ପ୍ରକାରେ କାମ କରି ଅର୍ଥ ହଡପ କରାଯାଇଛି। ମାଥିଲି ବ୍ଲକ ଉଦୁଲିବାଡା ପଞ୍ଚାୟତର ପୂଜାରିଗୁଡା ଗ୍ରାମରେ ଜୟପୁର-ବାଲିମେଳା ଯାଇଥିବା ମୁଖ୍ୟ ରାସ୍ତାରୁ ପୂଜାରିଗୁଡ଼ା ଗ୍ରାମକୁ ରାସ୍ତା ନିର୍ମାଣ ହୋଇଛି । ମାତ୍ର ନିର୍ମାଣର ଦୁଇ ମାସ ନ ପୂରୁଣୁ ରାସ୍ତାରୁ ପିଚୁ ଉଠିଗଲାଣି। ରାସ୍ତା ଖାଲଖମାରେ ପରିଣତ ହେଲାଣି। ଲୋକେ ଯାତାୟାତ ସମୟରେ ସମସ୍ୟା ଭୋଗୁଛନ୍ତି। ବର୍ଷା ଦିନ ଆସିଲେ ଦୁର୍ଦ୍ଦଶା ବଳିପଡିବ ବୋଲି ଗ୍ରାମବାସୀ କହିଛନ୍ତି। କୌଣସି ଦିନ ନିର୍ମାଣ ସ୍ଥଳକୁ ନ ଯାଇ ଅଫିସରେ ବସି ବିଭାଗୀୟ ଯନ୍ତ୍ରୀ କାଗଜ ପତ୍ରରେ କାମ ତଦାରଖ କରୁଛନ୍ତି। ରାସ୍ତା କାମ ନେଇ ଯଦି ଲୋକେ ମୁହଁ ଖୋଲୁଛନ୍ତି ତେବେ ସେମାନଙ୍କୁ ଧମକଚମକ ମିଳୁଛି ବୋଲି କେତେ ଜଣ ଗ୍ରାମବାସୀ କହିଛନ୍ତି। ଏ ସମ୍ପର୍କରେ କନିଷ୍ଠଯନ୍ତ୍ରୀ ରାଜେନ୍ଦ୍ର ମହାକୁଡଙ୍କୁ ପଚାରିବାରୁ ସେ କହିଲେ, ସ୍ପଟ ଉପରକୁ ଯାଇ ତଦାରଖ କରିବି। ଯଦି କିଛି ଅନିୟମିତତା ହୋଇଥିବ ତେବେ ତାହାକୁ ମରାମତି କରି କାର୍ଯ୍ୟ କରାଯିବ।
