ଭବାନୀପାଟଣା,୧୮।୨(ସ୍ବ.ପ୍ର.): କଳାହାଣ୍ଡି ଜିଲାରେ କାମ ମିଳୁ ନ ଥିବା ଯୋଗୁ ଗରିବ ଲୋକେ କାମ ଅନ୍ବେଷଣରେ ଅନ୍ୟ ରାଜ୍ୟକୁ ଦାଦନ ଖଟିବାକୁ ଯାଉଛନ୍ତି। ଜିଲାର ଜୁନାଗଡ ବ୍ଲକ ମିଚାଗାଁର ଧର୍ମାନନ୍ଦ ଦୁର୍ଗା ରାଶନ କାର୍ଡକୁ ୨ ହଜାର ଟଙ୍କାରେ ବନ୍ଧା ପକାଇ ତାମିଲନାଡୁକୁ ଦାଦନ ଖଟିଯିବା ଘଟଣା ସାଧାରଣରେ ଆଲୋଡନ ସୃଷ୍ଟି କରିଛି। ଅନ୍ୟପକ୍ଷରେ ଲୋକଙ୍କୁ କାମ ଯୋଗାଉଥିବା ଏମ୍ଜିଏନ୍ଆର୍ଇଜିଏସ୍ରେ ସରକାରୀ ବାବୁମାନଙ୍କ ଦ୍ୱାରା ୬ ଲକ୍ଷରୁ ଊଦ୍ଧର୍ବ ଟଙ୍କା ହଡପ ହୋଇଥିବାବେଳେ ଏଥିମଧ୍ୟରୁ ୨ ଲକ୍ଷରୁ ଊଦ୍ଧର୍ବ ଟଙ୍କା ଏବେ ମଧ୍ୟ ସେମାନଙ୍କ ନାମରେ ରହିଛି। ଜୁନାଗଡ ବ୍ଲକ ଆଟିଗାଁ ପଞ୍ଚାୟତର ମିଚାଗାଁର ଧର୍ମାନନ୍ଦ ଦୁର୍ଗା କାମ ନ ପାଇବା ଯୋଗୁ ୨ ହଜାର ଟଙ୍କାରେ ରାଶନ କାର୍ଡ ବନ୍ଧା ପକାଇ ତାମିଲନାଡୁର ତିରୁପୁରକୁରେ ଦାଦନ ଖଟିବା ପାଇଁ ଯାଇଛନ୍ତି। ତାଙ୍କ ସହିତ ସ୍ତ୍ରୀ ନମିତା ଓ ଛୋଟ ପୁଅ ମଧ୍ୟ ଯାଇଛନ୍ତି। ତାଙ୍କ ଘରେ ଏବେ ତାଲା ପଡ଼ିଥିବା ଦେଖିବାକୁ ମିଳିଛି। ଲୋକଙ୍କୁ ଜବକାର୍ଡ କିମ୍ବା ଆବାସ ଯୋଜନାରେ ପ୍ରକୃତ ହିତାଧିକାରୀଙ୍କୁ ମିଳୁ ନ ଥିବା ଯୋଗୁ ଏହାର ପ୍ରତିବାଦରେ ତାଙ୍କ ସ୍ତ୍ରୀ ନମିତା ଗତ ପଞ୍ଚାୟତ ନିର୍ବାଚନରେ ଆଟିଗାଁ ପଞ୍ଚାୟତ ସରପଞ୍ଚ ପଦବୀ ନିମନ୍ତେ ପ୍ରତିଦ୍ବନ୍ଦିତା କରୁଥିଲେ। ସେତେବେଳେ ସେ ଚର୍ଚ୍ଚାକୁ ଆସିଥିଲେ। ବର୍ତ୍ତମାନ ନିଜ ପରିବାର ପ୍ରତିପୋଷଣ ପାଇଁ ୨ ହଜାର ଟଙ୍କାରେ ରାଶନ କାର୍ଡ ବନ୍ଧା ପକାଇ ତାମିଲନାଡୁକୁ ଦାଦନ ଖଟିଯିବା ଘଟଣା ପୁଣି