ବେଜିଂ, ୧୩।୧ : କରୋନାର ଏନ୍ତୁଡ଼ିଶାଳ ଚାଇନାରେ ପୁଣି କରୋନ ସ୍ଥିତି ଅଣାୟତ୍ତ ହେବାରେ ଲାଗିଛି। ଚାଇନା ନିଜର ’ଜିରୋ କୋଭିଡ ପଲିସି’ ଅନ୍ତର୍ଗତ ଆକ୍ରାନ୍ତଙ୍କ ସହ ଖେଳୁଛି। ସୋସିଆଲ ମିଡିଆରେ ଏହାର କିଛି ଭିଡିଓ ଏବେ ଭାଇରାଲ ହେବାରେ ଲାଗିଛି। ଭିଡ଼ିଓରେ ଦେଖିବାକୁ ମିଳୁଛି ଯେ ଲକ୍ଷ ଲକ୍ଷ ଲୋକଙ୍କୁ କ୍ୟାଣ୍ଟିନ କ୍ୟାମ୍ପରେ ରଖାଯାଇଥିବାବେଳେ ବହୁ ସଂକ୍ରମିତଙ୍କୁ ଧାତବ ବାକ୍ସରେ ବନ୍ଦୀ କରି ରଖାଯାଇଛି।
ଚାଇନା ଆସନ୍ତା ମାସରେ ଶୀତକାଳୀନ ଅଲିମ୍ପିକ୍ସ ଆୟୋଜନ କରିବାକୁ ଯାଉଥିବାରୁ ଏହାକୁ ଦୃଷ୍ଟିରେ ରଖି ଏଭଳି ପଦକ୍ଷେପ ଗ୍ରହଣ କରିଛି।
ପ୍ରତ୍ୟେକ ବ୍ୟକ୍ତିଙ୍କ ମୋବାଇଲରେ ’ଟ୍ରାକ ଏବଂ ଟ୍ରେସ’ ଆପକୁ ରଖିବାକୁ ବାଧ୍ୟତା ମୂଳକ କରାଯାଇଛି। ଏହା ମାଧ୍ୟମରେ, ଆକ୍ରାନ୍ତ ବ୍ୟକ୍ତିଙ୍କ ସଂସ୍ପର୍ଶରେ ଆସିଥିବା ସମସ୍ତ ଲୋକଙ୍କୁ ଚିହ୍ନଟ କରାଯାଇ କ୍ୱାଣ୍ଟିନ କ୍ୟାମ୍ପକୁ ପଠାଯାଉଛି। ସରକାରଙ୍କ କଟକଣା ଯୋଗୁ ଦୁଇ କୋଟିିରୁ ଅଧିକ ଲୋକ ଘରେ ବନ୍ଦୀ ରହିଛନ୍ତି।
ବହୁ ଲୋକଙ୍କ ପାଖରେ ଖାଦ୍ୟ ସାମଗ୍ରୀ ନଥିବାରୁ ସେମାନେ ଭୋକିଲା ରହୁଛନ୍ତି। ସେମାନଙ୍କୁ ଖାଦ୍ୟ ଓ ପାନୀୟଜଳ ଆଣିବା ଲାଗି ବାହାରକୁ ଯିବାକୁ ଅନୁମତି ଦିଆଯାଉ ନାହିଁ। ସରକାରୀ ଆଇନ ଭୟରେ ଲୋକମାନେ ନିଜ ସହର ଛାଡି ଚାଲିଯାଉଥିବା ମଧ୍ୟ ଦେଖିବାକୁ ମିଳୁଛି।
ରାତି ଅଧରେ ଲୋକଙ୍କୁ ନିଦରୁ ଉଠାଇ ଘରୁ ବାହାରି କ୍ୟାମ୍ପକୁ ଯିବାକୁ କୁହାଯାଉଛି। ସେମାନଙ୍କୁ ବସ୍ରେ ଭର୍ତ୍ତି କରାଯାଇ କ୍ୟାମ୍ପକୁ ନିଆଯାଉଛି।
ଟୁଇଟରରେ ସୋଙ୍ଗପିଆଙ୍ଗ ନାମକ ଜଣେ ଚାଇନା ନାଗରିକ ସରକାର କୋଭିଡ ନୀତି ଏବଂ ନାଗରିକଙ୍କ ଉପରେ ଦମନ କରିବାର ଭିଡିଓ ଅପ୍ଲୋଡ୍ କରିଛନ୍ତି। ଏସବୁୂ ଭିଡ଼ିଓ ନେଇ ଅନ୍ତର୍ଜାତୀୟ ମାନବାଧିକାର ସଂଗଠନଗୁଡ଼ିକ ପକ୍ଷରୁ ଚିନ୍ତା ପ୍ରକଟ କରାଯାଇଛି।
କରୋନାରେ ଆକ୍ରାନ୍ତ ଗର୍ଭବତୀ ମହିଳା, ଶିଶୁ ଏବଂ ବୃଦ୍ଧମାନଙ୍କୁ ଧାତବ ବାକ୍ସରେ ଦୁଇ ସପ୍ତାହ ପାଇଁ ବନ୍ଦୀ କରି ରଖାଯାଉଛି। ସେମାନଙ୍କ ପାଇଁ କାଠ ବେଡ୍ ଏବଂ ଦୁଇଟି କାଠରେ ଶୌଚାଳୟ ନିର୍ମାଣ କରାଯାଇଛି। ସେଠାରେ ସେମାନେ ଅତି ଦୟନୀୟ ଭାବେ ରହୁଥିବାର ଭିଡ଼ିଓ ସୋସିଆଲ ମିଡ଼ିଆରେ ଭାଇରାଲ ହେବା ପରେ ଅନ୍ତର୍ଜାତୀୟସ୍ତରରେ ଲୋକଙ୍କ ମଧ୍ୟରେ ଆକ୍ରୋଶ ସୃଷ୍ଟି ହେବାରେ ଲାଗିଛି।
