ନୂଆଦିଲ୍ଲୀ,୩ା୧ (ସ୍ବ.ପ୍ର.):ଓଡ଼ିଶାକୁ ପରିଭ୍ରମଣରେ ଆସିଥିବା ୨ ରୁଷୀୟ ପର୍ଯ୍ୟଟକ ତଥା ସେଠାକାର ଏମ୍ପି ଆଣ୍ଟୋଭ ପାଭେଲ (୬୫) ଏବଂ ତାଙ୍କ ବନ୍ଧୁ ଭ୍ଲାଡିମିର ବିଦାନୋଭ(୬୧)ଙ୍କ ମୃତ୍ୟୁକୁ ନେଇ ନାନା ସନ୍ଦେହ ସୃଷ୍ଟି ହେଉଛି। ରୁଷିଆ ରାଷ୍ଟ୍ରପତି ଭ୍ଲାଡିମିର ପୁଟିନଙ୍କ ୟୁକ୍ରେନ୍ ଆକ୍ରମଣକୁ ପାଭେଲ ସମାଲୋଚନା କରି ଚର୍ଚ୍ଚାକୁ ଆସିଥିଲେ। ରାୟଗଡ଼ାର ସାଇ ଇଣ୍ଟରନ୍ୟାଶନାଲ ହୋଟେଲରେ ରହଣୀ ସମୟରେ ଗତ ଡିସେମ୍ବର ୨୨ରେ ବିଦାନୋଭଙ୍କ ମୃତ୍ୟୁ ଘଟିଥିବାବେଳେ ୨୪ ତାରିଖରେ ହୋଟେଲର ତୃତୀୟ ମହଲାରୁ ପଡ଼ି ପାଭେଲଙ୍କ ମୃତ୍ୟୁ ଘଟିଥିବା କୁହାଯାଉଛି। ପାଭେଲଙ୍କ ଭଳି ଅନ୍ୟ କେତେଜଣ ପୁଟିନ୍ ବିରୋଧୀ ରୁଷୀୟ ନାଗରିକଙ୍କ ଅସ୍ବାଭାବିକ ମୃତ୍ୟୁ ଘଟିଛି। ତେଣୁ ପାଭେଲଙ୍କ ମୃତ୍ୟୁକୁ ନେଇ ଅନ୍ତର୍ଜାତୀୟ ସ୍ତରରେ ହଇଚଇ ସୃଷ୍ଟି ହୋଇଛି। ଏଭଳି ସ୍ଥଳେ ଏହି ଘଟଣାକୁ ପରିଚାଳନା କରିବାରେ ଓଡ଼ିଶା ପୋଲିସର ଭୂମିକାକୁ ନେଇ ସମାଲୋଚନା କରାଯାଉଛି। ବିସ୍ମୟର କଥା, ପାଭେଲଙ୍କ ମୃତ୍ୟୁ ପରେ ପୋଲିସ ଏସ୍ଓପି (ସାଧାରଣରେ ଯେଉଁ ସବୁ ନିୟମ ଅନୁପାଳନ କରିବା କଥା) ପାଳନ କରିନାହିଁ।
ଜଣେ ବିଦେଶୀ ନାଗରିକଙ୍କ ମୃତ୍ୟୁ ଘଟଣାରେ ପୋଲିସ କ’ଣ କରିବା ଉଚିତ ସେନେଇ କେନ୍ଦ୍ର ସରକାରଙ୍କ ଏସ୍ଓପି ରହିଛି। ତଦନୁଯାୟୀ ପୋଲିସ ଜଣେ ବିଦେଶୀ ନାଗରିକଙ୍କ ମୃତଦେହ ପାଇବା ପରେ ଯୋଗାଯୋଗର ଶୀଘ୍ର ମାଧ୍ୟମକୁ ବ୍ୟବହାର କରି ସ୍ବରାଷ୍ଟ୍ର ଏବଂ ବହିର୍ବ୍ୟାପାର ମନ୍ତ୍ରଣାଳୟକୁ ସୂଚନା ଦେବା ଜରୁରୀ। ଉକ୍ତ ସୂଚନାରେ ମୃତ ବିଦେଶୀଙ୍କ ସମସ୍ତ ତଥ୍ୟ, ଯେପରି କି ସେ କେଉଁ ଦେଶର ନାଗରିକ, ଜନ୍ମ ତାରିଖ, ମାତାପିତା, ଆବାସିକ ଠିକଣା, ପାସ୍ପୋର୍ଟ ନମ୍ବର ଓ ତାହା କେଉଁ ତାରିଖ, ସ୍ଥାନରୁ ଜାରି ହୋଇଛି
