ଅଣ୍ଡାର ଆକାର କେମିତି ସମସ୍ତେ ଜାଣନ୍ତି। ଏମିତି କି ଅଣ୍ଡାର ଆକାର ଅନୁସାରେ ହିଁ ଅଣ୍ଡାକୃତିର ନାମକରଣ ବି ହୋଇଛି। ହେଲେ ଏଇ କିଛିଦିନ ହେବ ଭିନ୍ନ ଏକ ଆକୃତିର ଅଣ୍ଡା ଦେଉଥିବା ଏକ କୁକୁଡ଼ା ବେଶ୍ ଚର୍ଚ୍ଚାରେ ଅଛି। କହିବାକୁ ଗଲେ ସେ ସେଲିବ୍ରିଟି ପାଲଟିଯାଇଛି। ବହୁ ଦୂରରୁ ଲୋକ ତାକୁ ଦେଖିବାକୁ ଆସୁଛନ୍ତି ଓ ତା’ସହ ସେଲ୍ଫି ଉଠାଉଛନ୍ତି। ଏହି ଅଜବ ଘଟଣା କର୍ନାଟକର ଲୈଲା ଗ୍ରାମରେ ଘଟିଛି। ଏଠାକାର ପ୍ରଶାନ୍ତ ନାମକ ବ୍ୟକ୍ତି କିଛିଦିନ ହେବ କୁକୁଡା ପାଳନ ଆରମ୍ଭ କରିଛନ୍ତି। ତେବେ ତାଙ୍କ କୁକୁଡା ମଧ୍ୟରେ କଳାରଙ୍ଗର ଏକ କୁକୁଡା ଟିକେ ଖାସ୍। କାରଣ ସେ ଦେଉଥିବା ଅଣ୍ଡା ସାଧାରଣ ନୁହେଁ। ଏହି ଅଣ୍ଡାଗୁଡିକର ଆକାର ଦେଖିବାକୁ କାଜୁ ପରି। ପ୍ରଶାନ୍ତ ଯେବେ ପ୍ରଥମେ ଏଭଳି ଅଣ୍ଡା ଦେଖିଲେ ଆଶ୍ଚର୍ଯ୍ୟ ହୋଇଯାଇଥିଲେ। ଆଉ ଭାବିଲେ ଆକସ୍ମିକଭାବେ ଥରକ ପାଇଁ ଏଭଳି ଆକାରର ଅଣ୍ଡା କୁକୁଡାଟି ଦେଇଛି। କିନ୍ତୁ ପରେ ଲଗାତର ଭାବେ ସେ ଏଭଳି ଅଣ୍ଡା ଦେବାକୁ ଲାଗିଲା। ପ୍ରାଣୀ ଚିକିତ୍ସକଙ୍କ ମତରେ କୁକୁଡାର ପ୍ରଜନନ ଅଙ୍ଗରେ ବୋଧହୁଏ କିଛି ସମସ୍ୟା ଅଛି, ଯଦ୍ଦ୍ବାରା କୁକୁଡାଟି ଏଭଳି ଅଣ୍ଡା ଦେଉଛି। ତେବେ ଏହି ଘଟଣାଟି ବ୍ୟାପିଯିବା ପରେ କୁକୁଡା ଓ ତା’ର ଅଣ୍ଡା ଦେଖିବାକୁ ଦୂର ଦୂରାନ୍ତରୁ ଲୋକ ଆସୁଛନ୍ତି।
