ମୁମ୍ବାଇ, ୩୦।୩ : କ୍ରିକେଟ କଣ୍ଟ୍ରୋଲ ବୋର୍ଡ ଅଫ୍ ଇଣ୍ଡିଆ (ବିସିସିଆଇ) ୨୦୨୧ ଆଇପିଏଲରେ ଲାଗୁ କରିବାକୁ ଯାଉଛି କିଛି ନୂଆ ନିୟମ। ନୂଆ ନିୟମ ସମ୍ପର୍କରେ ସମସ୍ତ ଫ୍ରାଞ୍ଚାଇଜକୁ ଅବଗତ କରାଇ ଦିଆଯାଇଛି। ଆଇପିଏଲରୁ ସଫ୍ଟ ସିଗନାଲ ନିୟମକୁ ବାଦ୍ ଦେଇଛି ବିସିସିଆଇ। ନୂଆ ନିୟମ ଅନୁସାରେ, ଫିଲ୍ଡ ଅମ୍ପାୟରଙ୍କ ସଫ୍ଟ ସିଗନାଲ ତୃତୀୟ ଅମ୍ପାୟରଙ୍କ ନିଷ୍ପତ୍ତି ଉପରେ ପ୍ରଭାବ ପକାଇବ ନାହିଁ।
କୌଣସି ନିଷ୍ପତ୍ତି ନେବା ପାଇଁ ଅନ୍ ଫିଲ୍ଡ ଅମ୍ପାୟରଙ୍କୁ ତୃତୀୟ ଅମ୍ପାୟରଙ୍କ ସହାୟତା ଦରକାର ପଡ଼ିଲେ, ବୋଲର ଏଣ୍ଡର ଅମ୍ପାୟର ଲେଗ୍ ଅମ୍ପାୟରଙ୍କ ସହ ପରାମର୍ଶ କରିବା ପରେ ନିଷ୍ପତ୍ତି ନେବେ। ଏହାପରେ ତୃତୀୟ ଅମ୍ପାୟରଙ୍କ ସହ ଯୋଗାଯୋଗ କରିବେ। ତୃତୀୟ ଅମ୍ପାୟର ଉପଲବ୍ଧ ଥିବା ସମସ୍ତ ଟେକନୋଲୋଜିର ବ୍ୟବହାର କରି ସଠିକ୍ ନିଷ୍ପତ୍ତି ନେବେ। ଏହାପରେ ଅନ୍ ଫିଲ୍ଡ ଅମ୍ପାୟରଙ୍କୁ ନିଜ ନିଷ୍ପତ୍ତି ସମ୍ପର୍କରେ ଜଣାଇବେ।
ଉଲ୍ଲେଖଯୋଗ୍ୟ, ଭାରତୀୟ ଅଧିନାୟକ ବିରାଟ କୋହଲି ସଫ୍ଟ ସିଗନାଲ ନିୟମକୁ କଡ଼ା ବିରୋଧ କରିଆସୁଛନ୍ତି। ଆଉ ଏଲ୍ବିଡବ୍ଲ୍ୟୁ ନିଷ୍ପତ୍ତିରେ ଅମ୍ପାୟରଙ୍କ ସିଗନାଲକୁ ମଧ୍ୟ ସେ ନାପସନ୍ଦ କରନ୍ତି। ହେଲେ ଏହାକୁ ଚଳିତ ଆଇପିଏଲରେ ବ୍ୟବହାର କରିବାକୁ ନିଷ୍ପତ୍ତି ନେଇଛି ବିସିସିଆଇ।
