ଭୁବନେଶ୍ୱର, ୬।୨(ବ୍ୟୁରୋ): ପୂର୍ବତନ ସ୍ବାସ୍ଥ୍ୟମନ୍ତ୍ରୀ ନବ କିଶୋର ଦାସଙ୍କ ହତ୍ୟା ଘଟଣାକୁ ନେଇ ସାମାଜିକ ଗଣମାଧ୍ୟମରେ ହେଉଥିବା ଚର୍ଚ୍ଚା ଭିନ୍ନ ଖୋରାକ୍ ଯୋଗାଇଛି। ଜିଲା ଓ ରାଜ୍ୟସ୍ତରରେ ପ୍ରଭାବ ବିସ୍ତାର କରିଥିବା ଏହି ନେତାଙ୍କ ହତ୍ୟା ଘଟଣାରେ ସମ୍ପୃକ୍ତ କୁହାଯାଉଥିବା ନିଲମ୍ବିତ ପୋଲିସ ଏଏସ୍ଆଇ ଗୋପାଳ ଦାସଙ୍କୁ କେତେକ ବ୍ୟକ୍ତି ବିଭିନ୍ନ ନିଉଜର କମେଣ୍ଟରେ, ଫେସ୍ବୁକ୍, ୟୁଟୁବର କମେଣ୍ଟରେ ପ୍ରଶଂସା କରୁଥିବା ଦେଖାଯାଉଛି। କିଏ ଗୋପାଳଙ୍କୁ ସାବାସ୍ ପୋଲିସ କହୁଥିବାବେଳେ କିଏ ନବ ମରିଗଲେ ଭଲ ହେଲା ବୋଲି କହୁଛନ୍ତି। ଏକ ନିଉଜ ଚ୍ୟାନେଲ କମେଣ୍ଟରେ ପ୍ରଦୀପ ଦାସ ନାମକ ଜଣେ ବ୍ୟକ୍ତି ମରିଗଲେ ଭଲ ହେଲା ଉଲ୍ଲେଖ କରିଛନ୍ତି। ଝାରସୁଗୁଡ଼ାର ମୀନତି ବହିଦାର ନାମକ ଜଣେ ବୃଦ୍ଧା କହିଛନ୍ତି କାମ ଯେମିତି ଫଳ ସେମିତି। ନବଙ୍କ ମୃତ୍ୟୁରେ ସେ ଖୁସି ବୋଲି ମନ୍ତବ୍ୟ ଦେଇଛନ୍ତି। ବୀରେନ୍ଦ୍ର କର୍ମୀ ନାମକ ଜଣେ ବ୍ୟକ୍ତି ଗୋପାଳଙ୍କୁ ଧନ୍ୟବାଦ ଦେଇ ସେ ସମାଜର ଟିକେ ମଇଳା ସଫା କରିଦେଲେ ବୋଲି କମେଣ୍ଟ କରିଛନ୍ତି। ଟୁନା କୁମାର ନାମକ ଜଣେ ଫେସବୁକ୍ ୟୁଜର୍ସ କହିଛନ୍ତି, ଗୋପାଳଙ୍କୁ ପଦୋନ୍ନତି ଦିଆଯାଉ। ଚୋରି, ନାରୀ ଭଳି ନିର୍ଯାତନା କମିଯିବ। ସେହିପରି ମନୋଜ କୁମାର ନାମକ ଅନ୍ୟ ଜଣେ ଫେସବୁକ୍ ୟୁଜର୍ସ କହିଛନ୍ତି, ଦୁରାଚାରୀ ନେତାଙ୍କୁ ଗୋପାଳଙ୍କ ଗୁଳିମାଡ ଚେତାବନୀ ସଦୃଶ। ଅନ୍ୟ ଜଣେ ବ୍ୟକ୍ତି ଜୟରାମ ବକ୍ସି ନିଜ ସୋସିଆଲ ମିଡିଆ କମେଣ୍ଟରେ ଲେଖିଛନ୍ତି ଗୋପାଳ ଓଡ଼ିଶା ପୋଲିସର ହିରୋ ଅଫିସର। ପ୍ରଭାବଶାଳୀ ମନ୍ତ୍ରୀ ନବ ଦାସଙ୍କୁ ସର୍ବ ସମ୍ମୁଖରେ ଗୁଳିମାଡ କରି ହତ୍ୟା କରିବା ଭାରତୀୟ ରାଜନେତାଙ୍କ ପାଇଁ ଏକ ଶିକ୍ଷା। ଭାଗବତ ବେହେରା ନାମକ ଜଣେ ବ୍ୟକ୍ତି କମେଣ୍ଟରେ ଲେଖିଛନ୍ତି ସାଲ୍ୟୁଟ ଏଏସ୍ଆଇ ସାର୍। ଏହିପରି ଶହଶହ କମେଣ୍ଟ ଦେଖିବାକୁ ମିଳୁଛି।
