ବୁଲିବାକୁ ଗଲେ ବିଳାସପୂର୍ଣ୍ଣ ହୋଟେଲରେ
ରହିବାକୁ ଅନେକେ ପସନ୍ଦ କରନ୍ତି । ତେଣୁ ପର୍ଯ୍ୟଟକମାନଙ୍କୁ ଆକର୍ଷିତ କରିବା ପାଇଁ ହୋଟେଲଗୁଡ଼ିକୁ ଭିନ୍ନ ଭିନ୍ନ ଡିଜାଇନ୍ରେ ସୁସଜ୍ଜିତ କରାଯାଇଥାଏ। ତେବେ ଏମିତି କିଛି ନିଆରା ହୋଟେଲ ରହିଛି, ଯାହା ହୁଏତ ଆପଣଙ୍କୁ ଅଜଣା ଥିବ। ଜାଣିବା ସେମିତି
କିଛି ହୋଟେଲ ସମ୍ପର୍କରେ…
ଟ୍ରି ହୋଟେଲ, ସ୍ବିଡେନ୍- ନଁା ଶୁଣିକି ହୁଏତ ଆଶ୍ଚର୍ଯ୍ୟ ହେଉଥିବେ। କିନ୍ତୁ ଏହା ସତ। ସ୍ବିଡେନ୍ର ଲୁଲେ ନଦୀ ଉପତ୍ୟକାରେ ଏହି ହୋଟେଲ୍ ଉପସ୍ଥିତ। ଗଛ ଉପରେ ତିଆରି ହୋଇଥିବା ଏହି ହୋଟେଲଟି କ୍ୟୁବ୍ ଆକାରର, ଯାହାର ଚାରିପଟ ମିରର୍ ଦ୍ୱାରା ଆଚ୍ଛାଦିତ। ଗଛଗୁଡ଼ିକର ପ୍ରତିଫଳନ ଏହା ଉପରେ ପଡ଼ୁଥିବାରୁ ହୋଟେଲଟି ସୁନ୍ଦର ଦେଖାଯାଏ। ‘ଦ ଟ୍ରି ଲଭର୍’ ଫିଲ୍ମରୁ ଅନୁପ୍ରାଣିତ ହୋଇ ଜୋନାସ୍ ସେଲ୍ବର୍ଗ ଅଗଷ୍ଟସେନ୍ ଏହି ହୋଟେଲଟି ତିଆରି କରିଥିଲେ।
ସନ୍ କ୍ରୁଇଜ୍ ରିସର୍ଟ, ସାଉଥ୍ କୋରିଆ- ସୂର୍ଯ୍ୟକିରଣ ଓ ପ୍ରାକୃତିକ ସୌନ୍ଦର୍ଯ୍ୟ ପାଇଁ ଏହି ସ୍ଥାନଟି ବେଶ୍ ପ୍ରସିଦ୍ଧ। ହୋଟେଲଟି ଜାହାଜ ଆକୃତିରେ ତିଆରି ହୋଇଛି, ଯାହା ସେଠାରେ ଥିବା ପାହାଡ଼ ଉପରେ ଅବସ୍ଥିତ। ସୂର୍ଯ୍ୟଙ୍କ ପ୍ରଥମ କିରଣ ଏଠାରେ ପଡ଼ୁଥିବାରୁ ଏହାର ସୌନ୍ଦର୍ଯ୍ୟ ଖୁବ୍ ନିଆରା। ହୋଟେଲଟିରେ ୨୧୧ଟି ରୁମ୍, କ୍ଲବ୍, ଓ୍ବାଟର ପୁଲ୍ ଆଦି ରହିଛି।
ଆଇସ୍ ହୋଟେଲ, ସ୍ବିଡେନ୍- ୧୯୮୯ରେ ତିଆରି ହୋଇଥିବା ଏଇ ହୋଟେଲଟି ହେଉଛି ପୃଥିବୀର ପ୍ରଥମ ହୋଟେଲ, ଯାହା ବରଫରେ ତିଆରି ହୋଇଛି। ପ୍ରତି ବର୍ଷ ଶୀତଦିନେ ଏହାର ଆକାରକୁ ବଦଳାଯାଏ। ଉଭୟ ଗରମ ଏବଂ ଥଣ୍ଡା ଥିବା ରୁମ୍ ଏଠାରେ ୧୫୦ଟି ରହିଛି। ଏଠାର ବେଡ଼୍ଗୁଡ଼ିକ ମଧ୍ୟ ବରଫରେ ତିଆରି ହୋଇଛି। ଏହାଛଡ଼ା ଏଠାରେ ଆଇସ୍ ଚର୍ଚ୍ଚ, ଆଇସ୍ ବାର୍, ଆଇସ୍ ଷ୍ଟୁଡିଓ ଏବଂ ଗରମ ଥିବା ୨ଟି ରେଷ୍ଟୁରାଣ୍ଟ ଓ ୪ଟି ମିଟିଂ ରୁମ୍ ରହିଛି।
କୋଷ୍ଟା ଭର୍ଡ଼େ, କୋଷ୍ଟାରିକା- ପ୍ରଶାନ୍ତ ମହାସାଗର ନିକଟବର୍ତ୍ତୀ କୋଷ୍ଟାଲ୍ ରେନ୍ ଫରେଷ୍ଟରେ ଏହି ହୋଟେଲ୍ ଅବସ୍ଥିତ। ଏହା ଦେଖିବାକୁ ଉଡ଼ାଜାହାଜ ପରି। ୧୯୬୫ ମସିହାରେ ତିଆରି ହୋଇଥିବା ‘ବୋଇଙ୍ଗ୍-୭୨୭’ ଉଡ଼ାଜାହାଜ ଆକୃତି ଅନୁଯାୟୀ ଏହା ତିଆରି ହୋଇଛି। ଏହା ମଧ୍ୟରେ ଥାଇ ଜଣେ ‘କାନୋପି’ ଜଙ୍ଗଲର ମନୋରମ ଦୃଶ୍ୟକୁ ଉପଭୋଗ କରିପାରିବ।
ଫିନ୍ ଲଫ୍ ରିସର୍ଟ, ନର୍ଦନ ଆୟର୍ଲାଣ୍ଡ- ଏହା ଦେଖିବାକୁ ବବଲ୍ସ ବା ଫୋଟକା ପରି ଓ ଟ୍ରାନ୍ସପରେଣ୍ଟ। ଏହା ମଧ୍ୟରେ ରହିଲେ ଆପଣ ବାହାର ଦୃଶ୍ୟକୁ ଭଲ ଭାବେ ଅର୍ଥାତ୍ ୧୮୦ଂ ରେ ଦେଖିପାରିବେ। ମୁଖ୍ୟତଃ ରାତି ସମୟରେ ବାହାର ସୌନ୍ଦର୍ଯ୍ୟକୁ ଭଲ ଭାବେ ଉପଭୋଗ କରିପାରିବେ।
