ରାଞ୍ଚି, ୨୦।୧୧: ନ୍ୟୁଜିଲାଣ୍ଡ ବିପକ୍ଷ ଦ୍ୱିତୀୟ ଟି୨୦ ମୁକାବିଲାରେ ଅନ୍ତର୍ଜାତୀୟ ଡେବ୍ୟୁ କରିଛନ୍ତି ଆଇପିଏଲ୍ରେ ଚମତ୍କାର ପ୍ରଦର୍ଶନ କରିଥିବା ହର୍ଶଲ ପଟେଲ। ଚଳିତ ବର୍ଷ ସେ ଆଇପିଏଲ୍ରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ପାଇଁ ଇତିହାସ ରଚି ୩୨ ଉଇକେଟ ନେଇ ପର୍ପଲ କ୍ୟାପ୍ ନିଜ ନାମରେ କରିଥିଲେ। ତେବେ ଶୁକ୍ରବାର ଖେଳାଯାଇଥିବା ଉକ୍ତ ମ୍ୟାଚ୍ ପୂର୍ବରୁ ଏବି ଡି’ଭିଲର୍ସ କ୍ରିକେଟରୁ ସନ୍ୟାସ ନେବା ନେଇ ଘୋଷଣା କରିଥିଲେ। ମ୍ୟାଚ୍ ପରେ ସେ ଖବରଦାତା ସମ୍ମିଳନୀକୁ ସମ୍ବୋଧିତ କରି ଡି’ଭିଲର୍ସଙ୍କୁ ମନେ ପକାଇଥିଲେ। ଏଥିସହ ସେ ତାଙ୍କ ସହ ଜଡ଼ିତ ଏକ ସ୍ମୃତିକୁ ସମସ୍ତଙ୍କ ସହ ବାଣ୍ଟିଥିଲେ।
ହର୍ଷଲ କହିଥିଲେ, ଡି’ଭିଲର୍ସଙ୍କ ତାଙ୍କୁ ଆଇପିଏଲ୍ରେ ଗୋଟିଏ ଗୁରୁମନ୍ତ୍ର ଦେଇଥିଲେ। ତାହା ବହୁତ ଫାଇଦା ଦେଇଛି। ଏହି କାରଣରୁ ସେ ପ୍ରଥମେ ଆଇପିଏଲ୍ ଏବଂ ଏବେ ଭାରତ ପାଇଁ ନିଜ ଡେବ୍ୟୁ ମ୍ୟାଚ୍ରେ ସଫଳତା ପାଇଛନ୍ତି। ସବୁବେଳେ ତାଙ୍କ କଥାକୁ ମନେ ରହିବ। ଆର୍ସିବିରୁ ଖେଳିବା ସମୟରେ ସେ ଡି’ଭିଲର୍ସଙ୍କୁ ଚୁପ୍ଚାପ ଦେଖିଆସିଛି। ଏକଦା ତାଙ୍କୁ ବଡ଼ ଓଭରରେ ପ୍ରଭାବୀ ବୋଲିଂ କିଭଳି କରିବି ବୋଲି ପଚାରିଥିଲି। ଜବାବରେ ସେ ବ୍ୟାଟ୍ସମ୍ୟାନ୍ ଭଲ ବଲ୍କୁ ପିଟିଲେ ବି ବଲ୍ରେ ପରିବର୍ତ୍ତନ କରିବ ନାହିଁ। ଭଲ ବଲ୍କୁ ମାରିବା ପାଇଁ ତାଙ୍କ ଉପରେ ଚାପ ପକାଅ। କାରଣ ସେ ଭାବିବେ ତୁମେ ଭିନ୍ନ ବଲ୍ ପକାଇବ। ହେଲେ ତାହା ହେବ ନାହିଁ ବୋଲି ଡି’ଭିଲର୍ସ କହିଥିଲେ।
ଡେବ୍ୟୁ ମ୍ୟାଚ୍ରେ ପ୍ଲେୟାର ଅଫ୍ ଦ ମ୍ୟାଚ୍ ଥିବା ହର୍ଷଲ ଆହୁରି କହିଛନ୍ତି, ଦ୍ରୁତ ବୋଲିଂ କରିବାକୁ ହେଲେ ଗତି ଆବଶ୍ୟକ। ହେଲେ ତାଙ୍କୁ ଲାଗିଥିଲା ୧୩୫ କିମିରୁ ଅଧିକ ବେଗରେ ବୋଲିଂ କରିପାରିବି ନାହିଁ। ବହୁତ ଚେଷ୍ଟା କରିବା ପରେ ମଧ୍ୟ ୧୪୦ ହେଉଛି। ହେଲେ ତାଠାରୁ ଅଧିକ ନୁହେଁ ବୋଲି ସେ କହିଛନ୍ତି।
