ବ୍ରହ୍ମପୁର ଅଫିସ,୮ା୧: ଡାକ୍ତର ସୁମିତ ସାହୁ-ତପସ୍ବିନୀ ଦାଶ ପାରିବାରିକ ବିବାଦ ନୂଆମୋଡ଼ ନେଇଛି। ଜିଲାଜଜ୍ଙ୍କ ନିର୍ଦ୍ଦେଶକ୍ରମେ ଗୁରୁବାର ରାତିରେ ତପସ୍ବିନୀ ବ୍ରହ୍ମାନଗର ଦ୍ୱିତୀୟ ଲାଇନ୍ସ୍ଥିତ ଶାଶୁଘରେ ପ୍ରବେଶ କରିଥିଲେ। ଏହାର କିଛି ସମୟ ପରେ ଶ୍ୱଶୁର ପ୍ରମୋଦ ସାହୁ ଘର ଛାଡ଼ିଛନ୍ତି। ନିଜକୁ ଅସୁରକ୍ଷିତ ମନେ କରୁଥିବାରୁ ସେ ଘର ଛାଡ଼ିଥିବା ଏକ ଭିଡିଓ ବାର୍ତ୍ତାରେ କହିଛନ୍ତି। ପ୍ରଶାସନିକ ଅଧିକାରୀ ଓ ପୋଲିସ ଅଧିକାରୀମାନେ ତାଙ୍କ ଅନିଚ୍ଛା ସତ୍ତ୍ୱେ ତପସ୍ବିନୀଙ୍କୁ ଘରେ ପ୍ରବେଶ କରାଇଛନ୍ତି ବୋଲି ପ୍ରମୋଦ କହିଛନ୍ତି।
ଶ୍ୱଶୁର ପ୍ରମୋଦ କହିଛନ୍ତି, କୋର୍ଟଙ୍କ ରାୟରେ କିଛି ଦ୍ୱନ୍ଦ୍ୱ ଥିଲା। ତାହାକୁ ଭଲଭାବେ ବୁଝାଶୁଝା ନ କରି ପ୍ରଶାସନିକ ଅଧିକାରୀମାନେ ତପସ୍ବିନୀଙ୍କୁ ଘରେ ପୂରାଇଲେ। ଏ ଦିଗରେ ପୋଲିସକୁ ଅବଗତ କରିଛି। ଘର ତଦାରଖ କରି ସୁରକ୍ଷା ବ୍ୟବସ୍ଥା କରିବାକୁ ଜଣାଇଛି। ପୂର୍ବରୁ ବୋହୂ ମୋ’ ନାମରେ ଏବଂ ପରିବାରବର୍ଗଙ୍କ ନାମରେ ମିଥ୍ୟା ଅଭିଯୋଗ ଆଣିଥିଲେ। ଯୌତୁକଜନିତ ନିର୍ଯାତନା ମାମଲା ରୁଜୁ କରିଥିଲେ। ତେଣୁ ଭୟଭୀତ ହୋଇ ରାତାରାତି ଘର ଛାଡ଼ି ଚାଲିଆସିଛି। ଯେ କୌଣସି ଜାଗାରେ ରହିବି ଓ ପରେ ଘରକୁ ଫେରିବି ବୋଲି ଶ୍ୱଶୁର ପ୍ରମୋଦ ଭିଡ଼ିଓ ବାର୍ତ୍ତାରେ କହିଛନ୍ତି। ଅନ୍ୟପକ୍ଷରେ ଡା. ସୁମିତ ସ୍ବାସ୍ଥ୍ୟଗତ ସମସ୍ୟା ଦର୍ଶାଇ ଶୁକ୍ରବାରଠାରୁ ଆଉ ୧୫ଦିନ ଛୁଟି ନେଇଥିବା ବାଲିସିରା ଗୋଷ୍ଠୀ ସ୍ବାସ୍ଥ୍ୟ ଉନ୍ନୟନ ଅଧିକାରୀ ଏମ.ଭି.କେ. ଅଶୋକ ସୂଚନା ଦେଇଛନ୍ତି। ତାଙ୍କ ଓକିଲ ସୁରେନ୍ଦ୍ର ବେହେରା କହିଛନ୍ତି, ଗତ ୪ ତାରିଖରେ ଜିଲାଜଜ୍ ଯେଉଁ ରାୟ ଦେଇଥିଲେ ସେଥିରେ ସୁମିତ ମାସିକ ୧୭ହଜାର ଟଙ୍କା ଭରଣପୋଷଣ ବାବଦରେ ଦେବେ ବୋଲି ଉଲ୍ଲେଖ ରହିଥିଲା। ତପସ୍ବିନୀ ଶାଶୁଘରେ ରହିବେ ବୋଲି କୌଣସି ନିର୍ଦ୍ଦେଶ ନ ଥିଲା। କିନ୍ତୁ ପ୍ରଶାସନିକ ଅଧିକାରୀମାନେ ଜୋରଜବରଦସ୍ତ ତପସ୍ବିନୀଙ୍କୁ ଶାଶୁଘରେ ରଖିଛନ୍ତି। ପୂର୍ବରୁ ତପସ୍ବିନୀ ମାମଲା ରୁଜୁ କରିଥିବାରୁ ଶ୍ୱଶୁର ନିଜକୁ ଅସୁରକ୍ଷିତ ମନେ କରି ଘର ଛାଡ଼ିଥିବା ଓକିଲ ବେହେରା କହିଛନ୍ତି।
