କାବୁଲ,୧୭।୮: ତାଲିବାନ ଆଫଗାନିସ୍ତାନକୁ ସମ୍ପୂର୍ଣ୍ଣ ଦଖଲ କରିଛି। ରାଷ୍ଟ୍ରପତି ଅଶରଫ ଗନି ଦେଶ ଛାଡ଼ି ପଳାଇବା ପରେ ପରିସ୍ଥିତି ଅନିୟନ୍ତ୍ରିତ ହୋଇପଡ଼ିଛି। ଏପରି ସ୍ଥିତିରେ ଆଫଗାନିସ୍ତାନରେ କ୍ରୀଡ଼ା କ୍ଷେତ୍ରରେ ଅସୁବିଧା ଉପୁଜିବାର ସମ୍ଭାବନା ଦେଖାଦେଇଛି।
ତାଲିବାନ ଦେଶର ସମସ୍ତ କ୍ରିକେଟ ଷ୍ଟାଡିୟମକୁ କବ୍ଜା କରିଛି। ଫଳରେ ଖେଳାଳିଙ୍କ ପାଇଁ ଉପଲବ୍ଧ ହେଉଥିବା ସୁବିଧାକୁ ନେଇ ଦ୍ୱନ୍ଦ୍ୱ ଦେଖାଦେଇଛି। ଚଳିତ ବର୍ଷ ଅକ୍ଟୋବର-ନଭେମ୍ବରରେ ୟୁଏଇରେ ଟି-୨୦ ବିଶ୍ୱକପ୍ ଖେଳାଯିବ, ଯେଉଁଥିପାଇଁ ଆଫଗାନିସ୍ତାନ ଦଳ ଯୋଗ୍ୟତା ଅର୍ଜନ କରିଛି। ତେବେ ତାଲିବାନ କ୍ଷମତାକୁ ଆସିବା ପରେ ଦଳ ବିଶ୍ୱକପ ଖେଳିବ କି ନାହିଁ ତାହା ଏଯାବତ ସ୍ପଷ୍ଟ ହୋଇନାହିଁ। ଅପରପକ୍ଷେ ତାଲିବାନ କ୍ରୀଡ଼ାକୁ ବିରୋଧ କରେ ବୋଲି କୁହାଯାଉଛି।
କ୍ରିକେଟ ପ୍ରଶଂସକଙ୍କ ମନରେ ମଧ୍ୟ ବର୍ତ୍ତମାନ ଆଫଗାନିସ୍ତାନ ଖେଳାଳି କେଉଁଠାରେ ଅଛନ୍ତି ତାହାକୁ ନେଇ ପ୍ରଶ୍ନ ଉଠିଛି। ହେଲେ କେବଳ ତିନିଜଣ ଆଫଗାନିସ୍ତାନ ଖେଳାଳିଙ୍କ ବିଷୟରେ ସ୍ପଷ୍ଟ ସୂଚନା ମିଳିଛି।ଷ୍ଟାର ସ୍ପିନର ରସିଦ ଖାନ, ଅଲରାଉଣ୍ଡର ମହମ୍ମଦ ନବୀ ଏବଂ ସ୍ପିନର ମୁଜିବ-ଉର-ରହମାନ। ଏମାନେ ଏବେ ଇଂଲଣ୍ଡର ‘ ଦ ହଣ୍ଡ୍ରେଡ୍’ ଲିଗ୍ରେ ଖେଳୁଛନ୍ତି। ଲିଗ୍ ଶେଷ ହେବା ପର୍ଯ୍ୟନ୍ତ ସେମାନେ ଏଠାରେ ରହିବେ।
ଆସନ୍ତା ମାସରୁ ଆଫଗାନିସ୍ତାନ ପାକିସ୍ତାନ ସହ ତିନି ମ୍ୟାଚ୍ ବିଶିଷ୍ଟ ଟି-୨୦ ସିରିଜ ଖେଳିଥାନ୍ତା। ପୂର୍ବରୁ ଏହା ୟୁଏଇରେ ଖେଳାଯାଇଥାନ୍ତା ହେଲେ ଏହାକୁ ଶ୍ରୀଲଙ୍କା ସ୍ଥାନାନ୍ତର କରାଯାଇଥିଲା। ତାଲିବାନ କ୍ଷମତାକୁ ଆସିବା ପରେ ଏହି ସିରିଜ ଉପରେ ମଧ୍ୟ ସଙ୍କଟ ଦେଖାଦେଇଛି।
କହିରଖୁଛୁ, ଆଫଗାନିସ୍ତାନ କ୍ରିକେଟ ବୋର୍ଡ ସିଇଓ ହମିଦ ସିନ୍ଓ୍ବାରୀ କହିଛନ୍ତି, ରାଜନୈତିକ ପରିବର୍ତ୍ତନ ପରେ କ୍ରିକେଟ କ୍ଷତିଗ୍ରସ୍ତ ହେବ ନାହିଁ। କାରଣ ତାଲିବାନ ଏହି ଖେଳକୁ ପସନ୍ଦ କରେ। ଏହାକୁ ସମର୍ଥନ କରେ।
