ଚମ୍ପୁଆ,୧।୩(ଡି.ଏନ୍.ଏ.): କେନ୍ଦୁଝର ଜିଲା ଚମ୍ପୁଆ ଏନ୍ଏସି ଅନ୍ତର୍ଗତ ଗୋଧୂଳି ଗ୍ରାମରେ ଚାଷୀମାନଙ୍କର ପାଇଁ ଚିରସ୍ରୋତା ବାଙ୍କ ନାଳ ଏନେଇ ଦୁଃଖର କାରଣ ସାଜିଛି। ନାଳକଡ଼ ଖାଇ ଦିନକୁ ଦିନ ଓସାର ହେଉଥିବା ବେଳେ ନାଳଗର୍ଭରେ ଅନେକଙ୍କ ଚାଷଜମି ଲୀନ ହୋଇଗଲାଣି। ଦିନେ ଉକ୍ତ ନାଳ ଚାଷୀମାନଙ୍କ ପାଇଁ ବରଦାନ ପାଲଟିଥିବା ବେଳେ ଏବେ ଅଭିଶାପ ହୋଇଯାଇଛି। ଏନେଇ ପ୍ରଶାସନ କୌଣସି ପଦକ୍ଷେପ ନ ନେଲେ ଚାଷ ସହ କ୍ଷେତ ହରାଇବାକୁ ପଡ଼ିବ ବୋଲି ଚାଷୀମାନେ କହିଛନ୍ତି।
ସୂଚନା ଅନୁଯାୟୀ, ସୁନାପଶି ପଞ୍ଚାୟତରୁ ଉକ୍ତ ନାଳ ବାହାରି ଜାମୁଦଲକ ପଞ୍ଚାୟତ, ଚମ୍ପୁଆ ଏନ୍ଏସିର ଗୋଧୂଳି ଦେଇ ବୈତରଣୀ ନଦୀରେ ମିଶିଛି। ବର୍ଷ ତମାମ ନାଳରେ ଅଳ୍ପ ବହୁତ ପାଣି ରହୁଥିବାରୁ ପୂର୍ବରୁ ନାଳ ସନ୍ନିକଟ ଚାଷୀ ଜମିରେ ସୁବିଧାରେ ପାଣି ମଡ଼ାଇ ଲାଭବାନ ହେଇପାରୁଥିଲେ। ନାଳ କଡ଼ରେ ସୁରକ୍ଷା ବାଡ଼ କରା ନ ଯିବାରୁ ସମୟ କ୍ରମେ ନାଳ ଗଭୀର ହୋଇଗଲା। ଏହାର ମରାମତି ପ୍ରତି ବିଭାଗ ଧ୍ୟାନ ନ ଦେବାରୁ ଚାଷୀମାନଙ୍କ ଚାଷଜମି ନାଳରେ ମିଶିଯାଉଛି। ନାଳ ହୁଡ଼ା ଧୋଇ ଜମି ନଷ୍ଟ ହେବା ସହିତ ନାଳର ଅପର ପାଖରେ ଥିବା ଜମିକୁ ଯିବା ପାଇଁ ଚାଷୀମାନେ ନାନା ଅସୁବିଧାର ସମ୍ମୁଖୀନ ହେଉଛନ୍ତି। ନାଳ ପାଣିକୁ ମଧ୍ୟ ଚାଷରେ ବ୍ୟବହାର କରାଯାଇ ପାରୁନାହିଁ। ଏନେଇ ବିଭାଗୀୟ ଅଧିକାରୀ ବନମାଳୀ ପାତ୍ର କହିଛନ୍ତି, ସେ ଘଟଣାସ୍ଥଳ ବୁଲି ଦେଖିବା ସହ ତୁରନ୍ତ ଏଥିପ୍ରତି ପଦକ୍ଷେପ ନେବେ।
ଏମାନେ କ’ଣ କୁହନ୍ତି…
ଦୀର୍ଘ ୨୦-୨୫ ବର୍ଷ ତଳେ ନାଳ ଗଭୀର ନ ଥିଲା। ନାଳର ପାଣି ଚାଷଜମିରେ ବ୍ୟବହାର କରାଯାଉଥିଲା। ମାତ୍ର ବର୍ତ୍ତମାନ ନାଳଟି ଗଭୀର ହୋଇ ଜମିକୁ ଧୋଇ ନେଇଗଲାଣି। ସୁରକ୍ଷା ବାଡ଼ ଆବଶ୍ୟକ, ନଚେତ୍ ଜମି ନାଳରେ ମିଶିଯିବ।
– ଚତୁର୍ଭୁଜ ନାଏକ, ଚାଷୀ
ନାଳର ଗଭୀରତା ବଢୁଥିବାରୁ ନାଳ ସେପାଖ ଜମିକୁ ହଳ ଲଙ୍ଗଳ ନେଇ ଯିବା ବହୁ କଷ୍ଟକର ହୋଇପଡ଼ିଲାଣି। ଗଭୀରତା ହେତୁ ନାଳ ପାଣି ନାଳରେ ନ ରହି ନଦୀକୁ ପଳାଉଛି। ଫଳରେ ଚାଷ କରିବାରେ ଅସୁବିଧା ହେଉଛି।
– ଦୁଷ୍ମନ୍ତ ନାଏକ, ଚାଷୀ
ବିଭାଗ ଦୃଷ୍ଟି ନ ଦେଲେ ଆଗକୁ ଚାଷୀ ଚାଷ ଜମି ହରାଇବା ସହିତ ଚାଷ ମଧ୍ୟ ହରାଇବେ। ଉକ୍ତ ସମସ୍ୟା ପ୍ରତି ବିଭାଗ ଦୃଷ୍ଟି ଦେଲେ ଚାଷୀକୁଳ ଉପକୃତ ହେବେ।
-ସତ୍ୟବାନ ନାଏକ, ଚାଷୀ
