ହାଇଦ୍ରାବାଦ, ୧୭ା୬- ହାଇଦ୍ରାବାଦ କ୍ରିକେଟ ଆସୋସିଏଶନ (ଏଚ୍ସିଏ)ର ଆପେକ୍ସ କାଉନ୍ସିଲ ଏହାର ସଭାପତି ତଥା ଭାରତର ପୂର୍ବତନ ଅଧିନାୟକ ମହମ୍ମଦ ଆଝାରୁଦ୍ଦିନଙ୍କୁ ସସ୍ପେଣ୍ଡ କରିଛି। ସେ କ୍ରିକେଟ ଆସୋସିଏଶନର ସମ୍ବିଧାନ ଉଲ୍ଲଂଘନ କରିଛନ୍ତି। ତାଙ୍କ ବିରୋଧରେ ସ୍ବାର୍ଥ ନିହିତ ଦ୍ୱନ୍ଦ୍ୱ ଅଭିଯୋଗ ହୋଇଛି। ସଭାପତିଙ୍କୁ ସସ୍ପେଣ୍ଡ କରିବାର କ୍ଷମତା ରାଜ୍ୟ ଆସୋସିଏଶନର ସାଧାରଣ ପରିଷଦ ପାଖରେ ରହିଛି, ଆପେକ୍ସ କାଉନ୍ସିଲର ନୁହେଁ। ତେଣୁ ଆଝାରୁଦ୍ଦିନଙ୍କୁ ସସ୍ପେଣ୍ଡ କରାଯିବାର ବୈଧତାକୁ ନେଇ ସାଧାରଣ ପରିଷଦ ବୈଠକରେ ପ୍ରଶ୍ନ ଉଠାଯାଇପାରେ।
ଇତିମଧ୍ୟରେ ଆପେକ୍ସ କାଉନ୍ସିଲର ୫ଜଣ ସଦସ୍ୟଙ୍କ ବିରୋଧରେ ଏଚ୍ସିଏର ଅମ୍ବୁଡ୍ସମ୍ୟାନଙ୍କ ତରଫରୁ ତଦନ୍ତ ଚାଲିିଛି। ସେମାନେ ଏକାଧିକ କ୍ଲବର ମାଲିକ ଅଛନ୍ତି। ଯୁବ କ୍ରିକେଟରମାନଙ୍କୁ ଶୋଷଣ କରୁଛନ୍ତି। ସେମାନେ ହିଁ ଅମ୍ବୁଡ୍ସମ୍ୟାନ ନିଯୁକ୍ତିକୁ ବିରୋଧ କରିଆସୁଥିଲେ ବୋଲି ଆଝାରୁଦ୍ଦିନ କହିଛନ୍ତି। ଏଚ୍ସିଏ ଆପେକ୍ସ କାଉନ୍ସିଲ ଓ ଆଝାରୁଦ୍ଦିନଙ୍କ ମଧ୍ୟରେ କିଛିଦିନ ହେଲା ଛକାପଞ୍ଝା ଚାଲିଛି। ନିକଟରେ ଅନୁଷ୍ଠିତ ବିସିସିଆଇର ସ୍ବତନ୍ତ୍ର ସାଧାରଣ ବୈଠକ(ଏସ୍ଜିଏମ୍) ବେଳେ ଆପେକ୍ସ କାଉନ୍ସିଲ ଶିବଲାଲ ଯାଦବଙ୍କୁ ସେମାନଙ୍କ ପ୍ରତିନିଧି ଭାବେ ପଠାଇବାକୁ ଚାହୁଁଥିଲା। ମାତ୍ର ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)ର ହସ୍ତକ୍ଷେପ ଯୋଗୁ ଆଝାରୁଦ୍ଦିନ ଏହି ବୈଠକରେ ଯୋଗ ଦେଇଥିଲେ।