ଚର୍ଚ୍ଚା ହେଉଛି। ଲୋକଙ୍କୁ କାମ ଯୋଗାଇବା ପାଇଁ ଉକ୍ତ ଯୋଜନା ହୋଇଥିଲେ ମଧ୍ୟ ଏହି ଯୋଜନା ଏବେ ମୂଳ ଉଦ୍ଦେଶ୍ୟରୁ ବାଟବଣା ହେବାରେ ଲାଗିଛି। ଗତ ୩ ମାସ ଧରି ଜବକାର୍ଡରେ କାମ କରିଥିବା ଶ୍ରମିକମାନଙ୍କ ପ୍ରାପ୍ୟ ମିଳିନାହିଁ। ଜିଲାରେ ସରକାରୀ ବାବୁମାନେ ୬ ଲକ୍ଷ ୩ ହଜାର ୩୨୫ ଟଙ୍କା ଅର୍ଥ ହଡପ କରିଥିବା ସୋସିଆଲ ଅଡିଟରେ ଗୁମର ଖୋଲିଥିଲା। ଏହା ପରେ ଜିଲା ପ୍ରଶାସନ ପକ୍ଷରୁ ଏହାର ଖୋଲତାଡ କରି ତୁରନ୍ତ ଟଙ୍କା ଭରଣା ନ କଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ତାଗିଦ କରି ଚିଠି କରାଯାଇଥିଲା। ଏହା ପରେ ସରକାରୀ ଅଧିକାରୀମାନେ କାର୍ଯ୍ୟାନୁଷ୍ଠାନ ଭୟରେ ଟଙ୍କା ଫେରସ୍ତ କରିଥିଲେ। କିନ୍ତୁ ଏ ପର୍ଯ୍ୟନ୍ତ ମଧ୍ୟ ୨ ଲକ୍ଷ ୫ ହଜାର ୯୨୯ ଟଙ୍କା ଭରଣା ନ ହୋଇ ସରକାରୀ ବାବୁମାନଙ୍କ ପାଖରେ ପଡି ରହିଛି। ବର୍ତ୍ତମାନ ଭବାନୀପାଟଣା ସଦର ବ୍ଲକରେ ୨୨ହଜାର ଟଙ୍କା, ଧର୍ମଗଡ ବ୍ଲକରେ ୩୪ ହଜାର ୫୫୮ଟଙ୍କା, ଜୁନାଗଡ ବ୍ଲକରେ ୨୧ ହଜାର ୨୪୮ ଟଙ୍କା, କଲମପୁର ବ୍ଲକରେ ୨୩୫୮୦ ଟଙ୍କା, କର୍ଲାମୁଣ୍ଡା ବ୍ଲକରେ ୨୭ ହଜାର ୪୪୧ ଟଙ୍କା, କେସିଙ୍ଗା ବ୍ଲକରେ ୨୫ ହଜାର ୯୩୮ ଟଙ୍କା, କୋକସରା ବ୍ଲକରେ ୧୬ ହଜାର ଟଙ୍କା, ଲାଞ୍ଜିଗଡ ବ୍ଲକରେ ୧୪ ହଜାର ଟଙ୍କା, ବକେୟା ରହିଛି। ଜିଲାରେ ଲୋକେ କାମ ନ ପାଇ ରାଶନ କାର୍ଡ ବନ୍ଧା କରି ଦାଦନ ଖଟି ଯାଉଥିବାବେଳେ ଅନ୍ୟପଟେ ସରକାରୀ ବାବୁମାନେ ଅର୍ଥ ଯୋଜନାକୁ ବାଟ ମାରଣା କରି ପକେଟରେ ଭରୁଥିବା ଘଟଣା ସାଧାରଣରେ କ୍ଷୋଭ ପ୍ରକାଶ ପାଇଛି।
