ଭୁବନେଶ୍ୱର,୧୫।୬(ବ୍ୟୁରୋ): ଓଡ଼ିଶାରେ ନକଲି ଔଷଧର କାରବାର ବହୁ ପୁରୁଣା। ୨୦୦୭ ଜୁଲାଇ ୨୦ରେ ବଲାଙ୍ଗୀର ଜିଲା କଣ୍ଟାବାଞ୍ଜି ସହରରେ ନକଲି ଔଷଧ କାରଖାନା ଠାବ ହୋଇଥିଲା। ସେଠାରେ ୩୦ଟି ନାମୀ କମ୍ପାନୀର ୩୯୨ ପ୍ରକାର ଏଲୋପାଥି ଓ ଆୟୁର୍ବେଦିକ ଔଷଧ ନକଲ ହେଉଥିବା ଜଣାପଡ଼ିଥିଲା, ଯାହାକି ରାଜ୍ୟରେ ଚହଳ ପକାଇଥିଲା। ଜୀବନ ରକ୍ଷାକାରୀ ଔଷଧ ନଁାରେ କିଭଳି ଠକେଇ ଚାଲିଥିଲା ଏବଂ ରାଜ୍ୟର କୋଣଅନୁକୋଣରେ ସେ ସବୁର ବହୁଳ ବିକ୍ରି ପାଇଁ ଯୋଜନାବଦ୍ଧ ର଼୍ୟାକେଟ୍ କିପରି କାର୍ଯ୍ୟ କରୁଥିଲା ତାହା କ୍ରମଶଃ ଜଣାପଡ଼ିଥିଲା। ଏହି ଘଟଣାରେ ବଲାଙ୍ଗୀର ଜିଲାର ତତ୍କାଳୀନ ଡ୍ରଗ୍ସ ଇନ୍ସପେକ୍ଟର ଏବଂ ନକଲି ଔଷଧ କାରବାରର କିଙ୍ଗପିନ୍ ଶଙ୍କରଲାଲ ଅଗ୍ରଓ୍ବାଲ, ତାଙ୍କ ପୁଅ ସମେତ ୫ଜଣଙ୍କୁ ଗିରଫ କରାଯାଇଥିଲା। ଏହାସହିତ ରାଜ୍ୟବ୍ୟାପୀ ଔଷଧ ଦୋକାନଗୁଡ଼ିକରେ ଚଢ଼ାଉ କରାଯାଇ ନମୁନା ସଂଗ୍ରହ କରାଯିବା ସହ କ୍ରାଇମବ୍ରାଞ୍ଚ୍ ଦ୍ୱାରା ତଦନ୍ତ କରାଯାଇଥିଲା। ତେବେ ସେହି ସମୟରେ ସବୁଠୁ ବଡ଼ ଚର୍ଚ୍ଚା ଥିଲା ନକଲି ଔଷଧ ବ୍ୟବସାୟୀ ଶଙ୍କରଲାଲ ଅଗ୍ରଓ୍ବାଲଙ୍କ ସହ ପଶ୍ଚିମାଞ୍ଚଳର ଜଣେ ତତ୍କାଳୀନ ମନ୍ତ୍ରୀଙ୍କ ସୁସମ୍ପର୍କ।
