ପାରାଦୀପ,୧୮।୭(ସ୍ବ.ପ୍ର.) : ପାରାଦୀପ ବନ୍ଦରରେ ୩୦ ବର୍ଷ ପାଇଁ କାମ ପାଇଥିବା ପିଆଇସିଟି (ପାରାଦୀପ ଇଣ୍ଟରନ୍ୟାଶନାଲ କାର୍ଗୋ ଟର୍ମିନାଲ)ରେ ଗୁରୁବାର ସକାଳେ ଏକ ଅଘଟଣ ଘଟିଛି। ବ୍ୟାଗିଂ ସାଇଟ୍ରେ ଜଣେ ଶ୍ରମିକ ସାର ଅନ୍ଲୋଡ୍ କରୁଥିବାବେଳେ କନ୍ଭେୟର ବେଲ୍ଟରେ ତାଙ୍କ ହାତ ପଶି ଯାଇଥିଲା। ଫଳରେ ପାପୁଲିଠାରୁ କହୁଣୀ ପର୍ଯ୍ୟନ୍ତ ଚାପି ହୋଇଯାଇଥିଲା। ଆହତ ଶ୍ରମିକ ହେଲେ କୁଜଙ୍ଗ ଥାନା ଅନ୍ତର୍ଗତ ପାନପଲି ଗାଁର ସଞ୍ଜୟ ପଲାଇ(୩୫)। ତାଙ୍କୁ ତୁରନ୍ତ ଚିକିତ୍ସା ପାଇଁ ଶ୍ରମିକମାନେ କମ୍ପାନୀ କର୍ତ୍ତୃପକ୍ଷଙ୍କୁ ନେହୁରା ହୋଇଥିଲେ ହେଁ ସେମାନଙ୍କ କଥାକୁ କର୍ତ୍ତୃପକ୍ଷ ଶୁଣି ନ ଥିଲେ। ଫଳରେ ଶ୍ରମିକମାନଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇବା ସହ କାମ ବନ୍ଦ କରି ବିକ୍ଷୋଭ ପ୍ରଦର୍ଶନ କରିଥିଲେ।
ବୁଧବାର ବିଳମ୍ବିତ ରାତିରେ ଏହି ଅଘଟଣ ଘଟିଥିଲେ ସୁଦ୍ଧା ଗୁରୁବାର ସକାଳ ୬ଟାରେ ବୋଲେରୋ ପହଞ୍ଚିଥିଲା। ସେଥିରେ ଆହତଙ୍କ ସମ୍ପର୍କୀୟମାନେ ତାଙ୍କୁ କଟକ ମେଡିକାଲ ନେଇଛନ୍ତି। ୧୧ ଶହ କୋଟି ଟଙ୍କା ପ୍ରକଳ୍ପରେ ପ୍ରାଥମିକ ଚିକିତ୍ସା ନାହିଁ କି ଆମ୍ବୁଲାନ୍ସ ନାହିଁ, ଯାହା ଅତ୍ୟନ୍ତ ଦୁର୍ଭାଗ୍ୟଜନକ। ପୂର୍ବାହ୍ନ ପ୍ରାୟ ୯ଟାରେ କମ୍ପାନୀର କିଛି ଅଧିକାରୀ ଆସି ଆହତଙ୍କୁ ଚିକିତ୍ସା ଖର୍ଚ୍ଚ ଦିଆଯିବା ସହ ସମ୍ପୂର୍ଣ୍ଣ ସୁସ୍ଥ ହେବା ପର୍ଯ୍ୟନ୍ତ ଦରମା ଦିଆଯିବାକୁ ପ୍ରତିଶ୍ରୁତି ଦେବାରୁ ଆନ୍ଦୋଳନ ହଟିଥିଲା।
ସୂଚନାଥାଉ କି, ଗତମାସରେ ଏହିପରି ଦୁଇଟି ଅଘଟଣ ଘଟିଥିଲା। ନିୟମିତ ଦରମା, ଇପିଏଫ୍, ଇଏସ୍ଆଇ ସୁବିଧା ନ ଥିବାରୁ ଶ୍ରମିକମାନେ ଅଧିକାଂଶ ସମୟରେ ବିକ୍ଷୋଭ ପ୍ରଦର୍ଶନ କରୁଛନ୍ତି।
