ନୂଆଦିଲ୍ଲୀ,୧୪ା୧୧ : ଦିଲ୍ଲୀର ଏୟାର କ୍ୱାଲିଟି ଇନ୍ଡେକ୍ସ ବା ବାୟୁ ଗୁଣବତ୍ତା ସୂଚକାଙ୍କ (ଏକ୍ୟୁଆଇ)ରେ ସାମାନ୍ୟ ଉନ୍ନତି ଆସିଛି। ତଥାପି ଏହା ଅସ୍ବାସ୍ଥ୍ୟକର ରହିଛି। ସିଷ୍ଟମ୍ ଅଫ୍ ଏୟାର କ୍ୱାଲିଟି ଆଣ୍ଡ୍ ଫୋରକାଷ୍ଟିଂ ଆଣ୍ଡ୍ ରିସର୍ଚ୍ଚ (ଏସ୍ଏଏଫ୍ଏଆର୍) ଅନୁସାରେ ଜାତୀୟ ରାଜଧାନୀରେ ଏକ୍ୟୁଆଇ ସ୍ତର ଶନିବାର ୩୫୩ ରହିଥିବାବେଳେ ରବିବାର ସକାଳ ୮ଟାରେ ୩୨୦ ରହିଥିଲା। ଜାତୀୟ ରାଜଧାନୀ ଅଞ୍ଚଳ (ଏନ୍ସିଆର୍)ରେ ମଧ୍ୟ ବାୟୁ ପ୍ରଦୂଷଣ ବଢ଼ିବାରେ ଲାଗିଛି। ନୋଏଡାରେ ଏକ୍ୟୁଆଇ ୩୪୧ ଥିବାବେଳେ ଗୁରୁଗ୍ରାମରେ ୩୨୪ ରହିଛି, ଯାହାକୁ ‘ଅତି ଖରାପ’ ବୋଲି କୁହାଯାଉଛି।
ପ୍ରକାଶ ଯେ, ଏକ୍ୟୁଆଇ ୦ରୁ ୧୦୦ ରହିବା ଭଲ ଏବଂ ୧୦୦ରୁ ୨୦୦ ମଧ୍ୟରେ ରହିଲେ ମଧ୍ୟମ। ସେହିପରି ୨୦୦ରୁ ୩୦୦ ରହିଲେ ଖରାପ, ୩୦୦ରୁ ୪୦୦ ରହିଲେ ଅତି ଖରାପ ଏବଂ ୪୦୦ରୁ ୫୦୦ ସ୍ତରରେ ରହିଲେ ବିପଜ୍ଜନକ ବୋଲି ବିବେଚନା କରାଯାଏ। ଦିଲ୍ଲୀ ସମେତ ପଞ୍ଜାବ, ହରିୟାଣା, ଉତ୍ତର ପ୍ରଦେଶର ଚାଷୀମାନେ ଅମଳ କରିସାରିବା ପରେ କୃଷିକ୍ଷେତ୍ରର ନଡ଼ାମୂଳିରେ ନିଅଁ। ଲଗାଇଦେଉଥିବାରୁ ଜାତୀୟ ରାଜଧାନୀ ଅଞ୍ଚଳରେ ପ୍ରଦୂଷଣ ବୃଦ୍ଧି ପାଉଛି।
ଏହାର ସମାଧାନ ପାଇଁ ସମ୍ପୃକ୍ତ ରାଜ୍ୟଗୁଡ଼ିକର ମୁଖ୍ୟ ଶାସନ ସଚିବମାନଙ୍କୁ ଜାତୀୟ ମାନବ ଅଧିକାର କମିଶନ ପୂର୍ବରୁ ନୋଟିସ କରିଥିଲେ। ପ୍ରଦୂଷଣ ରୋକିବା ପାଇଁ କ’ଣ ସବୁ ପଦକ୍ଷେପ ନେଇଛନ୍ତି, ତାହା ଉପରେ ସତ୍ୟପାଠ ଜରିଆରେ ରିପୋର୍ଟ ଦାଖଲ କରିବାକୁ ୪ ସପ୍ତାହ ଦେଇଥିଲେ। ମୁଖ୍ୟ ଶାସନ ସଚିବମାନଙ୍କ ବ୍ୟକ୍ତିଗତ ଉପସ୍ଥିତିରେ ଆସନ୍ତା ୧୮ରେ କମିଶନ ପରବର୍ତ୍ତୀ ଶୁଣାଣି କରିବେ।
