ଭୁବନେଶ୍ୱର, ୧୮।୨ (ବ୍ୟୁରୋ): ବିଏମ୍ସିର ନୂଆ କାର୍ଯ୍ୟାଳୟ ଉଦ୍ଘାଟନ ହେବା ପରେ ଶୁକ୍ରବାର ପ୍ରଥମ ବୈଠକ ଅନୁଷ୍ଠିତ ହୋଇଛି। ମେୟରଙ୍କ ସୁଲୋଚନା ଦାସଙ୍କ ଅଧ୍ୟକ୍ଷତାରେ ବିଏମ୍ସି କଣ୍ଟ୍ରାକ୍ଟସ୍ କମିଟିର ଏକ ଗୁରୁତ୍ୱପୂର୍ଣ୍ଣ ବୈଠକ ଆୟୋଜିତ ହୋଇଥିଲା। ଆସନ୍ତା ୨୦ରେ ହେବାକୁ ଥିବା କର୍ପୋରେଶନ ବୈଠକରେ ବିଏମ୍ସିର ଚିଠା ବଜେଟ୍ ପାରିତ ହେବାର ସମ୍ଭାବନା ରହିଛି। ଏ ନେଇ ବଜେଟ୍ ସମ୍ପର୍କିତ କେତେକ ଗୁରୁତ୍ୱପୂର୍ଣ୍ଣ ବିଷୟ ଆଲୋଚନା କରାଯାଇଥିଲା। ଏଥିସହ ସହରରେ ପରିମଳ ସମ୍ପର୍କିତ କେତେକ ବିଷୟ ଆଲୋଚନା ହୋଇଥିଲା। ପଳାଶୁଣି ଅଞ୍ଚଳରେ ଗୋଟିଏ ମେଗା ମାଇକ୍ରୋ କମ୍ପୋଷ୍ଟିଂ ସେଣ୍ଟର (ଏମ୍ସିସି) ଏବଂ ଗୋଟିଏ ମେଗା ମ୍ୟାଟେରିଆଲ ରିକଭରି ଫ୍ୟାସିଲିଟି (ଏମ୍ଆର୍ଏଫ୍) ସ୍ଥାପନ କରାଯିବ। ତେଣୁ ସହର ପରିମଳ କ୍ଷେତ୍ରରେ ଉନ୍ନତି ପାଇଁ ମନୋନୀତ ଦଳକୁ ଯଥାଶୀଘ୍ର କାର୍ଯ୍ୟକାରୀ ପତ୍ର ପ୍ରଦାନ କରିବାକୁ କମିଟି ନିର୍ଦ୍ଦେଶ ଦେଇଛି। ଅପରପକ୍ଷେ ପ୍ରଥମ ପର୍ଯ୍ୟାୟରେ ଗୃହ ଓ ନଗର ଉନ୍ନୟନ ବିଭାଗ ପକ୍ଷରୁ ୩୦ଟି ୱାର୍ଡ କାର୍ଯ୍ୟାଳୟ ନିର୍ମାଣ ପାଇଁ ମଞ୍ଜୁରୀ ପ୍ରଦାନ କରାଯାଇଛି। ତେଣୁ ଯଥାଶୀଘ୍ର ୱାର୍ଡ କାର୍ଯ୍ୟାଳୟ ନିର୍ମାଣ ପାଇଁ ନିର୍ଦ୍ଧାରିତ ଅଞ୍ଚଳ ଚିହ୍ନଟ କରାଯିବା ପାଇଁ ଆଲୋଚନା କରାଯାଇଥିଲା। ଏଥିସହ ବିଏମ୍ସି ଇଞ୍ଜିନିୟରିଂ ବିଭାଗ ସହିତ ସମ୍ପୃକ୍ତ ଅଧିକାରୀ ଯଥାଶୀଘ୍ର କାର୍ଯ୍ୟ ଆରମ୍ଭ କରିବା ନେଇ ରିପୋର୍ଟ ରଖିବାକୁ ନିର୍ଦ୍ଦେଶ ଦିଆଯାଇଥିଲା। ସେହିପରି ଓ୍ବାର୍ଡ କାର୍ଯ୍ୟାଳୟଗୁଡିକ ଯେପରି କମ୍ୟୁନିଟି ସ୍ତରରେ ସେବା ସୁନିଶ୍ଚିତ କରିବ ସେ ନେଇ ଗୁରୁତ୍ୱାରୋପ କରାଯାଇଥିଲା। ବୈଠକରେ କମିଟି ସଦସ୍ୟ କର୍ପୋରେଟର କେ.ଶାନ୍ତି, ପୁଷ୍ପାଞ୍ଜଳୀ ସେଠୀ, ଡେପୁଟି ମେୟର ମଞ୍ଜୁଲତା କହଁର, କମିଶନର ବିଜୟ ଅମୃତା କୁଲାଙ୍ଗେ, ସାନିଟେଶନ ଷ୍ଟାଣ୍ଡିଂ କମିଟି ଚେୟାରମ୍ୟାନ ବିରଞ୍ଚତ୍ ନାରାୟଣ ମହାସୁପକାର, ଡେପୁଟି କମିଶନର ଶୁଭେନ୍ଦୁ ସାହୁ, ସିଟି ଇଞ୍ଜିନିୟର ଅରୁଣ ସାହୁ ପ୍ରମୁଖ ଉପସ୍ଥିତ ଥିଲେ।
