ବାଲିଗୁଡା,୨।୪:(ସଞ୍ଜୟ କୁମାର ପାଣିଗ୍ରାହୀ): କନ୍ଧମାଳ ଜିଲାର ପ୍ରସିଦ୍ଧ ବାଲିଗୁଡ଼ା ଦଣ୍ଡଯାତ୍ରା ଆରମ୍ଭ ହୋଇଯାଇଛି। ଏନେଇ ଗାଁଠୁ ସହର ଉତ୍ସବମୁଖର ହୋଇପଡିଛି।
ଶତାଧିକ ମାନସିକଧାରୀ ଦଣ୍ଡୁଆ ମା’ଙ୍କ ଦଣ୍ଡଯାତ୍ରାରେ ନିଜକୁ ସମର୍ପିତ କରି ୧୩ଦିନ ପର୍ଯ୍ୟନ୍ତ ପୂଜାର୍ଚ୍ଚନା ସହ ଦଣ୍ଡକାଳୀଙ୍କ ବ୍ରତପାଳନ କରିଛନ୍ତି। ବୁଧବାର ବାଲିଗୁଡା ସମେତ ଆଖପାଖ ବିଭିନ୍ନ ଅଞ୍ଚଳର ଦଣ୍ଡଯାତ୍ରା ବହାରିଛି। ପ୍ରଥମ ଦିନରେ ମା’ ଦକ୍ଷିଣ କାଳୀ ମନ୍ଦିରରୁ ବାହାରି ଆଦର୍ଶ ପୁଷ୍କରିଣୀରେ ଯଥା ରୀତିନୀତି ପୂଜାର୍ଚ୍ଚନା କରାଯାଇଥିଲା। ଏହି ଅବସରରେ ଢୋଲ, ଘଣ୍ଟ ଧ୍ୱନିରେ ଗାଁ ପ୍ରକମ୍ପିତ ହୋଇଥିଲା।
ଦୀର୍ଘ ବର୍ଷ ଧରି କନ୍ଧମାଳ ଜିଲାରେ ଏହି ଲୋକ ପରମ୍ପରା ଚାଲି ଆସୁଥିବା ବେଳେ ଦଣ୍ଡୁଆମାନେ ଖାଲି ପାଦରେ ମା’ଙ୍କ ବାନା ଆଉ ପିଞ୍ଚକୁ ଧରି ନଗର ପରିଭ୍ରମଣ କରିଥାନ୍ତି । ଏହି ୧୩ ଦିନରେ ମା’ଙ୍କ ନିତିକାନ୍ତି ଅନୁସାରେ ଯଥା ବିଧିବିଧାନ ପୂର୍ବକ ପୂଜାର୍ଚ୍ଚନା କରାଯାଇଥାଏ। ଏହା ସହିତ ମା’ ଗାଁକୁ ଗାଁ ଭ୍ରମଣ କରି ପୂଜା ପାଇଥାନ୍ତି । ଏହା ସମସ୍ତଙ୍କ ମନରେ ଏକ ଆଧ୍ୟାତ୍ମିକ ପରିବେଶ ସୃଷ୍ଟି କରିଥାଏ।
ଦଣ୍ଡଯାତ୍ରା ଆସନ୍ତା ୧୩ ତାରିଖ ପର୍ଯ୍ୟନ୍ତ ଚାଲିବ। ଏହି ଅବସରରେ ମା’ ନଗର ପରିକ୍ରମା କରି ଭକ୍ତଙ୍କୁ ଭିନ୍ନଭିନ୍ନ ରୂପରେ ଦର୍ଶନ ଦେବେ। ପୌରାଣିକ ମାନ୍ୟତା ଅନୁସାରେ ଦଣ୍ଡଯାତ୍ରା ବ୍ରତପାଳନ କଲେ ଭକ୍ତଙ୍କ ମନସ୍କାମନା ପୂର୍ଣ୍ଣ ହୋଇଥାଏ ।
ଏପରିକି ଦଣ୍ଡଯାତ୍ରାରେ ମା’ଙ୍କ ବିଭିନ୍ନ ଲୀଳା ଦେଖିବାକୁ ମିଳିଥାଏ। ଦଣ୍ଡଯାତ୍ରା ନିୟମାବଳୀ ଅନୁଯାୟୀ, ମଧ୍ୟାହ୍ନରେ ଧୂଳି ଦଣ୍ଡ, ସନ୍ଧ୍ୟାରେ ପାଣି ଦଣ୍ଡ ସହ ମା’ଙ୍କ ଆଳତୀ ହୋଇଥାଏ। ସେହିପରି ମଧ୍ୟରାତ୍ରିରେ ପ୍ରସାଦ ସେବନ ସହ ଝୁଣାଦଣ୍ଡ ସହିତ ବିଭିନ୍ନ ପାରମ୍ପରିକ ନୃତ୍ୟ, ଗୀତ ଆୟୋଜିତ ହୋଇଥାଏ।
