ନୂଆଗଡ଼,୧୭ା୧୨: ସାତ ବର୍ଷ ପୁରିବାକୁ ଗଲାଣି ହେଲେ ସରିନି କାର୍ଯ୍ୟ। ଅସମ୍ପୂର୍ଣ୍ଣ ଅବସ୍ଥାରେ ଛାଡ଼ି ଚାଲି ଯାଇଛନ୍ତି ଠିକା ସଂସ୍ଥା। ଅଧପନ୍ତରିଆ ଭାବେ ପଡ଼ି ରହିଛି ଛାତ୍ରାବାସ। ହଷ୍ଟେଲର ମୌଳିକ ସୁବିଧାରୁ ବଞ୍ଚିତ ହୋଇ ଶ୍ରେଣୀ ଗୃହରେ ରହୁଛନ୍ତି ଛାତ୍ର। ବାରମ୍ବାର ପ୍ରଶାସନକୁ ଜଣାଇଲେ ମଧ୍ୟ କାର୍ଯ୍ୟ ହେବାର ନା ଧରୁନି। ଗଜପତି ଜିଲା ନୂଆଗଡ଼ ବ୍ଲକ ଅନ୍ତର୍ଗତ ଆଦିବାସୀ ଅଧ୍ୟୁଷିତ ଉପାନ୍ତ ଦୁର୍ଗମ ଗ୍ରାମାଞ୍ଚଳରେ ଅବସ୍ଥିତ ଲୁହାଙ୍ଗର ସରକାରୀ ଉଚ୍ଚ ବିଦ୍ୟାଳୟ ପରିସର ମଧ୍ୟରେ ୪୦ ଶର୍ଯ୍ୟା ବିଶିଷ୍ଟ ଛାତ୍ରାବାସ ଅସମ୍ପୂର୍ଣ୍ଣ ଭାବେ ପଡ଼ିରହିଛି। ଛାତ୍ରାବାସ କାର୍ଯ୍ୟକୁ ସମ୍ପୂର୍ଣ୍ଣ କରି କାର୍ଯ୍ୟକ୍ଷମ କରିବାକୁ ବିଭିନ୍ନ ମହଲରେ ଦାବି ଜୋର ଧରିଛି। ସୂଚନା ପ୍ରକାରେ, ଏହି ବିଦ୍ୟାଳୟରେ ଦୂରଦୂରାନ୍ତର ପ୍ରଥମରୁ ପଞ୍ଚମ ଶ୍ରେଣୀ ଆଦିବାସୀ ଛାତ୍ରମାନଙ୍କ ନିମନ୍ତେ ହଷ୍ଟେଲ ମଧ୍ୟରେ ରହି ପାଠ ପଢ଼ିବା ବ୍ୟବସ୍ଥା ରହିଛି। ତେବେ ବିଦ୍ୟାଳୟ ପରିସରଠାରେ ରହିଥିବା ପୁରାତନ ଛାତ୍ରାବାସ କୋଠାକୁ ଭଗ୍ନ କରି ୨୦୧୫ ସାଲରୁ ଏଠାରେ ପୁଣି ଏକ ନୂତନ ଭାବେ ୪୦ ଜଣ ଶର୍ଯ୍ୟା ବିଶିଷ୍ଟ ଛାତ୍ରାବାସ ଆଇଟିଡିଏ ବିଭାଗ ପକ୍ଷରୁ ଠିକା ସଂସ୍ଥା ଦ୍ୱାରା ନିର୍ମାଣ କାର୍ଯ୍ୟ ଆରମ୍ଭ ହୋଇଥିଲା। ଛାତ୍ରାବାସର କାର୍ଯ୍ୟକୁ ସମ୍ପୂର୍ଣ୍ଣ ନକରି ଅଧପନ୍ତରିଆ ଭାବେ ରଖି ଠିକା ସଂସ୍ଥା ଛାଡ଼ି ଚାଲି ଯାଇଛି। ଆଜକୁ ପ୍ରାୟ ଦୀର୍ଘ ୭ବର୍ଷରୁ ଊର୍ଦ୍ଧ୍ୱ ସମୟ ବିତିଯାଇଥିଲେ ମଧ୍ୟ ଅସମ୍ପୂର୍ଣ୍ଣ ଅବସ୍ଥାରେ ଛାତ୍ରାବାସ ପଡ଼ି ରହିଛି। ଏ ବିଷୟ ନେଇ ବାରମ୍ବାର ବ୍ଲକ ପ୍ରଶାସନ, ଜିଲା ପ୍ରଶାସନ ଏବଂ ଗ୍ରିଭେନ୍ସରେ ଜଣାଇ ଆସୁଥିଲେ ମଧ୍ୟ ଛାତ୍ରାବାସ କାର୍ଯ୍ୟ ଆରମ୍ଭ ହେବାର ନା ଧରୁନଥିବା ଅଭିଯୋଗ ହୋଉଛି। ତେଣୁ ହଷ୍ଟେଲ ଛାତ୍ରମାନେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଛାତ୍ରାବାସ ଅସମ୍ପୂର୍ଣ୍ଣ ଅବସ୍ଥାରେ ଥିବାରୁ ହଷ୍ଟେଲ ଛାତ୍ର ମାନଙ୍କୁ ୨ଟିଶ୍ରେଣୀ କକ୍ଷ ମଧ୍ୟରେ ରଖାଯାଇଛି। ସେମାନଙ୍କ ନିମନ୍ତେ ନା ଅଛି ଖଟର ବ୍ୟବସ୍ଥା, ନା ଅଛି ସେଜର ବ୍ୟବସ୍ଥା, ନା ଅଛି ମନୋରଞ୍ଜନ ନିମନ୍ତେ ଟିଭି ବ୍ୟବସ୍ଥା। ସେମାନେ ଶୀତ କାକରରେ ବାଧ୍ୟହୋଇ ତଳେ ଶୋଥିବା ପ୍ରକାଶ କରନ୍ତି। ଛାତ୍ରାବାସର ଅଟକଳ ମୂଲ୍ୟ କିମ୍ବା କାର୍ଯ୍ୟର ଅବଧି ବିଷୟରେ କୌଣସି ସୂଚନା ଲେଖା ନଥିବା ଦେଖିବାକୁ ମିଳିଛି। ଏହି ବିଦ୍ୟାଳୟରେ ପ୍ରଥମରୁ ଦଶମ ଶ୍ରେଣୀରେ ଚଳିତ ବର୍ଷ ୨୨୧ ଜଣ ଛାତ୍ରୀଛାତ୍ର ଅଧ୍ୟୟନ କରୁଥିବା ବେଳେ କେବଳ ୫ଟି ଶ୍ରେଣୀ କକ୍ଷ ଅଛି। ଶ୍ରେଣୀ କକ୍ଷ ଅଭାବ ସକାଶେ ବିଦ୍ୟାଳୟର ଛାତ୍ରୀଛାତ୍ରମାନେ ଅସମ୍ପୂର୍ଣ୍ଣ ଅବସ୍ଥାରେ ଥିବା ଛାତ୍ରାବାସ ଭିତରେ ଏବଂ ଶ୍ରେଣୀ ଗୃହ ବାରଣ୍ଡାରେ ବସି ପାଠ ପଢୁଥିବା ମଧ୍ୟ ଦେଖିବାକୁ ମିଳିଛି। ତୁରନ୍ତ ପ୍ରଶାସନ ଉଚିତ ପଦକ୍ଷେପ ନେଇ ଅସମ୍ପୂର୍ଣ୍ଣ ଛାତ୍ରାବାସ କାର୍ଯ୍ୟ ସମ୍ପୂର୍ଣ୍ଣ କରିବାକୁ ହଷ୍ଟେଲ ଛାତ୍ରମାନଙ୍କଠାରୁ ଆରମ୍ଭ କରି ସ୍ଥାନୀୟ ବୁଦ୍ଧିଜୀବୀ ଏବଂ ଶିକ୍ଷୟିତ୍ରୀ ଶିକ୍ଷକ ଦାବି କରିଛନ୍ତି।
