ଇସଲାମାବାଦ୍,୧୪।୧୧: ପାକିସ୍ତାନୀ ଜଳରାଶିରେ ବେଆଇନ ଭାବେ ମାଛ ଧରିବା ଅଭିଯୋଗରେ ୨୦ ଜଣ ଭାରତୀୟ ମତ୍ସ୍ୟଜୀବୀଙ୍କୁ ପାକିସ୍ତାନର ଲ୍ୟାଣ୍ଡି ଜିଲା ଜେଲରୁ ମୁକ୍ତ କରାଯାଇଛି। ମୁକ୍ତ ହୋଇଥିବା ମତ୍ସ୍ୟଜୀବୀଙ୍କୁ ସୋମବାର ୱାଘା ସୀମାକୁ ଅଣାଯିବ ଏବଂ ଭାରତୀୟ କର୍ତ୍ତୃପକ୍ଷଙ୍କୁ ହସ୍ତାନ୍ତର କରାଯିବ। ଲ୍ୟାଣ୍ଡି ଜେଲ ଅଧୀକ୍ଷକ ଇରଶାଦ ଶାହା କହିଛନ୍ତି, ଭାରତୀୟ କର୍ତ୍ତୃପକ୍ଷ ମତ୍ସ୍ୟଜୀବୀଙ୍କ ଜାତୀୟତା ନିଶ୍ଚିତ କରିବା ପରେ ସେମାନଙ୍କୁ ସଦ୍ଭାବନା ଭାବରେ ମୁକ୍ତ କରାଯାଇଛି। ମୁକ୍ତ ହୋଇଥିବା ଅଧିକାଂଶ ମତ୍ସ୍ୟଜୀବୀ ଗୁଜୁରାଟର ବୋଲି ଜଣାପଡିଛି।
ଏହି ମତ୍ସ୍ୟଜୀବୀମାନେ ଚାରି ବର୍ଷ ହେବ ପାକିସ୍ତାନ ଜେଲରେ ଥିଲେ। ଅଣ-ଲାଭ ସାମାଜିକ କଲ୍ୟାଣ ସଂଗଠନ ଏଡି ଟ୍ରଷ୍ଟ ଫାଉଣ୍ଡେସନ ମତ୍ସ୍ୟଜୀବୀମାନଙ୍କୁ ଲାହୋରର ୱାଘା ସୀମାକୁ ନିଆଯିବା ପାଇଁ ବ୍ୟବସ୍ଥା କରିଥିଲା। ଏଠାରୁ ସେମାନଙ୍କୁ ସୋମବାର ଦିନ ଭାରତୀୟ କର୍ତ୍ତୃପକ୍ଷଙ୍କୁ ହସ୍ତାନ୍ତର କରାଯିବ। ଏବେ ବି ୫୮୮ ଜଣ ଭାରତୀୟ ନାଗରିକ ଲ୍ୟାଣ୍ଡି ଜେଲରେ ରହିଛନ୍ତି, ସେମାନଙ୍କ ମଧ୍ୟରୁ ଅଧିକାଂଶ ମତ୍ସ୍ୟଜୀବୀ।
ଖବର ଅନୁଯାୟୀ, କୁଚ ଉପକୂଳରୁ ଆରବ ସାଗରର ଅନ୍ତର୍ଜାତୀୟ ସାମୁଦ୍ରିକ ସୀମା ରେଖା (ଆଇଏମ୍ବିଏଲ) ପାର ହୋଇ ପାକିସ୍ତାନର ଅଞ୍ଚଳରେ ପ୍ରବେଶ କରିଥିବା ଅଭିଯୋଗରେ ପାକିସ୍ତାନର ସାମୁଦ୍ରିକ ସୁରକ୍ଷା ଏଜେନ୍ସି (ପିଏମଏସଏ) ଦ୍ୱାରା ସମସ୍ତଙ୍କୁ ଗିରଫ କରାଯାଇଥିଲା। ଏହିପରି ପ୍ରାୟ ୬୦୦ ମତ୍ସ୍ୟଜୀବୀ ପାକିସ୍ତାନ ଜେଲରେ ବନ୍ଦୀ ଅଛନ୍ତି।
