ଦିଗପହଣ୍ଡି,୧୯ା୪(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ବ୍ଲକ ଭ୍ରମରପୁର ବାଘମରା ସାହିରେ ରବିବାର ଅପରାହ୍ନରେ ପାରିବାରିକ ହିଂସା ଦେଖିବାକୁ ମିଳିଛି । ଜଣେ ମହିଳାଙ୍କୁ ଟାଙ୍ଗିଆରେ ଆକ୍ରମଣ କରାଯାଇଥିବା ଅଭିଯୋଗ ହୋଇଛି । ଆହତ ଜଣକ ହେଲେ ପି. ଗୁନି (୫୫)। ତାଙ୍କୁ ଗୁରୁତର ଅବସ୍ଥାରେ ବମୋକେଇ ଗ୍ରାମ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା। ପ୍ରାଥମିକ ଚିକିତ୍ସା ପରେ ତାଙ୍କୁ ସଙ୍କଟାପନ୍ନ ଅବସ୍ଥାରେ ବ୍ରହ୍ମପୁର ବଡ଼ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି ।
ପାରିବାରିକ ସମସ୍ୟା ଓ ବୈବାହିକ ସମ୍ପର୍କକୁ ନେଇ ଗ୍ରାମର ପି.ଇଗ୍ନିଙ୍କ ଘରେ ଝଗଡା ହୋଇଥିଲା। ପରେ ଘଟଣା ହିଂସାକାଣ୍ଡର ରୂପ ନେଇଥିଲା। ପରସ୍ପର ପରସ୍ପରଙ୍କୁ ଆକ୍ରମଣ ପ୍ରତି ଆକ୍ରମଣ କରିବାରୁ ଏକାଧିକ ଆହାତ ହୋଇଥିଲେ । ଜଣେ ସମ୍ପର୍କୀୟ ପି. କ୍ରିଷ୍ଣା ତାଙ୍କ ହାତରେ ଧରିଥିବା ଟାଙ୍ଗିଆରେ ପି. ଗୁନିଙ୍କ ମୁଣ୍ଡକୁ ଚୋଟ ପକାଇଥିଲେ । ଖବରପାଇ କେ. ନୂଆଗାଁ ଥାନା ଆଇଆଇସି ବିଶ୍ୱଜିତ ନାୟକ, ନୂଆପଡ଼ା ଫାଣ୍ଡି ଅଧିକାରୀ ସୁବାସ ବାୟକ ସଦଳବଳେ ଘଟଣାସ୍ଥଳରେ ପହଞ୍ଚି ପରିସ୍ଥିତି ଆୟତ୍ତ କରିଥିଲେ । ଏନେଇ ଥାନାରେ ଏତଲା ହୋଇଛି । ପୋଲିସ ଜଣେ ଅଭିଯୁକ୍ତ ଙ୍କୁ ଅଟକ ରଖି ତଦନ୍ତ ଚଳାଇଛି।
