ଅମରପାଲି, ୧୧।୭(ଡି.ଏନ.ଏ.): ସୁବର୍ଣ୍ଣପୁର ଜିଲା ବୀରମହାରାଜପୁର ମୁଖ୍ୟ ଛକଠାରୁ ରେଢ଼ାଖୋଲ- ବୀରମହାରାଜପୁର ସୀମାବର୍ତ୍ତୀ ଅମରପାଲି ପର୍ଯ୍ୟନ୍ତ ହେଉଥିବା ରାସ୍ତା କାମ ନିମ୍ନମାନର ହେଉଥିବା ଅଭିଯୋଗ ହେଉଛି। ଗୁରୁବାର ଅମରପାଲି ଗ୍ରାମବାସୀ କାମକୁ ବନ୍ଦ କରି ପ୍ରତିବାଦ ଜଣାଇଛନ୍ତି । ବିଭାଗୀୟ ଯନ୍ତ୍ରୀ ଓ ଏସଡିଓ ନ ଆସିବା ପର୍ଯ୍ୟନ୍ତ କାମ ଆରମ୍ଭ କରାଇ ଦିଆଯିବ ନାହିଁ ବୋଲି ସେମାନେ କହିଛନ୍ତି । ଉକ୍ତ ରାସ୍ତାଟି ଗତବର୍ଷଠାରୁ ପୂର୍ତ୍ତ ବିଭାଗକୁ ଯାଇଛି। ଉକ୍ତ ରାସ୍ତାକୁ ପୁର୍ନ ନିର୍ମାଣ ପାଇଁ ପ୍ରାୟ ୨୬ କୋଟି ୨୯ ଲକ୍ଷ ୩୮ ହଜାର ୭୧୦ ଟଙ୍କା ଅଟକଳ ହୋଇ କାର୍ଯ୍ୟ ଆରମ୍ଭ ମଧ୍ୟ ହୋଇସାରିଛି । ୨୩ କିମି ୫୫୦ ମିଟର ଦୀର୍ଘ ଉକ୍ତ ରାସ୍ତାର କାମକୁ ବ୍ରିଲିଏଣ୍ଟ ଇନଫ୍ରା ପ୍ରୋଜେକ୍ଟ ପ୍ରାଇଭେଟ ଲିମିଟେଡ ନାମକ ଏକ ସଂସ୍ଥା କାମ କରୁଛି । ଏବେ ରାସ୍ତାର ଉଭୟ ପାର୍ଶ୍ୱରେ ମାଟି ଖୋଳି ବାଲି ଓ ଚିପ୍ସ ଦିଆ ଯାଉଛି। ମାତ୍ର ଉଭୟ ପାର୍ଶ୍ୱରେ ଆବଶ୍ୟକୀୟ ଗଭୀର ପର୍ଯ୍ୟନ୍ତ ମାଟି ଖୋଳାଯାଉ ନାହିଁ । ସେଥିରେ ନାମକୁ ମାତ୍ର ବାଲି ଦିଆଯାଉଛି । ଚିପ୍ସ ଓ ଡଷ୍ଟ ଆବଶ୍ୟକ ପରିମାଣ ଅନୁଯାୟୀ ଦିଆ ନ ଯାଇ ମାତ୍ରାଧିକ ଡଷ୍ଟ ଦେଇ କାଁ ଭାଁ ଚିପ୍ସ ଦିଆଯାଉଛି । ଉଭୟ ପାର୍ଶ୍ୱକୁ ସମାନ ପରିମାଣର ଓସାର କରାଯାଉ ନାହିଁ । କେତେକ ସ୍ଥାନରେ ଲୋକଙ୍କୁ ଅନୁଗ୍ରହୀତ ହୋଇ ସେହି ସ୍ଥାନ ମାନଙ୍କରେ ଓସାର କରାଯାଉ ନଥିବା ଅଭିଯୋଗ ହୋଇଛି । ରାସ୍ତାର ଉଭୟ ପାର୍ଶ୍ୱରେ ମୋରମ ବଦଳରେ ମାଟି ଓ ନିମ୍ନମାନର ମୋରମ ଦିଆଯାଉଛି। କାମ କରୁଥିବା ବେଳେ କାର୍ଯ୍ୟରତ କର୍ମଚାରୀଙ୍କୁ କହିଲେ ମଧ୍ୟ ସେମାନେ କାହାରି କଥା ଶୁଣୁ ନାହାନ୍ତି । କାର୍ଯ୍ୟ ତଦାରଖ କରୁଥିବା କେତେକ ଅସାଧୁ କର୍ମଚାରୀ ମୋରମ ବଦଳରେ ମାଟି ଦେଲେ ମଧ୍ୟ ବିଭାଗୀୟ ଯନ୍ତ୍ରୀ କିଛି କହିବେ ନାହିଁ ବୋଲି କହୁଛନ୍ତି। ଏନେଇ ବିଭାଗୀୟ ଯନ୍ତ୍ରୀ ମହେଶ୍ୱର ପାଶାଙ୍କୁ ପଚାରିବାରୁ ସେ କହିଲେ ଯେ, ମୁଁ ଶୁକ୍ରବାର ଯାଇ କାମ ତଦାରଖ କରିବି । ବହଲପଦର ସମିତି ସଭ୍ୟ ପୀତାମ୍ବର ସାହୁଙ୍କ ନେତୃତ୍ୱରେ ଗ୍ରାମର ସୁଶୀଲ ସାହୁ, ଜନ୍ମେଜୟ ପଧାନ, ପ୍ରଫୁଲ୍ଲ ସାହୁ, ଦଫା ସାହୁ, ବିକ୍ରମ ସେ, ଭଗବତ ପଧାନ, ସୁରେଶ ସାହୁ, ବାଞ୍ଝା ଅଙ୍ଗ୍ରିଆ, ଲକ୍ଷୀନ୍ଦ୍ର ପଧାନ ପ୍ରମୁଖ ଅମରପାଲିଠାରେ କାମକୁ ବନ୍ଦ କରି ପ୍ରତିବାଦ କରିଛନ୍ତି।
