ଦୁବାଇ,୧୬।୧୧: ୨୦୨୪ରୁ ୨୦୩୧ ମଧ୍ୟରେ ହେବାକୁ ଥିବା ପ୍ରତ୍ୟେକ ଆଇସିସି ଇଭେଣ୍ଟର ଆୟୋଜକଙ୍କ ତାଲିକା ମଙ୍ଗଳବାର ପ୍ରକାଶ କରିଛି ଅନ୍ତର୍ଜାତୀୟ କ୍ରିକେଟ କାଉନ୍ସିଲ। ଅନ୍ତିମ ଥର ୨୦୧୭ରେ ଖେଳାଯାଇଥିବା ଚାମ୍ପିୟନ୍ସ ଟ୍ରଫି ଏଥର ଫେରିଛି। ଏହି ଇଭେଣ୍ଟର ପରବର୍ତ୍ତୀ ସଂସ୍କରଣ ୨୦୨୫ରେ ପାକିସ୍ତାନରେ ଖେଳାଯିବ। ଆଇସିସିର ଆଗାମୀ ସାଇକେଲରେ ହେବାକୁ ଥିବା ୨ଟି ଦିନିକିଆ ବିଶ୍ୱକପ୍, ୪ ଟି୨୦ ବିଶ୍ୱକପ୍ ଏବଂ ୨ଟି ଆଇସିସି ପୁରୁଷ ଚାମ୍ପିୟନ୍ସ ଟ୍ରଫି ଇଭେଣ୍ଟର ଆୟୋଜନ ଅଧିକାରୀ ୧୧ ପୂର୍ଣ୍ଣ ସଦସ୍ୟତା ପ୍ରାପ୍ତ ଦେଶ ଓ ୩ ଆସୋସିଏଟ୍ ମେମ୍ବରଙ୍କୁ ଦିଆଯାଇଛି।
ଆମେରିକା ଓ ନାମିବିଆ ପ୍ରଥମ ଥର ପାଇଁ ଆଇସିସି ବିଶ୍ୱକପ୍ ଇଭେଣ୍ଟ ଆୟୋଜନ କରିବେ। ପୂର୍ବରୁ ଅଷ୍ଟ୍ରେଲିଆ, ବାଂଲାଦେଶ, ଇଂଲଣ୍ଡ, ଆୟର୍ଲାଣ୍ଡ, ଭାରତ, ନ୍ୟୁଜିଲାଣ୍ଡ, ପାକିସ୍ତାନ, ସ୍କଟଲାଣ୍ଡ, ଦକ୍ଷିଣ ଆଫ୍ରିକା, ଶ୍ରୀଲଙ୍କା, ଓ୍ବେଷ୍ଟଇଣ୍ଡିଜ ଓ ଜିମ୍ବାଓ୍ବେ କ୍ରିକେଟର ମହାକୁମ୍ଭ ଆୟୋଜନ କରିଥିଲେ। ଆଗାମୀ ଦଶନ୍ଧିରେ ମଧ୍ୟ ଏମାନେ ଆଇସିସିର ମେଜର ଇଭେଣ୍ଟ ଆୟୋଜନ କରିବେ।
କେଉଁ ଇଭେଣ୍ଟର ଆୟୋଜନ ଅଧିକାରୀ କେଉଁ ଦେଶକୁ ମିଳିବ, ତାହା ବିଡିଂ ପ୍ରକ୍ରିୟା ଦ୍ୱାରା ଧାର୍ଯ୍ୟ ହୋଇଥିଲା। ମାର୍ଟିନ ସ୍ନେଡେନ, ସୌରଭ ଗାଙ୍ଗୁଲି ଓ ରିକି ସ୍କେରିଟଙ୍କୁ ନେଇ ଗଠିତ ଏକ ସବ୍ କମିଟିର ତତ୍ତ୍ୱାବଧାନରେ ଏହି ବିଡିଂ ପ୍ରକ୍ରିୟା ଅନୁଷ୍ଠିତ ହୋଇଥିଲା। ଏହି କମିଟିର ସୁପାରିଶକୁ ଆଇସିସି ମ୍ୟାନେଜମେଣ୍ଟ ଅନୁମୋଦନ ଦେଇଛି।
