ପୁରୀ ଅଫିସ,୧୯ା୭: ଶ୍ରୀଗୁଣ୍ଡିଚା ମନ୍ଦିର ଆଡ଼ପ ମଣ୍ଡପରେ ମହାପ୍ରଭୁଙ୍କ ଲୀଳାଖେଳା ସରି ଆସୁଛି। ଆଉ ଦିନକ ପରେ ମଙ୍ଗଳବାର ଆଡ଼ପମଣ୍ଡପରୁ ଶ୍ରୀମନ୍ଦିର ଅଭିମୁଖେ ବାହୁଡ଼ିିବେ ଚତୁର୍ଦ୍ଧାମୂର୍ତ୍ତି। ସୋମବାର ନବମୀ ସନ୍ଧ୍ୟା ଦର୍ଶନ। ତେବେ କଟକଣା ଯୋଗୁ ଗତବର୍ଷ ପରି ଚଳିତବର୍ଷ ମଧ୍ୟ ଭକ୍ତମାନେ ମହାପ୍ରଭୁଙ୍କ ସନ୍ଧ୍ୟା ଦର୍ଶନରୁ ବଞ୍ଚିତ ହେବେ। ତେଣୁ ଭକ୍ତଙ୍କ ମନରେ ନିରାଶା ଭାବ ଛାଇଯାଇଛି। ଶରଧାବାଲି ଓ ଗୁଣ୍ଡିଚା ମନ୍ଦିର ଅଞ୍ଚଳରେ ଗହଳଚହଳ ନାହିଁ। ସୋମବାର ପହୁଡ଼ ଆଳତି ପରେ ଦଇତାପତି ସେବାୟତଙ୍କ ଦ୍ୱାରା ବାହୁଡ଼ାଯାତ୍ରା ପାଇଁ ସେନାପଟା ଲାଗି, ବାହୁଟକଣ୍ଟ ଲାଗି ଆଦି ବିଶେଷ ନୀତି କରାଯିବ। ସେହିଭଳି ପହଣ୍ଡି ପାଇଁ କୋଠସୁଆଁସିଆ ସେବାୟତମାନେ ରତ୍ନସିଂହାସନରେ ଚାରମାଳ ବନ୍ଧା କାର୍ଯ୍ୟ ସମ୍ପନ୍ନ କରିବେ। ଅନ୍ୟପକ୍ଷରେ ବାହୁଡ଼ାଯାତ୍ରା ପାଇଁ ପ୍ରଶାସନ ପକ୍ଷରୁ ଜୋରଦାର ପ୍ରସ୍ତୁତି ଚାଲିଛି। ସୋମବାର ମହାପ୍ରଭୁଙ୍କ ସେନାପଟା ଲାଗି ଓ ପହଣ୍ଡି ପାଇଁ ଜନ୍ମବେଦି ତଳେ କୋଠ ସୁଆଁସିଆଙ୍କ ଦ୍ୱାରା ଚାରମାଳ ବନ୍ଧାଯିବ। ମଙ୍ଗଳବାର କଡ଼ା କଟକଣା ଭିତରେ ବାହୁଡ଼ାଯାତ୍ରା ହେବ।