ଏବଂ ମୃତ୍ୟୁର ଠିକ୍ ତାରିଖ, ସମୟ ଓ କାରଣ ଉଲ୍ଲେଖ ରହିବା ଆବଶ୍ୟକ। ସେହିପରି ମୃତଦେହର ବ୍ୟବଚ୍ଛେଦ ହୋଇଛି କି ନାହିଁ। ଯଦି ହୋଇଛି, ତାହାର ରିପୋର୍ଟକୁ ପୋଲିସ ପଠାଇବା ସାଙ୍ଗକୁ ଇଣ୍ଟରପୋଲ ଓ୍ବିଙ୍ଗ୍ର ହସ୍ତକ୍ଷେପ ଆବଶ୍ୟକ କରୁଛି କି ନାହିଁ ତାହା ଜଣାଇବାକୁ ପଡ଼ିଥାଏ। ଏହାଛଡ଼ା ମୃତଦେହର ସତ୍କାର ହୋଇଛି କି ନାହିଁ କିମ୍ବା ତାହାର ସ୍ଥିତି ଏବଂ ଶରୀରରେ ଦୃଶ୍ୟମାନ ହେଉଥିବା କୌଣସି ଚିହ୍ନ ଓ ପୋଷାକ ସମ୍ପର୍କରେ ସବିଶେଷ ତଥ୍ୟ ମଧ୍ୟ ଦେବାକୁ ପଡ଼ିଥାଏ। ଅସ୍ବାଭାବିକ ମୃତ୍ୟୁ କ୍ଷେତ୍ରରେ ପୋଲିସ ବିଦେଶୀ ନାଗରିକଙ୍କୁ ଚିହ୍ନଟ ପାଇଁ ତାଙ୍କର ଫିଙ୍ଗରପ୍ରିଣ୍ଟ୍ ଏବଂ ଫଟୋ ସଂଗ୍ରହ କରିବାକୁ ଏସ୍ଓପିରେ ଉଲ୍ଲେଖ ରହିଛି। ସମସ୍ତ ତଥ୍ୟ ପୋଲିସ ଦେବା ପରେ କେନ୍ଦ୍ର ସରକାରଙ୍କ ପକ୍ଷରୁ ବିଦେଶୀ ନାଗରିକଙ୍କ ମୃତ୍ୟୁ ସମ୍ପର୍କରେ ସମ୍ପୃକ୍ତ ଦୂତାବାସକୁ ସୂଚିତ କରାଯାଇଥାଏ।
ସୂଚନାଥାଉ କି, ପାଭେଲ ଖ୍ରୀଷ୍ଟଧର୍ମାବଲମ୍ବୀ ହୋଇଥିବାବେଳେ ତାଙ୍କ ମୃତଦେହକୁ ସମାଧି ଦିଆଯିବା ପରିବର୍ତ୍ତେ ପୋଡ଼ିଦିଆଯାଇଥିଲା। ଏଭଳି ତରବରିଆ ପଦକ୍ଷେପକୁ ନେଇ ସନ୍ଦେହ ସୃଷ୍ଟି ହେଉଛି। ଏହାଛଡ଼ା ମୃତଦେହ ସତ୍କାର ପୂର୍ବରୁ ପାଭେଲଙ୍କ ପରିବାର ଏବଂ ରୁଷିଆ ଦୂତାବାସର ସହମତି ପାଇଛି କି ନାହିଁ ତାହା ପୋଲିସ ସ୍ପଷ୍ଟ କରୁନାହିଁି।
