କଟକ ଅଫିସ,୧୦।୪ – ଜଳ ହିଁ ଜୀବନ। କେଉଁଠି ଲୋକେ ପାଣି ଟୋପାଏ ପାଇଁ ଡହଳ ବିକଳ ହେଉଛନ୍ତି ତ ଆଉ କେଉଁଟି ପାନୀୟଜଳ ଅପଚୟ ହେଉଛି। କଟକ ସହରର ବିଭିନ୍ନ ସ୍ଥାନରେ ଜଳ ଅପଚୟ ହେଉଥିବା ଦେଖିବାକୁ ମିଳିଛି। ତୁରନ୍ତ ଏହାକୁ ରୋକା ନ ଗଲେ ଆଗାମୀ ଦିନରେ ଉତ୍କଟ ଜଳ ସମସ୍ୟାର ସମ୍ମୁଖୀନ ହେବେ ସହରବାସୀ।
କଟକ ସହରର ଲୋକସଂଖ୍ୟା ସାଢେ ୬ ଲକ୍ଷ। ଏଠାରେ ପ୍ରତ୍ୟେକ ଦିନ ୯୨.୮୫ ମିଲିୟନ ଲିଟର ପାନୀୟଜଳର ଆବଶ୍ୟକତା ରହିଛି। ହେଲେ ଜନସ୍ବାସ୍ଥ୍ୟ ବିଭାଗ ପକ୍ଷରୁ କଟକକୁ ଦୈନିକ ୧୦୭.୭ ମିଲିୟନ ଲିଟର ପାନୀୟଜଳ ଯୋଗାଇ ଦିଆଯାଉଛି। ଆବଶ୍ୟକତାରୁ ଅଧିକ ଜଳ ଯୋଗା ଯାଉଥିଲେ ମଧ୍ୟ ସେଥିମଧ୍ୟରୁ ୩୦ରୁ ୪୦ ପ୍ରତିଶତ ପ୍ରତ୍ୟେକ ଦିନ ନଷ୍ଟ ହେଉଛି। ସହରର ବିଭିନ୍ନ ସ୍ଥାନରେ ଥିବା ୧୯୫ଟି ବୋରିଂରୁ ପାଣି ସଂଗ୍ରହ କରାଯାଇଥାଏ। ସହରାଞ୍ଚଳର ୭୮ ହଜାର ପାନୀୟଜଳ ଉପଭୋକ୍ତାଙ୍କ ପାଇଁ ଗଳିକନ୍ଦିରେ ପ୍ରାୟ ୩ ହଜାର ଷ୍ଟାଣ୍ଡପୋଷ୍ଟ ରହିଛି। ହେଲେ ଅଧିକାଂଶ ସ୍ଥାନରେ ପାଇପ୍ ଲାଇନ୍ ଲିକେଜ, ପାଣିଟାଙ୍କିରୁ ଓଭର ଫ୍ଲୋ, ପାଣିଟ୍ୟାପ୍ ଅନେକ ସମୟରେ ଖୋଲା ରହୁଥିବାରୁ ବହୁ ପରିମାଣର ଜଳ ନଷ୍ଟ ହେଉଛି। ତୁରନ୍ତ ଏଥିପ୍ରତି ଦୃଷ୍ଟି ଦିଆଗଲେ ଆଗାମୀ ଦିନରେ ଜଳ ଅପଚୟକୁ ରୋକାଯାଇପାରିବ।
ଏ ସମ୍ପର୍କରେ ଜନସ୍ବାସ୍ଥ୍ୟ ବିଭାଗ କାର୍ଯ୍ୟନିର୍ବାହୀ ଯନ୍ତ୍ରୀ ସୁଶାନ୍ତ ଘଡେଇ କହିଛନ୍ତି, ପାଇପ ଲାଇନ୍ ଲିକ୍ ଓ ବିଭିନ୍ନ ପାଣିଟ୍ୟାପ ମୁକୁଳା ପଡିଥିବାରୁ ପ୍ରତିଦିନ ବହୁ ଲକ୍ଷ ଲିଟର ଜଳ ଅପଚୟ ହେଉଛି। ସାଧାରଣ ଲୋକ, ବ୍ୟବସାୟୀ, ଆପାର୍ଟମେଣ୍ଟ, କଳକାରଖାନା ଆଦି ଉପରେ ବହୁ କୋଟି ଟଙ୍କାର ପାଣି ଟିକସ ବାକି ପଡିଛି। ଟଙ୍କା ଦେବା ପାଇଁ ଲୋକଙ୍କୁ କୁହାଯାଉଛି। ବକେୟା ଟଙ୍କା ନ ଦେଲେ ଜଳଯୋଗାଣ ବନ୍ଦ ପାଇଁ ତାଗିଦ୍ କରାଯାଉଛି। ପାଣି ଟିକସ ବାବଦରେ ଏବେସୁଦ୍ଧା ୧୬ କୋଟି ୮୫ ଲକ୍ଷ ଟଙ୍କା ବାକି ରହିଛି। ଅନ୍ୟପକ୍ଷରେ ଭୂତଳ ପାଣିରେ ଆଇରନ ମାତ୍ରା ଅଧିକ ଥିବାରୁ ଗୋଳିପାଣି ଆସୁଛି। ଖୁବଶୀଘ୍ର ଏହାର ସମାଧାନ କରାଯିବ। ନଦୀଜଳକୁ ବିଶୋଧନ କରି ଲୋକଙ୍କୁ ପାନିୟଜଳ ଯୋଗାଯିବ। ଜଗତ୍ପୁର, ସିଡିଏ ସେକ୍ଟର-୬ ଏବଂ ପ୍ରତାପନଗରୀ ପ୍ଲାଣ୍ଟରେ ଏହି ପ୍ରକଳ୍ପ ଉପରେ କାମ ଚାଲିଛି। ଏହା କାର୍ଯ୍ୟକ୍ଷମ ହେଲେ ସହରବାସୀ ଭଲ ପାଣି ପାଇପାରିବେ ବୋଲି ଘଡେଇ ସୂଚନା ଦେଇଛନ୍ତି।
